تۋنيس تاريحىن جاڭارتقان رەكوردسمەن قازاق
استانا. قازاقپارات - قازاق باپكەرى ەسبول سۇلتانوۆ باپتاعان تۋنيس تاەكۆوندوشىلارى افريكا چەمپيوناتى، افريكا ويىندارى جانە پاريج وليمپياداسىندا رەكورد ورناتتى.
كۇنى كەشە پاريجدە اياقتالعان وليمپيادا ويىندارىندا ەسبول سۇلتانوۆ جاتتىقتىراتىن تۋنيس تاەكۆوندوشىلارى 1 التىن، 1 قولا جۇلدەنى ەنشىلەدى. افريكا قۇرلىعىنىڭ سپورت جۋرناليستەرى قوس جۇلدەگەردىڭ ەل تاريحىندا بۇرىن-سوڭدى بولماعان بۇل جەتىستىگى تۋرالى جارىسا جازىپ جاتىر. سونداي-اق تۋنيس قۇراماسىن بىلتىردان بەرى باپتاعان قازاق باپكەرى ەسبول سۇلتانوۆتىڭ بىلىكتىلىگى دە ەل اۋزىندا ءجۇر. ءبىر جىل ىشىندە تەك وليمپيادادا ەمەس، قۇرلىقتىق باسەكەلەردە دە رەكورد ورناتقان ەسبولعا قازىردىڭ وزىندە بىرنەشە ەلدەن ۇسىنىس كەلىپ جاتسا كەرەك. وسى رەتتە پاريجدەن تۋنيسكە جول ءجۇرىپ بارا جاتقان مامانعا حابارلاسىپ، از-كەم سۇحباتتاسقان ەدىك.
- پاريجدە تىركەلگەن تاريحي جەتىستىگىڭىز قۇتتى بولسىن! وليمپيادانىڭ اياقتالعانىنا 1 اپتا بولسا دا، وتاندىق جانە شەتەلدىك ب ا ق ءسىز تۋرالى جازۋىن توقتاتار ەمەس. ءبىر ۆيدەودا تۋنيستىك جانكۇيەرلەردىڭ ءسىزدى قورشاپ، كوڭىلدەرى بوساپ، العىستى قارشا بوراتىپ جاتقانىن بايقاپ قالدىم. بۇگىندە وليمپيادا جۇلدەگەرلەرى، شاكىرتتەرىڭىز فيراس كاتۋسسي مەن مۇحامەد حاليل جەندۋبي سەكىلدى ءسىز دە تۋنيستە قاھارمانعا اينالدىڭىز دەسەك، قاتەلەسپەسپىز؟
- راحمەت! ءتورت جىلدىقتىڭ باستى باسەكەسىندە 2 بىردەي مەدال، سونىڭ ىشىندە التىن جۇلدە يەلەنۋ - تۋنيس تاريحىندا بۇرىن-سوڭدى بولماعان جايت. سول سەبەپتەن تۋنيستىكتەر الاقايلاپ قۋانىپ جاتىر. ەلدە - ۇلكەن مەرەكە. البەتتە، سايكەسىنشە ماعان دا ۇلكەن قۇرمەت كورسەتىپ، ريزاشىلىقتارىن ءبىلدىرىپ جاتىر.
- ءبىر سۇحباتىڭىزدا تۋنيس قۇراماسىنىڭ باس باپكەرى قىزمەتىنە تۇيىندەمە ارقىلى تاڭدالعانىڭىز تۋرالى ايتقان ەدىڭىز. وسى رەتتە ول ەلگە شاقىرىلۋ تاريحىڭىز تۋرالى قىسقاشا ايتا وتىرساڭىز؟
- ەلدە شاكىرتتەرىمدى حالىقارالىق دەڭگەيگە شىعارىپ، الەمدىك ارەنالاردا توبە كورسەتىپ جۇرگەن جاتتىقتىرۋشى بولعاندىقتان ولار مەنىڭ تۇيىندەمەمدى سۇرادى. مەنەن بولەك وڭتۇستىك كورەيا، يران، ەگيپەت، فرانسيا ەلدەرىنەن بىلىكتى باپكەرلەر دە بۇل ورىنعا تالاسسا كەرەك. اقىر سوڭىندا تۋنيس تاەكۆوندو فەدەراتسياسى كوپ تۇيىندەمەنى سارالاپ، بىرنەشە ۇمىتكەردىڭ ىشىنەن مەنى تاڭداپ الىپ، كەلىسىمشارت ۇسىندى. ءسويتىپ، بىلتىر قىركۇيەك ايىندا سوندا كوشىپ بارىپ، جۇمىستى باستاپ كەتتىم.
