مۇنداي پىكىردى ق ر سيفرلىق دامۋ، يننوۆاتسيا جانە اەروعارىش ونەركاسىبى ءمينيسترى باعدات مۋسين ءبىلدىردى، دەپ حابارلايدى قازاقپارات ءتىلشىسى. ونىڭ ايتۋىنشا، ارزانشىلىق سالدارىنان بايلانىس بازالىق ستانسالارىن ورناتۋعا ينۆەستيتسيا تارتۋ پروتسەسى كۇردەلەنىپ وتىر. ولاردىڭ قۇنى 100 مىڭ دوللارعا جەتەدى. ال ولارعا قىزمەت كورسەتۋ ودان دا قىمباتقا تۇسەدى.
«ەكونوميكا تۇرعىسىنان العاندا ەگەر ءسىز بيزنەسمەن رەتىندە پايدا تابۋ ءۇشىن بازالىق ستانسا ورناتپاق بولساڭىز، وندا ول - ءتيىمسىز. ەگەر ءسىز اۋىلعا بازالىق ستانسا ورناتساڭىز، 200 ادام 2 مىڭ تەڭگەدەن تولەيدى. ول قانشا بولادى؟ بازالىق ستانسا جۇزدەگەن مىڭ دوللار بولسا، قىزمەت كورسەتۋ ودان دا قىمبات (.. .) . ەگەر ەكونوميكالىق كورسەتكىشتەرگە قاراساق، نارىق ەرەجەسىمەن جۇرسەك، وندا ولار (بايلانىس وپەراتورلارى) باعانى كوتەرۋ كەرەك. ال ءبىز ولارعا: «جوق، توقتاڭىزدار. بۇل الەۋمەتتىك ماسەلە» دەپ وتىرمىز»، - دەدى باعدات مۋسين ءماجىلىس دەپۋتاتتارى مەن بايلانىس وپەراتورلارى وكىلدەرىنە ارنالعان اشىق ەسىك كۇنىندە.
ونىڭ مالىمەتىنشە، سوڭعى 2-3 جىلدىڭ ىشىندە دەرەكتەر ترافيگى 100 پايىزعا ارتقان. بازالىق ستانسانىڭ ناقتى ءبىر وتكىزۋ قابىلەتى بار ەكەندىگىن ەسكەرەر بولساق، وندا ترافيك جىلدان- جىلعا ارتىپ كەلەدى. ال TikTok-تىڭ كەڭىنەن تانىمال بولۋىنا بايلانىستى بايلانىس ارنالارىنا جۇكتەمە دە ايتارلىقتاي ارتا تۇسكەن. سوندىقتان دا مينيسترلىك ترافيكتەردى جىكتەۋ مۇمكىندىگىن قاراستىرىپ جاتىر.
«ۆيدەوترافيككە باعا ءسال كوتەرىلۋى ءتيىس. سويلەسۋگە، WhatsApp-پەن حات الماسۋعا سوما از بولا بەرسىن. نەلىكتەن كۇنى بويى ۇيىندە TikTok پەن YouTube كورەتىندەر مەن كۇنى بويى بازاردا جۇمىس ىستەپ، بيزنەس جۇرگىزەتىندەر بىردەي 3 مىڭنان تولەۋى ءتيىس؟ وندا ولار جەكە تولەسىن. ويتكەنى ولار قوسىمشا جۇكتەمە جاساپ وتىر»، - دەدى مينيستر.