ۆەتنامداعى ەڭ باي ايەلدەردىڭ ءبىرى ءولىم جازاسىنا كەسىلۋى مۇمكىن

استانا. قازاقپارات - ەكونوميكالىق سالادا الاياقتىق جاساعانى ءۇشىن سوتتالعان ۆەتنامداعى ەڭ باي ايەلدەردىڭ ءبىرى چىونگ مي لان اپەللياتسيالىق شاعىمدا جەڭىلدى. بۇل تۋرالى BBC حابارلادى.

ەگەر ول 9 ميلليارد دوللار جيناي الماسا، ءولىم جازاسىنا كەسىلۋى مۇمكىن. بۇل سوما ونىڭ الاياقتىق جولىمەن تاپقان قاراجاتىنىڭ 75 پايىزىنا تەڭ.

حابارعا سايكەس، 68 جاستاعى چىونگ مي لان 2011-2022-جىلدار ارالىعىندا Saigon Commercial Bank-تەن 304 تريلليون دونگ (شامامەن 12,5 ميلليارد دوللار) نەسيە العان. بۇل ۆەتنامنىڭ 2022-جىلعى ج ءى ءو- نىڭ شامامەن 3 پايىزىن قۇرايدى. مەملەكەتكە كەلتىرگەن جالپى شىعىن 27 ميلليارد دوللارعا باعالاندى.

ۆەتنام زاڭىنا سايكەس، ەكونوميكالىق قىلمىسى ءۇشىن ءولىم جازاسىنا كەسىلگەن ادامدار ۇرلانعان اقشانىڭ 75 پايىزىن قايتارسا، امان قالۋى مۇمكىن. وسىلايشا چىونگ مي لان 9 ميلليارد دوللار تولەۋى كەرەك.

ونىڭ قورعاۋشىلارى اپەللياتسيالىق شاعىمدا ءومىر بويىنا باس بوستاندىعىنان ايىرۋدى سۇرادى، ويتكەنى ءولىم جازاسى قاجەتتى سومانى ءوندىرۋدى الدەقايدا قيىنداتادى.

سوت شەشىمىنەن كەيىن چىونگ مي لان پرەزيدەنتتەن راقىمشىلىق جاساۋدى سۇراۋعا مۇمكىندىگى بار. سوت شەشىمى قاشان ورىندالاتىنى بەلگىسىز، ويتكەنى ۆەتنامداعى ءولىم جازاسىنىڭ ورىندالۋى مەملەكەتتىك قۇپيا سانالادى. ادەتتە سوتتاۋ مەن ءولىم جازاسىن ورىنداۋ اراسىندا بىرنەشە جىل وتەدى.