28 جىل بۇرىن باستالعان ساپار
57 جاستاعى كارل بۋشبي 2-قاراشادا ۇلى بريتانيانىڭ حالل قالاسىنا جەتىپ، 1998 -جىلى باستاعان ساياحاتىنا نۇكتە قويدى.
ول كەزدە 28 جاستا بولعان كارل بريتان ارمياسىنىڭ اۋە-دەسانت بولىمىندەگى قىزمەتىنەن كەتكەن ەدى. جەكە ومىرىندەگى قيىندىقتاردان كەيىن الەمدى جاياۋ ارالاۋعا بەل بۋىپ، كارتاعا بولاشاق باعىتىن سىزىپ شىققان.
ساياحاتشى ساپارىن چيليدىڭ پۋنتا-ارەناس قالاسىنان باستاعان. جولعا شىققاندا قولىندا بىرنەشە ءجۇز دوللار، شاتىر جانە كامەرا عانا بولعان.
ول ساياحاتى اياقتالعانشا ۇيىنە ورالماۋدى جانە جول بويى كولىك پايدالانباۋدى وزىنە باستى شارت ەتىپ قويعان.
باستاپقىدا كارل بۇل ساپارعا ون جىل جەتكىلىكتى دەپ ويلاعان. الايدا تابيعي كەدەرگىلەر، شەكارادان ءوتۋ ماسەلەلەرى مەن الەمدەگى ءتۇرلى وقيعالار ونىڭ جوسپارىن بىرنەشە رەت وزگەرتۋگە ءماجبۇر ەتتى.
قازاقستان ارقىلى دا وتكەن
كارل بۋشبيدىڭ باعىتى وڭتۇستىك امەريكادان باستالىپ، سولتۇستىك امەريكا، ازيا جانە ەۋروپا قۇرلىقتارىن قامتىعان.
ول چيليدەن سولتۇستىككە قاراي بەت الىپ، وڭتۇستىك امەريكانىڭ نۋ ورماندارىن، پاناما مەن كولۋمبيا اراسىنداعى قاۋىپتى دارەن ايماعىن كەسىپ وتكەن. كەيىن ا ق ش پەن كانادا ارقىلى الياسكاعا جەتكەن.
ساياحاتىنداعى ەڭ كۇردەلى كەزەڭدەردىڭ ءبىرى - الياسكا مەن رەسەي اراسىنداعى مۇز قاتقان بەرينگ بۇعازىنان ءوتۋى. وسىدان كەيىن ول چۋكوتكا مەن ءسىبىردى باسىپ ءوتىپ، ازيانىڭ باسقا ەلدەرىنە باعىت العان.
ساياحاتشى قىتايدان كەيىن قازاقستان مەن تۇرىكمەنستان ارقىلى ءجۇرىپ، كاسپيي تەڭىزىنەن ءوتىپ ازەربايجانعا جەتكەن. ودان ءارى كاۆكاز، تۇركيا، بالقان تۇبەگى جانە ەۋروپا ەلدەرى ارقىلى ۇلى بريتانياعا جاقىنداعان.
2026 -جىلدىڭ قازان ايىندا لا-مانش بۇعازىن ءجۇزىپ ءوتىپ، تۋعان ەلىنىڭ جاعالاۋىنا جەتكەن. وسىلايشا 28 جىل بۇرىن باستالعان ساپارىنىڭ سوڭعى بولىگىن جاياۋ ەڭسەرگەن.
تۇرمەگە قامالىپ، قارۋلى ادامداردىڭ قورقىتۋىنا تاپ بولعان
ۇزاق ساپار بارىسىندا ساياحاتشى تالاي قيىندىقتى باستان وتكەرگەن. پانامادا ول قىسقا ۋاقىتقا قاماۋعا الىنسا، مەكسيكادا قارۋلى ادامداردىڭ قورقىتۋىنا تاپ بولعان. ال رەسەيدە مەملەكەتتىك شەكارانى زاڭسىز كەسىپ وتكەنى ءۇشىن ۇستالعان.
