تۇماندى البيوندى سۋ باستى

لوندون. KAZINFORM - انگليانىڭ كەيبىر ايماقتارىندا ءبىر ايلىق جاۋىن- شاشىننىڭ مولشەرى نەبارى 24 ساعاتتا جاۋىپ، كەڭ كولەمدى سۋ تاسقىنىنا الىپ كەلدى، دەپ حابارلايدى Kazinform ءتىلشىسى.

اسىرەسە، ەلدىڭ ورتالىق جانە وڭتۇستىك ايماقتارى قاتتى زارداپ شەگىپ وتىر. وكسفورد، رەدينگ جانە بات قالالارىنداعى نوسەر جاڭبىردىڭ دەڭگەيى 120 ميلليمەترگە دەيىن جەتكەن. وزەندەر ارناسىنان شىعىپ، مەتەورولوگيالىق قىزمەت توتەنشە جاعداي جاريالادى. مەكتەپتەر جابىلىپ، حالىق ۇيلەرىنەن كوشىپ جاتىر. كولىك قوزعالىسى دا توقتادى.

«كەشە تۇندە نوسەر جاڭبىر جاۋىپ، وزەن كوتەرىلە باستادى. ءۇيىمىز سۋ استىندا قالدى. ءبىز وسىندا 2013 -جىلى كوشىپ كەلگەلى مۇنداي كەڭ كولەمدى تابيعات اپاتى بولماعان»، - دەيدى بەردفورشير گرافتىعى تۇرعىندارىنىڭ ءبىرى كيت گارۆۋد.

قورشاعان ورتانى قورعاۋ اگەنتتىگى سۋ تاسقىنى تۋرالى 100 گە جۋىق ەسكەرتۋ جاريالادى. توپان سۋ لوندونداعى ۋيمبلدون ستاديونىنا دەيىن جەتىپ، شۇڭقىر پايدا بولدى. ناتيجەسىندە كونفەدەراتسيالار كۋبوگى مەن باسقا دا ماتچتار كەيىنگە قالدىرىلدى.

لوندوننىڭ ءورت ءسوندىرۋ بريگاداسى سۋ تاسقىنىنا بايلانىستى 350 دەن استام شاقىرتۋ العانىن حابارلادى. قۇتقارۋشىلار كولىكتەرى مەن ۇيلەرىندە قامالىپ قالعان ادامداردى سىرتقا الىپ شىعىپ جاتىر.

مەتەورولوگيالىق بيۋرو ءبىر-ەكى كۇندە جاڭبىردىڭ توقتاعانىمەن الداعى ۋاقىتتا ونىڭ جاڭا قارقىنمەن قايتا باستالۋى مۇمكىن ەكەنىن ەسكەرتەدى. سولتۇستىكتەن سوققان سالقىن جەلدىڭ اسەرىنەن ۇلىبريتانياداعى اۋا تەمپەراتۋراسى ايتارلىقتاي تومەندەيدى دەگەن دە اقپارات بار.