Tundra ،Tacoma ،4Runner ،Land Cruiser جانە Sequoia جول تالعامايتىن كولىكتەرى قىسقى جاعدايدا پايدالانۋعا بەيىمدەلىپ، Snowhunter اتتى ارنايى توپتاماعا بىرىكتىرىلدى.
Toyota Snowhunter: قارلى قىسقا ارنالعان بەس كولىك
ا ق ش- تىڭ نيەۆادا شتاتىنداعى لاس-ۆەگاس قالاسىندا جىل سايىن ۇيىمداستىرىلاتىن حالىقارالىق SEMA كورمەسى 2026-جىلعى 3-قاراشادا باستالادى. بيىلعى ءىس-شاراعا قاتىساتىن Toyota كومپانياسى امەريكالىق نارىقتاعى قازىرگى مودەلدەرىنىڭ نەگىزىندە بەس ەرەكشە كونتسەپت ازىرلەدى.
Snowhunter دەپ اتالاتىن جاڭا توپتاماعا تولىق ولشەمدى Tundra پيكابى، ىقشام Tacoma پيكابى، 4Runner كروسسوۆەرى، سونداي-اق Land Cruiser جانە Sequoia جول تالعامايتىن كولىكتەرى ەندى. كومپانيا ماماندارى ولاردىڭ بارلىعىن قارلى ءارى سۋىق اۋا رايىندا پايدالانۋعا بەيىمدەگەن.
جاڭا كونتسەپتىلەردىڭ سىرتقى ديزاينى ەكسپەديتسيالىق ستيلدە جاسالعان. كولىكتەردىڭ ءبۇيىر بولىكتەرى، ارتقى جاعى مەن توبەسىنە سۇر-قارا ءتۇستى كامۋفلياج ورنەكتەرى تۇسىرىلگەن. ديزايندى ميچيگان شتاتىنداعى Calty Design Research كومپانياسى ازىرلەگەن.
سونىمەن قاتار اۆتوموبيلدەرگە Snowhunter توپتاماسىنىڭ ارنايى ەمبلەماسى مەن جىلتىر قارا ساندىك ەلەمەنتتەر ورناتىلعان.
دوڭگەلەكتەردىڭ ورنىنا شىنجىرتابان ورناتىلعان
Snowhunter توپتاماسىنداعى بارلىق بەس كولىكتىڭ باستى ەرەكشەلىگى - كادىمگى دوڭگەلەكتەردىڭ ورنىنا اق ءتۇستى نەگىزى بار شىنجىرتابان جۇيەلەرىنىڭ قولدانىلۋى. مۇنداي شەشىم قارلى جەرلەردە جانە كۇردەلى جول جاعدايلارىندا قوزعالۋ مۇمكىندىگىن كەڭەيتۋگە باعىتتالعان.
بۇدان بولەك، كونتسەپتىلەر Toyota Original Parts جانە TRD كومپانيالارىنىڭ كولىكتى كوتەرۋگە ارنالعان ەلەمەنتتەرىمەن جابدىقتالعان. قوسىمشا جارىقتاندىرۋ قۇرىلعىلارى دا قاراستىرىلعان. ولار شاتىرداعى جۇكسالعىش جۇيەسىنە بىرىكتىرىلىپ، كولىكتەردىڭ قاراڭعى ۋاقىتتا قوزعالۋىنا كومەكتەسەدى.
Toyota Tundra جانە Tacoma: ەكسپەديتسياعا ارنالعان پيكاپتار
Toyota Tundra Snowhunter كونتسەپتىسى TrailLift Pro Rack جۇيەسىمەن جابدىقتالعان. بۇل تولىق ولشەمدى پيكاپ موبيلدى بازالىق لاگەر رەتىندە پايدالانۋعا ارنالعان. ونىڭ كونسترۋكتسياسى ءارتۇرلى جۇكتەردى، سونىڭ ىشىندە ەكسپەديتسيالىق جابدىقتاردى تاسىمالداۋعا جانە ساقتاۋعا مۇمكىندىك بەرەدى.