- تۋنيستە كوبىنە فۋتبول، باسكەتبول، گاندبول سەكىلدى سپورت تۇرلەرى تانىمال ەكەنىن بىلەمىز. تەننيستەن ونس جابەر دەگەن مىقتى اتلەت ەل اتىن ايگىلەپ ءجۇر. ال بۇل ەلدە تاەكۆوندو قانشالىق دامىعان؟
- ەلدەگى كوپشىلىك بىلمەۋى مۇمكىن، الايدا تاەكۆوندو تۋنيستە فۋتبولدان سوڭ ءنومىرى ەكىنشى سپورت سانالادى. بۇل سپورتپەن اينالىساتىنداردىڭ قاتارى كوپ. الايدا ولاردىڭ شەبەرلىگىن شىڭدايتىن حالىقارالىق دارەجەدەگى باپكەر سانى از. وعان قوسا، كەدەي ەل قاتارىنا كىرەتىندىكتەن تۋنيس سپورتشىلارىنىڭ حالىقارالىق جارىستارعا ءجيى شىعۋعا مۇمكىندىگى جوق. تيىسىنشە، باپكەرلەردىڭ پراكتيكاسى از بولعاندىقتان، بۇل سپورتقا جاۋاپتى فەدەراتسيا حالىقارالىق دەڭگەيدەگى تاجىريبەسى بار باپكەر قاجەت ەكەنىن سەزىنىپ، سىرتتان ىزدەۋدى قولعا العانى دا سول سەبەپتەن. ال بىلايىنشا بىزدە بوكس قالاي تانىمال بولسا، تاەكۆوندو دا بۇل ەلدە سول شامالاس دەڭگەيدە.
- Instagram-داعى جەكە پاراقشاڭىزدىڭ توبەسىنە افريكا دەپ جازىپ، ونىڭ تۇسىنا كوپ مەدالدىڭ ەمودجيىن قويىپ قويىپسىز. سوندا ءسىز ءبىر جىل ىشىندە باپتاعان تۋنيس تاەكۆوندوشىلار بىرنەشە جارىستا توپ جاردى ما؟
- مەن بۇل لاۋازىمعا تاعايىندالعالى بەرى قۇراما ەكى بەدەلدى جارىس - افريكا چەمپيوناتى مەن افريكا ويىندارىنا قاتىستى. الدىمەن افريكا چەمپيوناتىندا 2 التىن مەدال مەن بىرنەشە كۇمىس، قولا جۇلدە ەنشىلەدىك. سوسىن بيىل ناۋرىزدا افريكا ويىندارىندا 8 سپورتشىنى تاس-ءتۇيىن قىلىپ، باپتاپ اپارىپ، 6 التىن، 1 كۇمىس جۇلدەنى ارقالاپ قايتتىق. ءبىر عانا تاەكۆوندوشىمىز جەڭىلىپ قالدى. سول افريكا وينىدارىندا تۋنيس قۇراماسى جالپىكوماندالىق ەسەپتە 1-ورىن الدى. بۇل - تاريحي جەتىستىك. بۇعان دەيىن ەل سپورتشىلارى ونداي جەتىستىككە قول جەتكىزبەگەن. ونىڭ الدىندا جەلتوقساندا گران-پري جارىسىندا باق سىنادىق. وندا دا 2 التىن مەدال الىپ، الەمنىڭ كىل مىقتىلارى قاتىسقان ول جارىستا جالپىكوماندالىق ەسەپتە 2-ورىنعا تابان تىرەدىك. بۇل دا تاريحي ناتيجە. سوسىن اقپاندا افريكا ەلدەرى اراسىندا جولداما ساراپقا سالىناتىن تۋرنيردە جالپى سانى 4 جولدامانىڭ 4-ەۋىن دە قالتامىزعا باستىق. بۇل دا - تۋنيس تاريحىندا بولماعان جايت. سونىمەن وليمپيادانى قوسقاندا ءبىر جىلدىڭ ىشىندە 4 تاريحي جەتىستىككە قول جەتكىزدىك. قاتىسقان جارىستىڭ تۇگەلىندە سەنساتسيا جاساپ، ەل ويلاماعان ناتيجە كورسەتتىك.
