ول سەناتور توم كوتتوندى قۇجاتتىڭ قارالۋىنا كەدەرگى كەلتىرىپ وتىر دەپ ايىپتادى، دەپ حابارلايدى Kazinform Anadolu اگەنتتىگىنە سىلتەمە جاساپ.
ترامپ بۇل مالىمدەمەنى وگايو شتاتىنداعى ميتينگىگە بارا جاتقان جولدا اق ءۇي ماڭىندا جۋرناليستەرگە بەرگەن سۇحباتىندا جاسادى.
پرەزيدەنت ا ق ش-تا ساعات ءتىلىن اۋىستىرۋ تاجىريبەسىنەن باس تارتىپ، ءتيىستى زاڭ جوباسىن سەناتتىڭ قابىلداۋى قاجەت ەكەنىن ايتتى.
ترامپتىڭ سوزىنشە، قولدانىستاعى جۇيە ەل ەكونوميكاسىنا ايتارلىقتاي سالماق ءتۇسىرىپ، ادامداردىڭ قالىپتى ءومىر ىرعاعىن بۇزادى.
- ءبىز جىلىنا ەكى رەت ساعات ءتىلىن العا جانە ارتقا اۋىستىرۋ سياقتى وسى اقىلعا قونىمسىز تاجىريبە مەن داستۇردەن ارىلعىمىز كەلەدى،- دەدى ول.
ترامپ امەريكالىقتاردىڭ باسىم بولىگى كۇندىزگى جارىقتى ۇزاعىراق پايدالانعىسى كەلەتىنىن اتاپ ءوتتى. الايدا قىسقى ۋاقىتقا كوشكەننەن كەيىن كۇن ەرتە باتاتىنىن ايتتى.
پرەزيدەنت سونداي اق زاڭ جوباسىنىڭ سەناتتا قارالۋىنا كەدەرگى كەلتىرىپ وتىرعان رەسپۋبليكاشىل سەناتور توم كوتتوندى سىنعا الدى.
ترامپ قۇجاتتىڭ بۇعان دەيىن وكىلدەر پالاتاسىندا 80 پايىزدان استام داۋىسپەن ماقۇلدانعانىن ەسكە سالدى.
- زاڭ جوباسى سەناتتا ءبىراز ۋاقىتتان بەرى جاتىر. توم كوتتوندى ارەكەت ەتۋگە كوندىرە الامىز دەپ ۇمىتتەنەمىن. توم كوتتون زاڭ جوباسىنا توسقاۋىل قويىپ وتىر، بۇلاي ىستەۋگە بولمايدى، - دەدى پرەزيدەنت.
ءبىر كۇن بۇرىن ترامپ ءوزىنىڭ الەۋمەتتىك جەلىسىندە كوتتوننىڭ ۇيالى تەلەفون ءنومىرىن جاريالاپ، سايلاۋشىلاردى سەناتورعا قىسىم كورسەتۋگە جانە ونىڭ زاڭ جوباسىنىڭ قابىلدانۋىنا كەدەرگى كەلتىرمەۋىن تالاپ ەتۋگە ۇندەگەن ەدى.
ا ق ش-تا جازعى ۋاقىتقا اۋىسۋ ءارتۇرلى فورمادا ءبىرىنشى دۇنيەجۇزىلىك سوعىس كەزىنەن بەرى قولدانىلىپ كەلەدى. 1966-جىلى بۇل جۇيە فەدەرالدىق زاڭ ارقىلى بۇكىل ەل اۋماعىندا ەنگىزىلدى.