Tiryaki Holding استانادا بيداي مەن بۇرشاق وڭدەۋگە ينۆەستيتسيا سالادى
استانا. KAZINFORM - مەملەكەت باسشىسى Tiryaki Holding كومپانياسىنىڭ اتقارۋشى ديرەكتورى سۇلەيمەن تيرياكيوعلىنى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
كەزدەسۋ بارىسىندا پرەزيدەنت قاسىم-جومارت توقايەۆ پەن Tiryaki Holding كومپانياسىنىڭ اتقارۋشى ديرەكتورى سۇلەيمەن تيرياكيوعلى اگروونەركاسىپ كەشەنى باعىتىنداعى ءوزارا ءتيىمدى جانە ۇزاقمەرزىمدى سەرىكتەستىك ماسەلەسىن تالقىلادى.
مەملەكەت باسشىسى كومپانيانىڭ استانا قالاسىنان بيداي مەن بۇرشاقتى تەرەڭ وڭدەۋ زاۋىتىن سالۋ تۋرالى شەشىمىنە قولداۋ ءبىلدىردى.
سۇلەيمەن تيرياكيوعلى اتالعان جوبا ەلىمىزدىڭ قايتا وڭدەۋ ونەركاسىبىن دامىتۋعا، زاماناۋي تەحنولوگيالاردى ەنگىزۋگە جانە جەرگىلىكتى مامانداردىڭ بىلىكتىلىگىن ارتتىرۋعا ىقپال ەتەتىنىن ايتتى.
كەزدەسۋدە قازاقستاننىڭ اۋىل شارۋاشىلىعى ونىمدەرىن تاسىمالداۋ ءۇشىن لوگيستيكانى ءتيىمدى ۇيىمداستىرۋ، قويما ينفراقۇرىلىمىن سيفرلاندىرۋ جانە ەليەۆاتورلاردى جاڭعىرتۋ ماسەلەلەرى قارالدى.
ايتا كەتەيىك، Tiryaki Holding - ءداندى، مايلى داقىلدار، جەم-ءشوپ ءوندىرۋ جانە ەكسپورتتاۋ بويىنشا الەمدەگى كوشباسشى كومپانيالاردىڭ ءبىرى.
بۇعان دەيىن قاسىم-جومارت توقايەۆ S Sistem Lojistik كومپانياسىنىڭ باسقارما ءتوراعاسى حۋسەين ءبارليندى قابىلدادى.