- تۋنيس وسى وليمپيادادا 3 جۇلدە السا، سونىڭ ەكەۋىن قورجىنعا ءسىزدىڭ شاكىرتتەرىڭىز سالدى. وليمپيادا الدىندا سىزگە قانداي مەجە قويدى؟ فەدەراتسيا قانشا مەدال الۋدى جۇكتەپ ەدى؟
- كەلىسىمشارت بويىنشا ماعان وليمپيادادا 1 مەدال الۋ تاپسىرماسى جۇكتەلگەن. سول ءۇشىن ۇزاق ۋاقىت تىڭعىلىقتى دايىندالدىق. باس جوسپار ازىرلەپ، ويىن ۇلگىسىن قاراستىردىق. «جولى تۇيىسەدى-اۋ» دەگەن قارسىلاسقا امال-ايلا قاراستىرۋمەن بولدىق. جولداما العان 4 سپورتشىمىزدى ساقاداي-ساي ەتىپ باپتادىق. نەگىزى، مەن پاريجگە ىشتەي «3 مەدال الساق، ونىڭ ەكەۋى التىن بولسا عوي» دەگەن ۇمىتپەن بارعان ەدىم. دەيتۇرعانمەن، بۇل مەجەگە جەتۋ قيىننىڭ قيىنى ەكەنىن سەزدىم. سوندا دا شاكىرتتەرىمنىڭ الەۋەتىن باعامداپ، دامەلەندىم. دەگەنمەن بۇيىرعانى ءبىر التىن، ءبىر قولا بولدى. قولا العان شاكىرتىم جارتىلاي فينالدا وڭتۇستىك كورەيانىڭ مىقتى اتلەتىنەن ۇتىلىپ قالدى. قارىمى مىقتى ءبىر قىزىمىز جارتىلاي فينالدا سوڭعى سەكۋندتا يراندىقتى جەڭىپ تۇرىپ، ۇتىلىپ قالدى. ودان دا مەدال كۇتكەن ەدىم. دەگەنمەن تۋنيس وليمپيادا كوميتەتى مەن سپورت مينيسترلىگى جۇكتەگەن ءبىر مەدال الۋ تاپسىرماسىن ابىرويمەن ورىندادىق. سوعان دا شۇكىر.
- قازىر جەتىستىكتەرىڭىزدى جىپكە ءتىزىپ، ايتىپ وتىرعانىمىزبەن، از ۋاقىت ىشىندە ءوزىڭىزدى مويىنداتۋ وڭايعا تۇسپەگەنىن دە ايتىپ ءوتۋ كەرەك شىعار.
- تۋنيس - مەنتاليتەتى، ءداستۇرى جاعىنان بىزدەن الىس ەل. ءتىلى، تاعامدارى، ءبارى، ءبارى ءارتۇرلى. البەتتە، ادەپكىدە ۇيرەنىسۋ، ورنىعۋ قيىنعا ءتۇستى. ادامدارمەن قارىم-قاتىناس ءتۇزۋ وڭاي بولمادى. ونىڭ ۇستىنە، وتباسىمدى ەلدە قالدىرىپ، جالعىز باردىم. ءبىراز قيىن كەزەڭدەردى باستان كەشىردىم. ءسوزدىڭ اشىعى كەرەك، قازاقستان تاەكۆوندو دەرجاۆاسى ەمەس. سوندىقتان تۋنيستەگى جانكۇيەرلەر باس باپكەر ەتىپ جۇمىسقا كىرىسكەن كەزىمدە سەنىمسىزدىكپەن قارادى. ولاردىڭ ولاي قاراۋى دا دۇرىس. الەمگە اتى شىققان ايگىلى باپكەر ەمەسپىن.
