ماتچ الدىندا «قايرات» فۋتبول كلۋبىنىڭ باس باپكەرى رافاەل ۋرازباحتين جانە كوماندا ويىنشىلارى ادىلەت سادىبەكوۆ، الەكساندر شيروبوكوۆ بريفينگ وتكىزدى. رافاەل ۋرازباحتين ماڭىزدى ويىن الدىندا كوماندانىڭ دايىندىعى تۋرالى ايتتى.
- العاشقى ويىندا كىشكەنە قوبالجۋ سەزىلدى. ءبىراق قازىر ءبىز جوعارى دەڭگەيدە 9 ماتچ وتكىزدىك. سوندىقتان جىگىتتەردە قاتتى ۋايىم بولادى دەپ ويلامايمىن. اجيوتاج بەن مۇنداي ەموتسيالارعا ۇيرەنىپ قالدى. قوسىمشا قىسىم بولمايدى، قايتا ولار ءۇشىن موتيۆاتسيا بولادى، - دەدى ول.
سونداي-اق باپكەر چەمپيوندار ليگاسىنىڭ الدىڭعى ويىندارىندا قولدانىلعان سحەماعا كۇتپەگەن وزگەرىستەر ەنگىزىلمەيتىنىن ايتتى.
- مۇنداي قارسىلاستارمەن تەك العا ۇمتىلىپ شابۋىلداي بەرۋ نەمەسە كەرىسىنشە تەك قورعانىستا جاتىپ الۋ مۇمكىن ەمەس ەكەن. مۇندا تەپە- تەڭدىك كەرەك. ولاردا جەكە شەبەرلىگى مىقتى فۋتبولشىلار كوپ، مۇنداي قارسىلاسقا قارسى ارەكەت ەتۋ وڭاي ەمەس. كەي ويىنشىلاردىڭ قيمىلىن جاۋىپ، وزىمىزگە ارتىقشىلىق تۋدىراتىن ساتتەردى ويلاستىرۋ قاجەت. ويتكەنى ءبىر- بىرگە قالىپ، قورعانىس جاساۋ قيىنعا تۇسەدى. ءبىراق ءبىز تەك قورعانىستا وتىرا بەرمەيمىز. بارلىق ماتچتا شابۋىل مەن قورعانىستى قاتار الۋعا تىرىسىپ كەلەمىز، - دەدى ول.
رافاەل ۋرازباحتين چەمپيوندار ليگاسىنىڭ 15 دۇركىن چەمپيونى قازاقستانعا كەلۋى - بۇكىل قازاقستاندىق فۋتبول ءۇشىن تاريحي وقيعا ەكەنىن اتاپ ءوتتى.
- قۋانىشتىسى، ماتچ الماتىدا وتەدى. جانكۇيەرلەر بۇرىن تەك تەلەديدار ارقىلى كورگەن الەمدىك فۋتبول جۇلدىزدارىن كوزبە-كوز كورە الادى. بۇل ويىندى ءبىز ۇلكەن ۇمىتپەن كۇتىپ وتىرمىز. سوندىقتان لايىقتى ونەر كورسەتۋگە ءتيىسپىز. قازىر قانداي ءدا بىر ناتيجە تۋرالى ايتقىم كەلمەيدى، ءبىراق ەڭ باستىسى - ساپالى ويىن كورسەتۋىمىز كەرەك، - دەدى ول.