تەڭگەنىڭ قۇلدىراۋى ۇلتتىق قوردان بالالارعا اۋدارىلاتىن اقشانى ازايتا ما

استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ تەڭگە باعامىنىڭ «ۇلتتىق قور - بالالارعا» جوباسىنا اسەرى قانداي ەكەنىن ايتتى.

«قازىر دوللاردىڭ تەڭگەگە قاتىستى باعامى قۇبىلىپ تۇر. ۇلتتىق قوردىڭ ينۆەستيتسيالىق كىرىستىلىگى دە وزگەرەتىن شىعار. وسىعان بايلانىستى بالالاردىڭ شوتىنا جىل قورىتىندىسى بويىنشا تۇسەتىن اقشانىڭ كولەمى وزگەرە مە؟» - دەپ سۇرادى جۋرناليست كەزەكتى باسپا ءسوز ءماسليحاتىندا.

ۇلتتىق بانك باسشىسى «ۇلتتىق قور - بالالارعا» جوباسىنىڭ جيناقتارى دوللارمەن ساقتالاتىندىقتان ۆاليۋتا باعامىنىڭ باعدارلاماعا اسەرى بولمايتىنىن ايتتى.

«بىرىنشىدەن، ۇلتتىق قوردىڭ كىرىستىلىگى قازىر وتە جاقسى. جارتى جىلدىڭ ىشىندە 2,3 ميلليارد دوللار تاپتى. ءدال قازىر 4,5 پايىز كىرىستىلىكپەن 3 ميلليارد دوللارعا جۋىق تابىس تاۋىپ وتىرمىز. جالپى ۇلتتىق قوردىڭ بۇكىل تاريحىن الىپ قاراساق، ورتاشا تابىستىلىعى 3 پايىزدان ءسال ارتىق. ال بيىلعى جارتى جىلدا كىرىستىلىك 4,5 پايىز شاماسىندا بولىپ تۇر. ەكىنشىدەن، «ۇلتتىق قور - بالالارعا» جوباسىنىڭ قاراجاتى دوللارمەن ساقتالىپ، دوللارمەن ينۆەستيتسيالانادى. سوندىقتان ازىرگە بىزگە ۆاليۋتا باعامىنىڭ قانداي بولاتىنىندا ايىرماشىلىق جوق. كەلەر جىلدىڭ باسىندا باعام قانداي بولاتىنىن قاراۋ كەرەك. ويتكەنى بيىلعى ينۆەستيتسيالىق كىرىستىڭ تەڭ جارتىسى بالا شوتتارىنا سول كەزدەگى تەڭگە باعامى بويىنشا تاراتىلادى. بۇل نومينالدى اۋدارىم ەكەنىن ءتۇسىنۋ كەرەك. ويتكەنى 18 گە تولماعان بالالاردىڭ شوتىنداعى اقشانى كوبەيتە ءتۇسۋ ءۇشىن باسقارا بەرەمىز. ءدال قازىر باعامنىڭ قۇبىلۋىنا ءمان بەرمەگەن بولار ەدىم. ۇكىمەت بيۋدجەتكە دوللار باعامىن 460 تەڭگە دەپ سالدى. ال ول ناقتى نارىقتا 440 تەڭگەگە دەيىن ءتۇسىپ، كەيىن 480 تەڭگەگە دەيىن كوتەرىلدى. ياعني، اۋەلى 4 پايىز تومەن كەتىپ، كەيىن 4 پايىز كوتەرىلدى. قازىر 460-470 تەڭگەنىڭ دالىزىنە بىرتىندەپ كەلە جاتىرمىز. مۇنداي قۇبىلۋعا مەن ءمان بەرمەس ەدىم»، - دەدى ول.

ۇلتتىق بانك ءتوراعاسىنىڭ پايىمىنشا، بۇل ماسەلەدە ۇزاق مەرزىمدەگى كىرىستىلىككە قاراعان دۇرىس.

«مىسالى، ءوز باسىما اتا-انا رەتىندە ۇلتتىق قوردىڭ ۇزاق مەرزىمدە دۇرىس باسقارىلعانى، ۇزاق مەرزىمدەگى كىرىستىلىگى ماڭىزدى. ال ۆاليۋتا باعامىنىڭ ءبىر ايدىڭ ىشىندە ارى-بەرى قۇبىلۋى - نارىقتىڭ زاڭدىلىعى. بۇعان بوي ۇيرەتۋ كەرەك. ويتكەنى تومەنگە قاراۋ قۇبىلۋ بولماسا، جوعارى قاراي قۇبىلۋ دا بولمايدى. ءبارىمىز بالامىز 18 گە تولعاندا جاقسى اقشا الۋ ءۇشىن كىرىستىلىك جوعارى بولعانىن قالايمىز. سوندىقتان ۆاليۋتا باعامىنا قاتتى ءمان بەرمەڭىزدەر. قالاي بولعاندا دا ءبىز ۇلتتىق قوردى دوللارمەن ساقتاپ باسقارىپ وتىرمىز. ەڭ باستىسى، تولەم جاسالعان كەزدە باعام قانداي بولعانىن قاراۋ كەرەك»، - دەدى تيمۋر سۇلەيمەنوۆ.

اۆتور
ەسىمجان ناقتىباي