جۇمىسىمدى ماماندار بايقاعانىمەن، ەل ىشىندە تانىمال ەمەسپىن. ەكىنشىدەن، وزگە قۇرامانىڭ اتلەتتەرىن وزىڭە باۋراپ الۋ، ايتقانىڭدى ىستەتۋ وڭاي شارۋا ەمەس. بوتەننىڭ اتى بوتەن. ءوز ەلىندە شاكىرتتەرىڭدى كىشكەنتايىنان تاربيەلەگەن سوڭ، ولاردى وڭاي باسقارا الاسىڭ. ال مىندا «ءاربىر اسۋدىڭ ءبىر توسۋى بار» دەپ ءوز-ءوزىمدى قامشىلاپ، ولاردىڭ كوڭىلىن تابۋ، بابىن كەلتىرۋدىڭ جولىن ىزدەستىردىم. الدىمەن جانىما كومەكشىلەردى تاڭدادىم. ولاردىڭ جۇمىسىن ساراپتاپ، كوڭىلىم تولماعاندارىن اۋىستىرىپ وتىردىم. اقىر اياعىندا مىقتى كوماندا جاساقتاپ شىعاردىم. وليمپياداداعى جەتىستىگىمىز - جۇلدەگەرلەرگە، ماعان تيەسىلى كورسەتكىش قانا ەمەس، بۇل - كومانداعا ورتاق جەڭىس. ۇشىنشىدەن، مەنى الاڭداتىپ، ءاردايىم ويىمنان كەتپەگەن نارسە - ول سالماعى زىلدەي جاۋاپكەرشىلىك. اڭگىمە باسىندا ايتىپ وتكەنىمدەي، تاەكۆوندو ەل ىشىندە تانىمال بولعاندىقتان، بىزگە «انىق مەدال اكەلەدى» دەپ سەنىم ارتىلدى.
«حالىقتىڭ، سپورتشىلاردىڭ، فەدەراتسيانىڭ سەنىمىن اقتاي الامىن با؟» دەپ قاتتى ۋايىمدادىم. بوساڭسۋعا مۇمكىندىك بولمادى. بەرىلىپ جۇمىس ىستەدىم. جاتتىعۋدان بولەك ۋاقىتتا، اياق الىسىمىزعا تالداۋ جاساپ، تەك جۇمىستى ويلاۋمەن بولدىم. ءبىر جىلدىڭ ىشىندە قاتتى قاجىدىم. اللاعا سانسىز شۇكىرشىلىك ايتامىن. بۇل ەڭبەك اقتالدى.
- ءبىزدىڭ ۇلتتىق قۇرامادا كومەكشى باپكەر بولىپ ەڭبەك ەتكەن سىزدەن مۇنى سۇراماي كەتپەسە بولماس. ەكى ەلدىڭ ۇلتتىق قۇراما ساپىندا جۇمىس ىستەۋدەگى باستى ايىرماشىلىق قانداي؟
- مۇندا ماعان سپورتقا جاۋاپتى قۇزىرلى سپورت ورگاندارى، ناقتىراق ايتسام، مينيسترلىك، تاەكۆوندو فەدەراتسياسى جانە ۇلتتىق قۇرامانىڭ ءوزارا بايلانىسى، ىنتىماقتاستىق ورناتۋى قاتتى ۇنادى. ءبىر- بىرىمەن تىعىز جۇمىس ىستەيدى ەكەن. ءبىر مۇددەنى كوزدەگەندىكتەن، قويان-قولتىق جۇمىس ىستەۋ - باستى نازاردا. بىزگە ولاردان الاتىن بىرنەشە جۇمىس ۇلگىسى بار ەكەنى كورىنىپ-اق تۇر.
- پاريجدە ەل اتىنان سىنعا تۇسكەن ءبىزدىڭ اتلەتتەرگە دە كوز قىرىن سالا جۇرگەن بولارسىز. وتاندىق تاەكۆوندوشىلاردىڭ بۇل بايراقتى باسەكەدەگى ونەرى تۋرالى نە ايتا الاسىز؟
- بۇل وليمپيادادا قازاقستان نامىسىن قورعاعان ەكى تاەكۆوندوشىنىڭ ەكەۋى دە جاس. ولاردىڭ دايىندىق بارىسى جونىندە ەشتەڭە ايتا المايمىن. سەبەبى باسى-قاسىندا بولعان جوقپىن. الايدا جارىسقا شىعۋىن، بوز كىلەمدەگى ونەرىن باقىلاپ وتىرىپ، ماعان ەكەۋى جاس بولعاسىن ولارعا حالىقارالىق تاجىريبە جەتىسپەگەن سەكىلدى كورىندى. پاريجگە وليمپيادا، الەم چەمپيوندارى سەكىلدى كىل مىقتىلار جينالعان. ولاردىڭ تاجىريبەسى قارسىلاستارىنىڭ دەڭگەيىنە جەتىڭكىرەمەدى دەپ ويلايمىن. دەگەنمەن ناليتىن ەشتەڭە جوق. ەكەۋى دە جاس سپورتشى. الداعى ۋاقىتتا قاتەلىكتەرمەن جۇمىس ىستەپ، اناليز جاساسا، تالاي بايراقتى باسەكەدە ۇلكەن ناتيجە كورسەتىپ ۇلگەرەدى-اق.
