تەننيسشىلەر مەن بوكسشىلار پاريجگە قۇرعان جوسپارىمىزدىڭ ۇدەسىنەن شىعا المادى - مينيستر

استانا. KAZINFORM - تۋريزم جانە سپورت ءمينيسترى ەربول مىرزابوسىنوۆ Jibek Joly تەلەارناسىنداعى «ۋادە» باعدارلاماسىندا بەرگەن سۇحباتىندا پاريج وليمپياداسىنداعى قازاقستاندىق سپورتشىلاردىڭ مەدال ەسەبىندە نەگە 43-ورىندا قالعانىن ءتۇسىندىردى.

«ارينە، ۇلكەن تەننيستەن جوسپارىمىز بولعان. الەمدىك ارەنادا توپ جارىپ جۇرگەن، ناتيجە كورسەتەدى دەگەن سپورتشىلارىمىز اۋىرىپ قالدى، باس تارتتى. ەكەۋى دە - رەسەيدەن كەلگەن سپورتشىلار. ودان كەيىن بوكستان نە بولعانىن كوردىڭىزدەر. بوكستان ءار وليمپيادادا التىن الاتىنبىز. بۇل جەردە دە ماسەلە بار. تورەشىلىك، باسقا دا ماسەلەلەر. بۇگىندە بوكستىڭ حالىقارالىق ارەنادا دامۋىنىڭ ءوزى ۇلكەن سۇراق بەلگىسىمەن تۇر. كەلەسى وليمپيادادا بوكس بولا ما، بولماي ما دەگەن سۇراق بار. ءبىزدىڭ التىن مەدال الامىز دەگەن جوسپارىمىز سول تەننيس پەن بوكستا بولعان»، - دەدى مينيستر.

ونىڭ ايتۋىنشا، وليمپيادالىق سيكل 4 جىل بولعانىمەن ءبىر سپورتشىنىڭ حالىقارالىق دەڭگەيدە جاقسى ناتيجە كورسەتۋىنە كەمىندە 15 جىل كەرەك.

«سپورتشىنىڭ 15 جىلدىق جاتتىعۋى مەديتسينالىق، بيولوگيالىق جاعىنان عىلىمي سۇيەمەلدەنىپ كەلگەندە عانا جاقسى ناتيجە بولادى. بۇگىنگى الەمدىك سپورتتىڭ دەڭگەيى سولاي»، - دەدى ەربول مىرزابوسىنوۆ.