تۇمان، كوكتايعاق، قاتتى جەل: قازگيدرومەت 8 -قاڭتارداعى اۋا رايىنا بولجام جاسادى

قازگيدرومەت ەل اۋماعىندا 8- قاڭتاردا بولاتىن قاۋىپتى مەتەورولوگيالىق قۇبىلىستارعا بولجام جاسادى، دەپ حابارلايدى Kazinform.

سينوپتيكتەردىڭ دەرەگىنە قاراعاندا، بۇرىنعىسىنشا ق ر اۋماعىندا اتموسفەرالىق فرونتتاردىڭ وتۋىمەن اۋا رايىنىڭ تۇراقسىز سيپاتى ساقتالادى.

«جاۋىن- شاشىن جاۋادى، ەلدىڭ سولتۇستىگىندە كوبىنەسە قار بۇرقاسىنمەن، وڭتۇستىگىندە، وڭتۇستىك- شىعىسىندا نەگىزىنەن جاڭبىر تۇرىندە، سولتۇستىگىندە، اقمولا وبلىسىنىڭ وڭتۇستىگىندە، تۇندە قوستاناي وبلىسىنىڭ سولتۇستىگىندە قالىڭ قار ءتۇسۋى مۇمكىن. قر بويىنشا تۇمان، كوكتايعاق، ەكپىندى جەل كۇتىلەدى»، - دەلىنگەن اقپاراتتا.

اباي وبلىسىنىڭ باسىم بولىگىندە وڭتۇستىك- شىعىستان سوعاتىن جەل وڭتۇستىك- باتىسقا اۋىسادى، وبلىستىڭ باتىسىندا، سولتۇستىگىندە، ورتالىعىندا كەي ۋاقىتتاردا كۇشى 30 م/س جانە ودان دا جوعارى جەل سوعادى دەپ كۇتىلۋدە.

كۇندىز جامبىل وبلىسىندا وڭتۇستىك- باتىستان جەل سوعادى، تاۋلى اۋداندارىندا كەي ۋاقىتتاردا كۇشى 30 م/س جانە ودان دا جوعارى بولادى.

سولتۇستىك قازاقستان وبلىسىندا وڭتۇستىك- باتىستان، باتىستان جەل سوعادى، تاڭەرتەڭ جانە كۇندىز وبلىستىڭ وڭتۇستىك- شىعىسىندا كۇشى 30 م/س جانە ودان دا جوعارى بولادى.

اقمولا وبلىسىندا وڭتۇستىك- باتىستان جەل سوعادى، كۇندىز وبلىستىڭ وڭتۇستىك- شىعىسىندا كەي ۋاقىتتاردا كۇشى 30 م/س جانە ودان دا جوعارى دەپ بولجانۋدا.

اۆتور

اسحات رايقۇل