Bloomberg اگەنتتىگىنىڭ 19-قاراشاداعى مالىمەتىنە سۇيەنسەك، ترامپ قىتايدىڭ شىنجىن قالاسىندا ءوتىپ جاتقان ازيا-تىنىق مۇحيتى ەكونوميكالىق ىنتىماقتاستىعى (APEC) ءسامميتى اياسىندا Fox News ارناسىنا سۇحبات بەرگەن.
- ەكى-ءۇش جىلدان كەيىن، ەگەر مەن ءالى قىزمەتتە بولسام، Blackwell چيپتەرىن ساتۋعا بولادى دەپ رۇقسات بەرەر ەدىم. سەبەبى ول ۋاقىتتا كومپانيادا ودان دا جاڭا ونىمدەر پايدا بولادى،-دەدى ول ءوز سوزىندە.
ايتا كەتەيىك، ترامپتىڭ ەكىنشى پرەزيدەنتتىك مەرزىمى 2029-جىلدىڭ قاڭتارىندا اياقتالادى.
ا ق ش پرەزيدەنتىنىڭ ايتۋىنشا، Nvidia قازىردىڭ وزىندە Blackwell دەن اسىپ تۇسەتىن جاڭا بۋىن چيپتەرىن ازىرلەپ جاتىر. ول Blackwell چيپتەرى قازىر وتە وزىق بولعانىمەن، تاعى ءبىر جىلدان كەيىن ەسكىرۋى مۇمكىن دەپ ەسەپتەيدى.
Blackwell چيپتەرى – ا ق ش پەن قىتاي اراسىنداعى تەحنولوگيالىق باسەكەنىڭ باستى نىساندارىنىڭ ءبىرى. ونىڭ جوعارى ەسەپتەۋ قۋاتى قىتايعا جاساندى ينتەللەكت (ج ي) تەحنولوگيالارىن جەدەل دامىتۋعا مۇمكىندىك بەرەدى. بۇعان دەيىن Nvidia اقش ۇكىمەتىنەن وسى چيپتى قىتايعا ساتۋعا رۇقسات الۋعا تىرىسقانىمەن، ترامپ اكىمشىلىگى كەلىسىم بەرمەي، تەك ونىمدىلىگى تومەندەۋ H200 پروتسەسسورلارىن ەكسپورتتاۋعا عانا رۇقسات ەتكەن بولاتىن.
وتكەن اپتادا Nvidia نىڭ بۇرىنعى باس ديرەكتورى دجەنسەن حۋانگ جەكە ومىرىنە قاتىستى داۋ- دامايدان سوڭ قىزمەتىنەن كەتكەننەن كەيىن، كومپانيانىڭ قىتاي نارىعىنا دەگەن كوزقاراسى دا وزگەردى.
17-قاراشادا وتكەن قارجىلىق ەسەپ بەرۋ جيىنىندا Nvidia باس ديرەكتورىنىڭ مىندەتىن اتقارۋشى كولەتت كرەسس كومپانيانىڭ ا ق ش ۇكىمەتى ماقۇلداعان Hopper سەريالى دەرەكتەر ورتالىعى چيپتەرىن قىتايعا جەتكىزۋدى توقتاتقانىن جاريالادى. ەندى بولاشاق كىرىس بولجامدارىنا دا وسى ونىمدەردەن تۇسەتىن تابىس ەنگىزىلمەيدى. ول وتكەن توقساندا قىتايدا قۇنى 2,4 ميلليارد ا ق ش دوللارىن قۇرايتىن Hopper ونىمدەرى ساتىلعانىن ايتقانىمەن، جەتكىزىلىمدى توقتاتۋ سەبەبىن ناقتىلامادى.
سول كۇنى Nvidia ۇلتتىق قاۋىپسىزدىك جانە ەكسپورتتىق باقىلاۋ ماسەلەلەرىمەن اينالىساتىن ديرەكتورلار كەڭەسىنىڭ ارنايى كوميتەتىن قۇراتىنىن مالىمدەدى. كومپانيانىڭ جاڭا ءتوراعاسى حارۆي دجونس ۇلتتىق قاۋىپسىزدىك احۋالى نارىقتىق ورتانى تۇبەگەيلى وزگەرتىپ جاتقانىن اتاپ ءوتىپ، كەلەسى باس ديرەكتور بۇل ماسەلەگە اسا ساقتىقپەن قاراۋى ءتيىس ەكەنىن ەسكەرتتى.
سونىمەن قاتار وسى اپتادا ترامپ اكىمشىلىگى قىتايلىق كومپانيالاردىڭ شەتەلدىك دەرەكتەر ورتالىقتارى ارقىلى وزىق ج ي چيپتەرى مەن سەرۆەرلەرىن قاشىقتان پايدالانۋىن شەكتەۋ ءۇشىن ءبىرقاتار ەلدەرگە چيپ ەكسپورتتاۋدى باقىلاۋدى كۇشەيتتى.
ترامپتىڭ سوڭعى مالىمدەمەسى ا ق ش كونگرەسىندە وزىق چيپتەردىڭ قىتايعا ەكسپورتىن شەكتەيتىن زاڭ جوباسىن ىلگەرىلەتۋگە قوسىمشا سەرپىن بەرۋى مۇمكىن. رەسپۋبليكاشىل سەناتور دجيم بەنكس پەن دەموكرات سەناتور ەليزابەت ۋوررەن Blackwell سەكىلدى وزىق چيپتەردى قىتايعا ساتۋعا تىيىم سالاتىن «جاساندى ينتەللەكتتى قاداعالاۋ تۋرالى زاڭ» (AI Overwatch Act) جوباسىن ۇسىنىپ وتىر. قازىرگى ۋاقىتتا بۇل قۇجات جىلدىق قورعانىس بيۋدجەتى تۋرالى زاڭ اياسىندا سوڭعى كەلىسۋ كەزەڭىنەن ءوتىپ جاتىر.
بۇعان دەيىن ا ق ش قىتاي، رەسەي جانە يران كومپانيالارىنىڭ شەتەلدىك دەرەكتەر ورتالىقتارى ارقىلى وزىق جاساندى ينتەللەكت چيپتەرىنە قاشىقتان قول جەتكىزۋىن شەكتەيتىن جاڭا ەرەجە ازىرلەپ جاتقانىن جازدىق.