جالپى، بۇل وليمپيادادا بابى مەن باعى قاتار شاۋىپ، التىن، كۇمىس جانە قولا جۇلدە سالعان سپورتشىلارىمىز ءۇشىن قاتتى قۋاندىم. باپكەرلەر راسىمەن ءوز سپورتىنىڭ كىل مىقتىلارىن الىپ كەلگەن. ال جولى بولماي، جەڭىلگەندەردى جەردەن الىپ، جەرگە سالا بەرۋدىڭ قاجەتى جوق. تاعى دا قايتالاپ ايتامىن، وليمپياداعا سايدىڭ تاسىنداي ىرىكتەلگەندەر كەلەدى.
كوپ اتلەت العاشقى اينالىمدا-اق مىقتىلارمەن كەزدەسەدى. سوندىقتان ولاردى سىناپ، مىنەۋ ورىنسىز. ايانىپ قالعان ەشكىم جوق. بالا كۇنىنەن ارمانداپ جۇرگەن جارىسىنا ەشكىم جەڭىلەمىن دەپ بارمايدى. وتباسىنان الىس ءجۇرۋ، كۇنىنە بالەنباي ساعات جاتتىعۋ، بولاتتاي ءتارتىپ جانە قاتاڭ رەجيممەن ءومىر سۇرۋگە ەكىنىڭ ءبىرى شىداس بەرمەيدى. سول سەبەپتەن ءار سپورتشىنىڭ جەڭىلگەنىن عانا ەمەس، ءجۇرىپ وتكەن جولىن دا ەسكەرۋگە ءتيىسپىز. وليمپيادادا تىركەلگەن ناتيجەگە اناليز جاساپ، دۇرىس باعدارلاما جاساقتاپ، العا قاراي ىلگەرىلەۋ كەرەك.
- العاشىندا مۇحامەد حاليل جەندۋبي قولا جۇلدە العان سوڭ وتاندىق باق ءسىز تۋرالى جازا باستادى. ال فيراستىڭ التىنىنان كەيىن اقپارات كەڭىستىگىن ءتىپتى جاۋلاپ الدىڭىز. ءوزىڭىز مۇنداي رەاكسيانى كۇتپەگەن بولارسىز؟
- قازاقستاندا مەنىڭ تۋنيسكە قىزمەتكە كەتكەنىمدى كوپ ادام بىلە بەرمەيدى. كەتەردە مۇنى جاريالاۋدىڭ سەبەبى دەپ جوق دەپ ويلادىم. دەگەنمەن وليمپيادا ويىندارىندا مۇحامەد قولا جۇلدەنى يەلەنگەن سوڭ، مەنى ارەنادا كورىپ جۇرگەن جۋرناليستەر بۇل تۋرالى جازىپ، جاڭالىقتارعا شىعارا باستادى. ال فيراس التىن العان كەزدە كوپ جۋرناليست حابارلاستى. ارينە، مۇنداي رەاكتسيانى كۇتپەدىم. ءوزىمدى كورسەتەيىن، مەنى باسقالارمەن سالىستىرسىن، ءبىر ماقتانايىن دەگەن ويدان مۇلدە اۋلاقپىن. بىلە بىلسەڭىز، مەن كامەراعا تۇسكەندى، ەلدىڭ نازارىنا ىلىككەندى ونشا جاقتىرمايمىن. مۇنىڭ ءبارى الاڭداتپاي قويمايدى. الايدا ەلدەگى جۋرناليستەردىڭ وزگە ەلدە قول جەتكىزگەن جەتىستىگىم تۋرالى جارىسا جازعانىنا قۋانباسام، ەش رەنجىمەيمىن. ەكىنشىدەن، ءبىز قازاق پەيىلى دارحان، باۋىرمال حالىقپىز عوي. بىرەۋى جەتىستىككە جەتسە، بۇكىلى توبەسى كوككە جەتپەي قۋانادى. سپورت كوممەنتاتورلارى تىلگە تيەك ەتىپ، جاريا قىلىپ جاتىر. مۇنىڭ ءبارى جۇرەكتى ەلجىرەتەدى. الەۋمەتتىك جەلىلەردەگى تولاستاعان پىكىرلەردى وقىعانىمدا ءبارىنىڭ تىلەۋشىم، قولداۋشىم ەكەنىن بايقاپ، ءبىر قۋانىپ الدىم. ءالى دە «باياندى بولسىن» دەپ جازىپ جاتىر. وسى رەتتە ەلدەگى سپورتسۇيەر قاۋىمعا ايرىقشا العىسىمدى ايتقىم كەلەدى.
