تەحنيكالىق جانە كاسىپتىك ءبىلىم بەرۋدى ترانسفورماتسيالاۋ: 20 وڭىردە IT ورتالىقتار ىسكە قوسىلادى

استانا. KAZINFORM - ستۋدەنتتەردىڭ مۇمكىندىكتەرىن كەڭەيتۋ جانە بىلىكتىلىگىن ارتتىرۋ ماقساتىندا كوللەدجدەر بازاسىندا وڭىرلىك IT ورتالىقتار قۇرىلىپ جاتىر.

بۇل ەكونوميكانىڭ سيفرلىق ترانسفورماتسياسى مەن IT ماماندارعا سۇرانىستىڭ ءوسۋى جاعدايىندا اسا وزەكتى بولىپ وتىر. بۇل تۋرالى ق ر وقۋ-اعارتۋ مينيسترلىگى ءمالىم ەتتى.

بۇگىندە پاۆلودار اقپاراتتىق تەحنولوگيالار كوللەدجىندە «IT HUB / JYLYJAI10IT» وڭىرلىك IT ورتالىعى تابىستى جۇزەگە اسىرىلۋدا، مۇندا «روبوتوتەحنيكا»، «گرافيكالىق ديزاين» جانە «3D- پروتوتيپتەۋ» باعىتتارى بويىنشا ءبىلىم بەرۋ كۋرستارى جۇرگىزىلەدى.

ورتالىقتا 3D پروتوتيپتەۋ، جەلىلىك اكىمشىلەندىرۋ، ۆەب-ديزاين، ۆيرتۋالدى جانە كەڭەيتىلگەن شىندىق زەرتحانالارىن قوسا العاندا 10 نان استام مامانداندىرىلعان زەرتحانالار بار. سونىمەن قاتار باعدارلامالىق قامتاماسىز ەتۋ، ۆەب- سايت قۇرۋ جانە وندىرىستىك پروتوتيپتەر بويىنشا اقىلى قىزمەتتەر ۇسىنىلادى. ورتالىقتا سونداي- اق ستۋدەنتتەردى WorldSkills جانە JuniorSkills چەمپيوناتتارىنا دايىندايدى.

«وڭىرلىك IT ورتالىقتار كوللەدج ستۋدەنتتەرىنە ەڭبەك نارىعىندا سۇرانىسقا يە زاماناۋي تەحنيكالىق داعدىلاردى يگەرۋگە، سونداي-اق وزىق ءبىلىم بەرۋ رەسۋرستارى مەن باعدارلامالارىنا قول جەتىمدىلىكتى قامتاماسىز ەتۋگە ىقپال ەتەدى. بۇل يننوۆاتسيالىق جوبالاردى دامىتۋ، IT كومپانيالارمەن جانە حالىقارالىق سەرىكتەستەرمەن ىنتىماقتاستىق قۇرۋ باعىتىندا قوسىمشا مۇمكىندىكتەرگە جول اشادى»، - دەپ اتاپ ءوتتى تەحنيكالىق جانە كاسىپتىك ءبىلىم دەپارتامەنتى ديرەكتورىنىڭ ورىنباسارى اقزيرا قاسىموۆا.

تاعى 20 IT- ورتالىقتىڭ اشىلۋى جوسپارلانۋدا، ونىڭ ىشىندە الماتىداداعى IT HUB Almaty Polytechnic College ءوز جۇمىسىن وسى جىلدىڭ قاراشا ايىندا باستايدى.