تۇنىمەن ۇيىقتاي المادىم. بەلگىلى دەپۋتات وليمپيادادا باعى جانباعان ابيبا ءابۋجاقىنوۆاعا سىياقى بەرەتىن بولدى

استانا. قازاقپارات - پارلامەنتى ءماجىلىسىنىڭ دەپۋتاتى، رەسپۋبليكا پارتياسىنىڭ ءتوراعاسى ايداربەك حوجانازاروۆ وليمپيادادا جەڭىلىس تاپقان ابيبا ءابۋجاقىنوۆاعا سىياقى بەرەتىنىن ايتتى، - دەپ حابارلايدى Massaget.kz ءتىلشىسى.

سپورتشىنىڭ كوز جاسى كۇللى قازاق جۇرتىنا اسەر ەتتى.

«تۇنىمەن دوڭبەكشىپ ۇيىقتاي المادىم. وعان سەبەپ - ءابيبا قارىنداسىمنىڭ كوز جاسى. بۇل نامىستىڭ كوز جاسى. بۇل - تەكتىلىكتىڭ بەلگىسى. بۇل - ۇلكەن تاربيەنىڭ ۇلگىسى! قىسقاسى، ءابيبا قىزىمىزعا ءوز اتىمنان ارنايى سىياقى بەرەمىن. پاريجدە قازاقستاننىڭ ابىرويىن قورعايمىن دەپ بارىن سالدى. جاراقات السا دا قايتقان جوق. وسىنداي ەڭبەكتى باعالاۋ كەرەك. وسىنداي پاتريوتتىقتى ناسيحاتتاۋ كەرەك! قانەكي، جالعاستىرايىق، قازاقتىڭ جىگىتتەرى!» - دەپ جازدى دەپۋتات.

قازاق دزيۋدوشىسى ابيبا ءابۋجاقىنوۆا شىنايى العىسىن ءبىلدىردى.

«راقمەت، اعا»، - دەدى ول.

ەسكە سالايىق، بۇعان دەيىن ابيبا ءابۋجاقىنوۆا 48 كەلىگە دەيىنگى سالماقتا پاريج وليمپياداسىنىڭ قولا جۇلدەسىنە قول جەتكىزە الماعانى حابارلاندى. وتانداسىمىز ءۇشىنشى ورىن ءۇشىن وتكەن بەلدەسۋدە شۆەد قىزى تارا بابۋلفازعا جول بەردى.