Tesla گەرمانيادا ۇشقىشسىز تاكسي وندىرىسىنە 3 ميلليارد ەۋرو ينۆەستيتسيا سالادى

استانا. KAZINFORM - امەريكالىق Tesla كومپانياسى گەرمانيانىڭ گريۋنحايدە قالاسىنداعى زاۋىتىن كەڭەيتۋگە 3 ميلليارد ەۋرو ينۆەستيتسيالاۋدى جوسپارلاپ وتىر. جاڭا وندىرىستىك قۋاتتار Cybercab ۇشقىشسىز تاكسيلەرىن شىعارۋعا ارنالماق، دەپ حابارلايدى BILD باسىلىمى.

Фото: BILD

اۆتوكولىك ءوندىرۋشىسىنىڭ جوسپارىنا سايكەس، براندەنبۋرگ فەدەرالدىق جەرىندە قوسىمشا وندىرىستىك كورپۋس قۇرىلىسى 2027 -جىلدىڭ ءبىرىنشى جارتىسىندا باستالادى. ال ۇشقىشسىز كولىكتەردى شىعارۋ 2029 -جىلى ىسكە قوسىلۋى مۇمكىن.

كەيىن كاسىپورىن جىلىنا 1 ميلليونعا دەيىن روبوتاكسي وندىرە الادى. ينۆەستيتسيالىق جوبا قوسالقى نىساندار سالۋدى جانە قوسىمشا تازارتۋ قۇرىلىستارىن تۇرعىزۋدى دا قامتيدى.

ءوندىرىستى كەڭەيتۋگە دايىندىق اياسىندا Tesla بىرنەشە ءجۇز ماماندى جۇمىسقا قابىلداۋدى باستادى. كومپانيانىڭ مالىمەتىنشە، سوڭعى ايلاردا زاۋىت قىزمەتكەرلەرىنىڭ قاتارىنا تاعى 2 مىڭ ادام قوسىلعان. قازاندا كاسىپورىندا شامامەن 12600 ادام جۇمىس ىستەگەن.

بۇعان دەيىن ەلەكتروموبيلدەرگە سۇرانىستىڭ تومەندەۋىنە بايلانىستى Tesla گەرمانياداعى كاسىپورنىن دامىتۋدى كەيىنگە قالدىرعان ەدى. ەندى كومپانيا كولىك ءوندىرىسىن اپتاسىنا 7500 بىرلىككە دەيىن ارتتىرىپ، اككۋمۋلياتور ەلەمەنتتەرىن شىعارۋ قۋاتىن كەڭەيتۋدى كوزدەپ وتىر.