ۆەتنامدىق كومپانيا Qazaq Air دى 2 ميلليارد تەڭگەگە ساتىپ الادى
استانا. KAZINFORM - كولىك ءمينيسترى مارات قارابايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا Qazaq Air اۋە كومپانياسىن ساتۋ مامىلەسىنىڭ ەگجەي-تەگجەيىن ايتتى.
«مامىر ايىندا پرەزيدەنت Qazaq Air ءدىڭ ۆەتنامدىق كومپانياعا ساتىلاتىنىن حابارلادى. ول مامىلە قاشان اياقتالادى، كوماپنياينىڭ قارىزى بار ەكەنىن ەسكەرسەك، قۇنى قانشا بولادى؟» - دەپ سۇرادى جۋرناليست.
مينيستر بۇل مامىلە كۇزدە مارەسىنە جەتەتىنىن ايتتى.
«كەلىسىمشارتتىڭ ءبىر ساتىسىنا قول قويىلدى. قىركۇيەكتىڭ اياعىنا دەيىن مامىلەنى اياقتايمىز دەپ وتىرمىز. كەلىسىمشارتتا Qazaq Air ءدىڭ بۇكىل قارىزىن وتەۋ مىندەتتەلگەن. تولەمنىڭ كەزەڭى ءالى انىقتالعان جوق. ەكىنشىدەن، ساتىپ الۋشى كومپانيانىڭ قازاقستان ىشىندە جانە سىرتىنا تاسىمال جاسايتىن 20 دان كەم ەمەس اۋە كولىگىن تىركەۋ مىندەتتەمەسى قاراستىرىلعان.
جالپى ينۆەستوردىڭ ءوزى 20 ەمەس 50 گە دەيىن اۋە كولىگىن تارتامىن دەپ وتىر. ياعني، نارىقتا تاعى ءبىر ايتارلىقتاي كۇشتى ويىنشى پايدا بولادى دەگەن ءسوز. ماسىل، SCAT كومپانياسىندا 50 گە جۋىق بورت، Air Astana-دا 54 بورت بار. سوندا نارىقتا سولارمەن شامالاس ءۇشىنشى ويىنشى بولادى. بۇل باسەكەگە، بيلەتتەردىڭ باعاسىنا وڭ اسەر ەتەتىنى ءسوزسىز»، - دەدى ول.
ۆەدومستۆو باسشىسى كەلىسسوزدى «سامۇرىق- قازىنا» قورى جۇرگىزىپ جاتقانىن ەسكە سالدى.
«كەلىسىمشارتتىڭ قۇنى بار. مەنىڭشە، 2 ميلليارد تەڭگە شاماسىندا بولدى- اۋ دەيمىن. جالعان اقپارات بولماۋ ءۇشىن قوسىمشا تەكسەرەمىز، حابارلايمىز»، - دەدى مارات قارابايەۆ.