بۇعان قوسا، 2008 -جىلعى الەمدىك قارجى داعدارىسى مەن 2020 -جىلى باستالعان كوروناۆيرۋس پاندەمياسى دا ونىڭ ساپارىن ەداۋىر باياۋلاتقان.
سوندىقتان 28 جىلدىڭ شامامەن 15 جىلىن عانا تىكەلەي جولدا وتكىزگەن. قالعان ۋاقىتىندا قۇجات راسىمدەۋ، قارجى تابۋ جانە ساپاردى جالعاستىرۋعا قاجەتتى ۇيىمداستىرۋ ماسەلەلەرىمەن اينالىسقان.
سوعان قاراماستان، كارل ءوز ماقساتىنان باس تارتپاعان. ول جالپى ۇزىندىعى 31 مىڭ ميلدەن اساتىن، ياعني شامامەن 50 مىڭ شاقىرىم جولدى ەڭسەرگەن. بۇل جەر شارىنىڭ ەكۆاتور بويىنداعى ۇزىندىعىنان دا كوپ.
28 جىلدان كەيىن اناسىمەن قاۋىشتى
2-قاراشادا كارل بۋشبيدى حالل قالاسىنداعى ۆيكتوريا الاڭىندا جۇزدەگەن ادام قارسى الدى.
ساياحاتشى قالا كوشەلەرىمەن قاجەتتى زاتتارى تيەلگەن ارباسىن يتەرىپ ءجۇرىپ وتكەن. Beast 2 دەپ اتالاتىن اربادا ءدارى-دارمەك، ۇيىقتايتىن قاپتار، شامدار جانە ۇزاق جولدا ابدەن توزعان ەكى دوڭگەلەك بولعان. ال ەڭ اسەرلى ءسات ونىڭ بالالىق شاعى وتكەن ۇيىنە كەلگەندە بولدى.
ءۇيدىڭ الدىندا كارلدى 75 جاستاعى اناسى اندجەلا كۇتىپ تۇرعان. اراعا 28 جىل سالىپ قاۋىشقان اناسى مەن بالاسىنىڭ اڭگىمەسى كوپشىلىكتى تولقىتتى.
«سەن ءبىراز وزگەرىپسىڭ»، - دەدى كارل اناسىنا. «مەن قارتايدىم»، - دەپ جاۋاپ بەردى اناسى كوزىنە جاس الىپ. «ەكەۋمىز دە وزگەردىك»، - دەدى ساياحاتشى.
وسى كۇنى كارل 36 جاستاعى ۇلىمەن جانە بۇرىن-سوڭدى كورمەگەن 12 جاستاعى نەمەرەسىمەن دە كەزدەستى.
ۇيگە جەتۋ ءۇشىن بۇكىل الەمدى اينالىپ شىعۋىما تۋرا كەلدى، - دەدى ول.
ساپارىن اياقتاعان كارل بۋشبي وسى جىلدار ىشىندە وزىنە كومەكتەسكەن ادامدارعا العىس ءبىلدىردى.
ۇيگە ورالۋ ءۇشىن بۇكىل الەمدى اينالىپ شىعۋىما تۋرا كەلدى. جولدا كەزدەسكەن بەيتانىس ادامداردىڭ جاقسىلىعى مەنى وسى كۇنگە جەتكىزدى. مەن مۇنىڭ ءبارىن جالعىز جاساعان جوقپىن. ماعان كومەكتەسكەن ۇلكەن كوماندا بولدى. ول - بۇكىل الەم، - دەدى ساياحاتشى.
ونىڭ ايتۋىنشا، وسى ماقساتقا جەتۋ جولىندا ءتۇرلى مەملەكەتتىك شەكتەۋلەردى ەڭسەرىپ، ەكى الەمدىك رەكورد ورناتۋعا تۋرا كەلگەن.
كارل بۋشبيدىڭ ەرەكشە ساپارى ەندى دەرەكتى فيلمگە ارقاۋ بولماق. تانىمال نەمىس رەجيسسەرى ۆەرنەر حەرتسوگ الەمدى جاياۋ ارالاپ شىققان ساياحاتشى تۋرالى فيلم ءتۇسىرۋدى جوسپارلاپ وتىر.