تەلەگرامنان تاپسىرىس تۇسكەن: تارازدا ەسىرتكى كۋرەرى 10 جىلعا سوتتالدى

تاراز. KAZINFORM -جامبىل وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ەسىرتكى تاسىمالداۋمەن اينالىسقان كۋرەرگە قاتىستى قىلمىستىق ءىس قارالدى.

ايىپتالۋشى 2023 -جىلدىڭ قىركۇيەگىندە «Telegram» مەسسەندجەرى ارقىلى «ول» دەگەن بۇركەنشىك ەسىمدى ازاماتپەن تانىسىپ، تارازدىڭ اۋماعىندا ءبىر جەتكىزىلىم ءۇشىن 1 مىڭ تەڭگە الىپ، ەسىرتكى كۋرەرى رەتىندە جۇمىسقا ورنالاسقان.

سوتتالۋشى 2023 -جىلدىڭ قىركۇيەگىنەن 2024 -جىلدىڭ اقپانىنا دەيىن الدىن الا كورسەتىلگەن گەولوكاتسيالاردان پسيحوتروپتىق زاتتاردى جيناپ، ولاردى بەلگىلى ءبىر دوزالارعا ءبولىپ «Zip» پاكەتتەرىنە سالىپ، وتكىزىپ وتىرعان.

«پوليتسەيلەر ەسىرتكى جەتكىزۋشىنى 2024 -جىلدىڭ اقپانىندا تاڭەرتەڭ كەزەكتى دوزانى قويۋعا وقتالعان ۋاقىتتا ۇستادى. جەكە ءتىنتۋ كەزىندە ودان جالپى سالماعى 18,73 گرامم بولاتىن «پيرروليدين» جانە «فەنيلپەنتان» تابىلىپ، تاركىلەندى.

سوت ۇكىمىمەن ك. ەسىمدى ايىپتالۋشى ق ر قىلمىستىق كودەكسىنىڭ 297-بابى، 3- ءبولىمى، 1,3,5-تارماقتارى بويىنشا كوزدەلگەن قىلمىس جاساعانى ءۇشىن كىنالى دەپ تانىلىپ، وعان 10 جىل مەرزىمگە باس بوستاندىعىنان ايىرۋ جازاسى تاعايىندالدى»، - دەلىنگەن سوت حابارلاماسىندا.

ۇكىم زاڭدى كۇشىنە ەنگەن جوق.

بۇعان دەيىن جامبىل وبلىسىندا 5 ميلليارد تەڭگەنىڭ اكسيزدىك ونىمدەرى تاركىلەنگەنىن جازعان بولاتىنبىز.