ا ق ش پرەزيدەنتى دونالد ترامپ تەگەراننىڭ يادرولىق باعدارلاماسى مەن ورمۋز بۇعازىن اشۋ جونىندەگى كەلىسسوزدەر ناتيجەلى بولسا، ا ق ش- تىڭ يرانعا قايتا سوققى جاساۋى ەكىتالاي ەكەنىن مالىمدەدى.
ا ق ش باسشىسى بۇل تۋرالى 8-قاراشادا CNN تەلەارناسىنا تەلەفون ارقىلى بەرگەن 20 مينۋتتىق سۇحباتىندا ايتتى.
- ءبارى ولاردىڭ ناقتى ءارى بەرىك كەلىسىمگە كەلۋىنە بايلانىستى. مۇنداي جاعدايدا قايتا سوققى جاساۋعا تۋرا كەلمەيدى دەپ ويلايمىن، - دەدى ا ق ش پرەزيدەنتى.
سونىمەن قاتار ترامپ ا ق ش اسكەرى جاڭا اسكەري وپەراتسيالاردى باستاۋعا دايىن ەكەنىن ايتتى. ونىڭ سوزىنشە، ايماقتاعى ءۇش امەريكالىق اۋە كەمەسى كەز كەلگەن ۋاقىتتا وپەراتسيا جۇرگىزۋگە ءازىر تۇر.
ا ق ش پرەزيدەنتىنىڭ سوزىنشە، ۆاشينگتون يراننىڭ ەلەكتر ستانسيالارى مەن 38 كوپىرىن قوسا العاندا، سوققى جاسالۋى مۇمكىن نىسانداردى بەلگىلەپ قويعان. ونىڭ مالىمدەۋىنشە، امەريكالىق اسكەر بۇل نىسانداردى ءبىر ساعات ىشىندە جويا الادى.
- مەن مۇنداي قادامعا بارعىم كەلمەيدى. ويتكەنى ينفراقۇرىلىمدى قايتا قالپىنا كەلتىرۋگە شامامەن ون جىل ۋاقىت قاجەت بولادى، - دەدى ترامپ.
ترامپ بۇعان دەيىنگى سوققىلاردان كەيىن يراننىڭ اسكەري الەۋەتى ايتارلىقتاي السىرەگەنىن دە مالىمدەدى. ونىڭ باعالاۋىنشا، تەگەراندا زىمىرانداردىڭ شامامەن 10 پايىزى، ال درونداردىڭ 15 پايىزى قالعان.
بۇعان قوسا ا ق ش- تىڭ مەملەكەتتىك حاتشىسى ماركو رۋبيو جەكسەنبى كۇنى كەلىسسوزدەردىڭ ناتيجەسىنە قاتىستى ساقتىق تانىتىپ، تاراپتاردىڭ ازىرگە ديپلوماتيالىق كەلىسىمگە قول جەتكىزۋىنە ۋاقىت كەرەك ەكەنىن ايتتى.
- كەلىسسوزدەردە ازىرگە ايتارلىقتاي ناتيجە جوق. يراننىڭ تالاپتارى قابىلداۋعا كەلمەيدى، كەيبىرى ءتىپتى شىندىققا جاناسپايدى، - دەدى ا ق ش مەملەكەتتىك حاتشىسى.
CNN دەرەگىنشە، وتكەن اپتادا ا ق ش كونگرەسىنە وتكەن ارالىق سايلاۋدان كەيىن تاياۋ شىعىستاعى ديپلوماتيالىق بايلانىستار جاندانا تۇسكەن. اتاپ ايتقاندا، 6-قاراشادا دونالد ترامپ قاتار ءامىرى شەيح تاميم بەن حاماد ءال تانيمەن تەلەفون ارقىلى سويلەسىپ، قاقتىعىستى باسەڭدەتۋ جولدارىن تالقىلادى.
قاتار ۆاشينگتون مەن تەگەران اراسىنداعى كەلىسسوزدەردە دەلدالدىق قىزمەتىن جالعاستىرىپ كەلەدى. الايدا تاراپتار ازىرگە كەلىسسوزدەردىڭ ناقتى ناتيجەسى تۋرالى اقپارات بەرگەن جوق.
ايتا كەتەيىك، ا ق ش، يزرايل جانە يران اراسىنداعى قارۋلى قاقتىعىس 2026-جىلعى اقپاننىڭ سوڭىنان بەرى جالعاسىپ كەلەدى. قاقتىعىستى رەتتەۋدەگى باستى كەدەرگىلەردىڭ ءبىرى - الەمدىك مۇناي جەتكىزىلىمىنىڭ ەداۋىر بولىگى وتەتىن ورمۋز بۇعازىنداعى جاعداي.
بۇعان دەيىن ا ق ش يرانعا كاسپي تەڭىزى مەن قۇرلىقتاعى شەكارا ارقىلى قارۋ جەتكىزۋگە توسقاۋىل قويماقشى ەكەنىن حابارلاعان بولاتىنبىز.