ۆەتنامدا «ياگي» تايفۋنىنان قازا تاپقاندار سانى 233 ادامعا جەتتى

استانا. KAZINFORM - ۆەتنامدا «ياگي» تايفۋنى قۇرباندارىنىڭ سانى ارتىپ كەلەدى. بيلىك 233 ادامنىڭ قايتىس بولعانىن راستادى. 800 ادام جاراقات الدى. تاعى 103 ادام ءىز- ءتۇزسىز جوعالعاندار تىزىمىندە، دەر حابارلايدى Euronews.

ولاردىڭ جارتىسىنا جۋىعى - لاوكاي پروۆينتسياسىنداعى قيراندى، قوقىس تاۋلارىنا اينالىپ كەتكەن لانگ نۋ كەنتىنىڭ تۇرعىندارى. وندا داۋىلدان بولعان نوسەر جاۋىن سالدارىنان جەرگىلىكتى وزەندەر ارناسىنان اسىپ، كوشكىن ورىن الدى.

ءتىرى قالعانداردى ىزدەۋگە 500 گە جۋىق قۇتقارۋشى جۇمىلدىرىلدى. ءبىراق زارداپ شەككەن ايماققا اۋىر تەحنيكانى جەتكىزۋ مۇمكىن ەمەس: جولدار جابىلعان نەمەسە شايىلعان.

«ياگي» ۆەتنامعا سەنبى كۇنى جەتتى. جەلدىڭ جىلدامدىعى ساعاتىنا 145 شاقىرىم بولدى. ول جەكسەنبىدە باسىلدى، ءبىراق بۇل كۇندەرى قاتتى نوسەر جاۋىن توقتامادى.

قازىردىڭ وزىندە ازياداعى ەڭ قۋاتتى داۋىلداردىڭ ءبىرى سانالاتىن «ياگي» فيليپپيندە دە كۇشەيىپ، قىتايدىڭ وڭتۇستىگىنە دە اسەر ەتتى. تايلاندتىڭ سولتۇستىك ايماقتارى زارداپ شەكتى، وندا جاعالاۋداعى بىرنەشە ەلدى مەكەن سۋ استىندا قالدى.

تولاسسىز جاۋعان جاڭبىردان كوشكىن بولعان چيانگراي پروۆينتسياسىندا كەم دەگەندە التى ادام قازا تاپتى. بيلىك سۋ دەڭگەيىنىڭ ءالى دە كوتەرىلىپ جاتقانىن ەسكەرتتى. ولار تۇرعىنداردان بيىك جەرگە كوشۋىن سۇرايدى.

كليماتولوگتاردىڭ پىكىرىنشە، مۇنداي توتەنشە اۋا رايى قۇبىلىستارى كليماتتىڭ ادام ارەكەتىنەن تۋىنداعان وزگەرۋىنە تىكەلەي بايلانىستى.