ال كولەمى شاعىنداۋ Tacoma Snowhunter قيىن جەتەتىن ورىندارعا بارۋعا بەيىمدەلگەن. پيكاپقا بيىك انتەننا ورناتىلعان. ول ساپار كەزىندە سىرتقى الەممەن بايلانىستى ساقتاۋعا كومەكتەسەدى.
4Runner مەن Land Cruiser قانداي وزگەرىستەر الدى؟
Toyota 4Runner Snowhunter مودەلىنىڭ توبەسىنە Thule جۇك بوكسى ورناتىلعان. سونىمەن قاتار كولىكتىڭ استىڭعى بولىگى قوسىمشا قورعانىسپەن جابدىقتالعان. بۇل شەشىمدەر كۇردەلى باعىتتاردا قوزعالعان كەزدە اۆتوموبيلدى قورعاۋعا جانە قاجەتتى جابدىقتاردى تاسىمالداۋعا ارنالعان.
Land Cruiser Snowhunter كونتسەپتىسىنە Toyota Rock رەيلينگتەرى مەن سىرعاناۋعا قارسى توسەمدەر بەرىلگەن. ال توبەدەگى جۇك بوكسىنىڭ ورنىنا Thule كومپانياسىنىڭ شاڭعى تاسىمالداۋعا ارنالعان ارنايى بەكىتكىشى ورناتىلعان.
ايتا كەتەيىك، ا ق ش نارىعىندا بۇل مودەل Prado اتاۋىنسىز، جاي عانا Land Cruiser رەتىندە ساتىلادى.
Sequoia Snowhunter- ءدىڭ ەرەكشەلىكتەرى
توپتاماداعى ەڭ ءىرى جول تالعامايتىن كولىكتەردىڭ ءبىرى - Toyota Sequoia Snowhunter. ول الدىڭعى بولىگىنە ورناتىلعان TRD ەلەمەنتتەرىمەن، اليۋميني تابالدىرىقتارىمەن جانە توبەدەگى جۇك بوكسىمەن ەرەكشەلەنەدى.
بۇل جابدىقتار كولىكتىڭ ەكسپەديتسيالىق مۇمكىندىكتەرىن كەڭەيتىپ، ۇزاق ساپارلارعا قاجەتتى زاتتاردى تاسىمالداۋعا جاعداي جاسايدى.
Toyota قىسقى جوبالارىمەن شەكتەلمەيدى
Toyota سوڭعى ۋاقىتتا شىتىرمان وقيعالارعا ارنالعان اۆتوموبيلدەر باعىتىنا دا نازار اۋدارىپ كەلەدى. بۇعان دەيىن ا ق ش نارىعىندا Toyota Grand Highlander وتباسىلىق كروسسوۆەرىنىڭ Woodland اتتى جاڭا نۇسقاسى ۇسىنىلعان بولاتىن.
بۇل موديفيكاتسيا سالونداعى توڭازىتقىشپەن، قايتا قارالعان اسپا جۇيەسىمەن جانە باسقا شينالارمەن ەرەكشەلەنەدى.
جاڭا Snowhunter كونتسەپتىلەرى ازىرگە كورمە ءۇشىن دايىندالعان جوبالار سانالادى. ولاردىڭ سەريالىق وندىرىسكە شىعاتىنى نەمەسە ۇسىنىلعان جابدىقتاردىڭ بارلىعى تۇتىنۋشىلارعا قولجەتىمدى بولاتىنى تۋرالى اقپارات جاريالانباعان. دەگەنمەن بەس كونتسەپت Toyota-نىڭ جول تالعامايتىن مودەلدەرىن قىسقى ەكسپەديتسيالار مەن تابيعات اياسىنداعى ساياحاتتارعا بەيىمدەۋ مۇمكىندىكتەرىن كورسەتەدى.
el.kz