تەڭگەنىڭ الىسىرەۋىنە قانداي فاكتورلار اسەر ەتىپ وتىر

 قىركۇيەكتە تەڭگە باعامى 3,4 پايىزعا السىرەدى. بۇل تۋرالى ۇكىمەت وتىرىسىندا ۇلتتىق بانك ءتوراعاسىنىڭ ورىنباسارى بەرىك شولپانقۇلوۆ ايتتى، دەپ حابارلايدى Kazinform اگەنتتىگى. 

«قىركۇيەكتە تەڭگە باعامى 3,4 پايىزعا السىرەپ، 1 دوللار ءۇشىن 474,99 تەڭگەگە دەيىن باردى. تەڭگەنىڭ السىرەۋىنە ءبىرقاتار سىرتقى جانە ىشكى فاكتورلار ىقپال ەتتى. بىرىنشىدەن، اقش دوللارى جاھاندىق دەڭگەيدە نىعايدى. ا ق ش دوللارىنىڭ يندەكسى دامىعان ەلدەردىڭ ۆاليۋتا قورجىنىنا قارسى قىركۇيەكتە 2,5 پايىزعا كۇشەيدى. ەكىنشىدەن، بيۋدجەت قاراجاتىن يگەرۋ جانە جوبالاردى ىسكە اسىرۋ تسيكلىنىڭ وسۋىنە بايلانىستى يمپورتتاۋشىلاردىڭ ماۋسىمدىق سۇرانىسى ارتتى»، - دەدى ۇب ءتوراعاسىنىڭ ورىنباسارى.

ونىڭ ايتۋىنشا، كۆازيمەملەكەتتىك سەكتوردا ەكسپورتتىق ۆاليۋتالىق ءتۇسىمدى مىندەتتى ساتۋ نورماسىنىڭ توقتاتىلۋى دا، ا ق ش فەدەرالدى رەزەرۆ جۇيەسىنىڭ قاتاڭ مونەتارلىق ساياساتى اياسىندا بازالىق ستاۆكانىڭ تومەندەۋى دە تەڭگەنىڭ السىرەۋىنە اسەر ەتتى.

«ۇلتتىق قوردان رەسپۋبليكالىق بيۋدجەتكە ترانسفەرتتى قامتاماسىز ەتۋ اياسىندا ۆاليۋتا ساتۋ تەڭگەگە قولداۋ كورسەتتى. قىركۇيەكتە 1 ميلليارد 155 ميلليون دوللار ۆاليۋتا ساتىلدى. جىل باسىنان بەرى مەملەكەتتىك باعالى قاعازدار نارىعىنا بەيرەزيدەنتتەردىڭ كاپيتال اعىنى 299 ميلليون دوللاردى قۇرادى. قىركۇيەكتە ءبىرىڭعاي جيناقتاۋشى زەينەتاقى قورىنا 200 ميلليون دوللارعا ۆاليۋتا ساتىپ الىندى. ۇلتتىق بانك ەركىن باعام بەلگىلەۋ رەجيمىن ۇستانادى جانە ۆاليۋتالىق ينتەرۆەنتسيا جۇرگىزگەن جوق»، - دەدى بەرىك شولپانقۇلوۆ.