ۆەتنام ينۆەستورلارى الماتىدا جاڭا تۋريستىك كەشەن سالادى

استانا. KAZINFORM - قازاقستان مەن ۆەتنام اراسىنداعى تاۋار اينالىمى 860 ميلليون دوللارعا جەتتى. بۇل تۋرالى ق ر پرەمەر- ءمينيسترىنىڭ ورىنباسارى ەرمەك كوشەربايەۆ ەلوردادا قازاقستان-ۆەتنام ىسكەرلىك دوڭگەلەك ۇستەلىندە ايتتى.

− قازاقستان ءۇشىن ۆەتنام − وڭتۇستىك- شىعىس ازياداعى جەتەكشى سەرىكتەستەردىڭ ءبىرى. بىزدە ساۋدا- ەكونوميكالىق ىنتىماقتاستىقتى كەڭەيتۋگە ايتارلىقتاي الەۋەتىمىز بار. وتكەن جىلى ەلدەرىمىز اراسىنداعى تاۋار اينالىمى 860 ميلليون ا ق ش دوللارىنا جەتتى. قازاقستاندا ەكونوميكا سالاسىنىڭ ءتۇرلى باعىتتارىندا ۆەتنامدىق كاپيتالى بار 13 كومپانيا جۇمىس ىستەيدى. بۇل كورسەتكىشتەر − ەلىمىزدىڭ بيزنەس- كليماتىنا دەگەن سەنىمنىڭ ايقىن دالەلى ءارى تۇراقتى جانە ناتيجەلى ارىپتەستىكتىڭ كورسەتكىشى، − دەدى ەرمەك كوشەربايەۆ.

پرەمەر- مينيستر ورىنباسارى قازاقستان مەن ۆەتنام اراسىندا جۇزەگە اسىپ جاتقان ماڭىزدى جوبالاردى اتاپ ءوتتى.

− ولاردىڭ قاتارىندا قونايەۆ قالاسىنداعى «ارنا» يندۋستريالىق ايماعىندا ازىق- تۇلىك ونىمدەرىن وندىرۋمەن اينالىساتىن Mareven Food Holdings كومپانياسى بار. سونىمەن بىرگە، كوپفۋنكتسيونالدى تۋريستىك كەشەن جوباسىن ىسكە اسىرىپ جاتقان Crystal Bay Tourism Group كومپانياسىن دا اتاپ وتۋگە بولادى. ءبىز سىزدەرمەن بىرلەسىپ، قازاقستاندا جاڭا وندىرىستەر اشۋعا مۇددەلىمىز. ينۆەستورلارعا قولايلى جاعداي قالىپتاستىرۋ - ۇلتتىق دەڭگەيدەگى باسىمدىق سانالادى. ۇكىمەت سالىق، كەدەن جەڭىلدىكتەرىنەن باستاپ، ينفراقۇرىلىم، زاتتاي گرانتتارعا دەيىن كەڭ اۋقىمدى قولداۋ شارالارىن ۇسىنادى. ءبىز جوعارى قوسىلعان قۇنى بار جوبالارعا باعىتتالعان ۆەتنامدىق ارىپتەستەرىمىزدىڭ تالپىنىسىن تولىق قولدايمىز، − دەدى ەرمەك كوشەربايەۆ.