- ءسىزدى «ەلگە قايتارىپ، ءوزىمىزدىڭ سپورتشىلاردان وليمپيادا جۇلدەگەرلەرىن باپتاپ شىعارسىن» دەگەندەرگە نە ايتاسىز؟
- ءيا، مۇنداي پىكىرلەردى كوزىم شالدى. البەتتە، كوك بايراعىمىزدى جەلبىرەتىپ، ەل اتىن شىعارىپ، ەلگە قالتقىسىز قىزمەت ەتسەك، ودان ۇلكەن باقىت جوق قوي! الايدا مەن العا قويعان جوسپارىمدى ءالى انىقتامادىم. سەبەبى جوعارىدا ايتىپ وتكەندەي، ءبىر جىلداعى اتقارعان جۇمىسىم وڭايعا سوققان جوق. قازىر 1 ايداي ەڭبەك دەمالىسىن الدىم. دەگەنمەن قازىردىڭ وزىندە بىرنەشە ەلدەن ۇسىنىس كەلىپ ءتۇستى. تۋنيس فەدەراتسياسى دا كەلىسىمشارتتى ۇزارتايىق دەپ جاتىر. تولەماقىنى كوبەيتىپ، جۇمىس ىستەۋ شارتىن بۇرىنعىدان بەتەر جاقسىراق قىلۋ تۋرالى ۇسىنىس ايتىلدى. دەمالىس ۋاقىتىندا قايسىسى وڭ جامباسىما كەلەتىنىن اسىقپاي قاراستىراتىن بولامىن.
- قازاقستان تاەكۆوندو فەدەراتسياسى حابارلاسىپ، تۋنيستەن دە جاقسىراق جاعداي جاسايتىنىن ايتىپ، جۇمىسقا شاقىرسا كەلىسەر مە ەدىڭىز؟ الدە شەتەلدە ءبىراز جۇمىس ىستەپ كورۋدى كوزدەيسىز بە؟
- ارينە، قازاقستان فەدەراتسياسى ۇسىنىسىن العا تارتىپ، حابارلاسىپ جاتسا، بەتپە-بەت كەزدەسىپ، اڭگىمەلەسۋگە قارسى ەمەسپىن. ءمان-جايدى كاسىبي تۇرعىدا تالقىلاپ، تولىق جوسپارى مەن جوباسىن كورسەتىپ، بارلىعى مەنىڭ جۇمىس ۇلگىمە ساي كەلىپ جاتسا، نەگە كىرىسپەسكە؟ جوعارىدا ايتىپ وتكەنىمدەي، ەلگە قىزمەت ەتكەننەن ارتىق ابىروي جوق! تۋنيستە جەتكەن جەتىستىگىمە اعايىن-تۋىس، جورا-جولداس، جۋرناليستەر قۋانىپ جاتىر. ال ەلدىڭ تۋىن وليمپ شىڭىنا كوتەرۋگە ات سالىسسام، بۇكىل ەل قۋانادى عوي. وسىلايشا، ەلدىڭ العىسىنا بولەنەمىز. ال ەلدىڭ العىسىن الۋ - ەر-جىگىت ءۇشىن بيىك مارتەبە، زور ماقتانىش.
- اڭگىمەڭىزگە راحمەت! ىسكە ءسات!
سۇحباتتاسقان
ءاليا تىلەۋجان قىزى
«تۇركىستان» گازەتى