ۆەتنامداعى كرۋيزدىك لاينەر اپاتىنان مەرت بولعاندار سانى 34 ادامعا جەتتى

فوتو: Фото: freepik.com

استانا. KAZINFORM - قۇتقارۋ قىزمەتى ۆەتنامنىڭ سولتۇستىك بولىگىندەگى وڭتۇستىك قىتاي تەڭىزى حالونگ بۇعازىنداعى تۋريستىك كەمەنىڭ اپاتقا ۇشىراۋى سالدارىنان 34 ادامنىڭ دەنەسىن تاپتى، دەپ جازادى ت ا س س.

ۆەتنام اقپارات اگەنتتىگىنىڭ حابارلاۋىنشا، ساعات 21:30 داعى ۋاقىت بويىنشا (استانا ۋاقىتىمەن 19:30) قۇتقارۋ قىزمەتى 34 ادامنىڭ دەنەسىن تاپتى، 10 ادام قۇتقارىلدى.

رەسمي اقپارات بويىنشا بورت ءنومىرى QN-7105 كرۋيزدىك كەمەسىندە 53 ادام بولعان. ولاردىڭ 48 ءى تۋريست بولسا، 5 ءى ەكيپاج مۇشەلەرى. نايزاعاي ويناپ، كۇشتى جەل تۇرۋىنىڭ سالدارىنان كەمە اۋدارىلىپ قالعان.

قايعىلى جاعداي تۋرالى حاباردى الىسىمەن كۋانگنين پروۆينتسياسىنىڭ توتەنشە جاعدايلار قىزمەتى جەدەل تۇردە ىزدەۋ-قۇتقارۋ جۇمىستارىنا كىرىستى. قۇتقارۋ جۇمىستارىن نوسەر جاۋىن مەن كۇشتى جەل جانە قاراڭعى ءتۇن قيىنداتتى.

كۋانگنين پروۆينتسياسى پورتى بيلىگىنىڭ حابارلاۋىنشا، سۋعا كەتكەن كەمەنىڭ جولاۋشىلارى حالونگكە وتباسىلارىمەن تۋريستىك ساپارمەن كەلگەن حانوي تۇرعىندارى. كەمەدە بولعان تۋريستەردىڭ ەڭ جاسى ۇلكەنى 53 تە، ەكى كىشىسى 3 جاستا بولعان.

وسىعان دەيىن ۆەتنامدا تۋريستىك قايىق سۋعا كەتىپ، ءۇش ادام قازا تاپقانى تۋرالى جازدىق.