Telegram-نىڭ جاڭا ەرەجەلەرى قازاقستانعا قالاي اسەر ەتەدى

استانا. قازاقپارات - Telegram پايدالانۋشىلارىنىڭ تەلەفوندارى مەن IP مەكەنجايلارى قاۋىپسىزدىك قىزمەتكەرلەرىنە اشىلادى.

بۇل تۋرالى ءبىر كۇن بۇرىن مەسسەندجەردىڭ نەگىزىن قالاۋشى پاۆەل دۋروۆ قۇقىق قورعاۋ ورگاندارىنىڭ رەسمي ءوتىنىشى بويىنشا حابارلادى.

بۇل اتالمىش مەسسەندجەر بايلانىس پەن اقپارات الماسۋدىڭ تانىمال پلاتفورماسى سانالاتىن قازاقستانعا قالاي اسەر ەتۋى مۇمكىن. ەڭ باستىسى، بۇل جەلىدەگى قىلمىسپەن كۇرەسۋگە كومەكتەسە مە؟ بۇل سۇراققا Jibek Joly تەلەارناسىنىڭ ءتىلشىسى تامەرلان تىلەۋبايەۆ جاۋاپ ىزدەپ كوردى.

فرانسۋزدىق Le Figaro گازەتى مەسسەندجەر الەمنىڭ ءارتۇرلى ەلدەرىنىڭ قۇقىق قورعاۋ ورگاندارىنىڭ سۇراۋلارىنا بەلسەندى جاۋاپ بەرە باستاعانىن ايتىپ، "Telegram ادىلەتتىلىكپەن ىنتىماقتاسادى" اتتى ماقالاسىن جاريالادى. باسىلىمنىڭ حابارلاۋىنشا، ول كيبەرقىلمىستاردى تەرگەۋمەن بايلانىستى. پاۆەل دۋروۆ بۇل اقپاراتتى راستاپ، بۇدان بىلاي ەرەجەلەر وزگەرەتىنىن ايتتى.

- قىلمىسكەرلەردىڭ Telegram-نىڭ ىزدەۋ فۋنكسياسىن تەرىس پايدالانۋىنا جول بەرمەۋ ءۇشىن ءبىز بۇكىل الەم بويىنشا ۇيلەسىمدىلىكتى قامتاماسىز ەتۋ ءۇشىن قىزمەت كورسەتۋ شارتتارىن جانە قۇپيالىلىق ساياساتىن جاڭارتتىق. ەرەجەنى بۇزعانداردىڭ IP مەكەنجايلارى مەن تەلەفون نومىرلەرىن زاڭدى تالاپتارعا سايكەس ءتيىستى ورگاندار جاريالاۋى مۇمكىن، - دەدى پاۆەل دۋروۆ.

Telegram بۇگىنگى تاڭدا بايلانىس ءۇشىن عانا قولدانىلمايدى. بۇل الاڭدا الاياقتار مەن تىيىم سالىنعان زاتتاردى ساتۋشىلار انونيمدى تۇردە جۇمىس ىستەيدى.

ق ر باس پروكۋراتۋراسىنىڭ مالىمەتىنشە، بيىلدىڭ وزىندە ينتەرنەت- الاياقتىق، لاڭكەستىك اكتىسى تۋرالى كورىنەۋ جالعان حابارلاۋ جانە ونى ناسيحاتتاۋ، سونداي- اق ەسىرتكى ساتۋ فاكتىلەرى بويىنشا 15 مىڭنان استام ءىس تىركەلگەن. كەيبىر قىلمىستار مەسسەندجەرلەردىڭ كولەڭكەسىندە ورىن الادى، سونىڭ ىشىندە Telegram. ازىرگە سيفرلىق دامۋ مينيسترلىگى مەن كۇش قۇرىلىمدارى جەكە دەسترۋكتيۆتى تەلەگرام ارناسىن بۇعاتتاي الادى. ءبىراق ۆەدومستۆولار رەسمي قۇپيانى العا تارتىپ، ەندى ونىڭ يەسىن ىزدەيتىن- ىزدەمەيتىنىن ايتپايدى. قازاقستان شەنەۋنىكتەرى دە بۇل ماسەلەلەر بويىنشا مەسسەندجەرمەن ىنتىماقتاسا ما، جوق پا دەگەن سۇراققا جاۋاپ بەرە المادى.

- Telegram-مەن ارنايى كەلىسىمدەر جوق. ق ر زاڭناماسىنا سايكەس، مۇنداي ۇلكەن پلاتفورمالاردا ادامداردىڭ جەكە دەرەكتەرىن وڭدەۋگە جانە ساقتاۋعا بولمايدى. قازاقستاندىقتار ءجيى قولداناتىن Telegram وتاندىق ءونىم بولماعاندىقتان، وندا دەرەكتەر ساقتالماۋى كەرەك. بۇل ءبىزدىڭ اقپاراتتىق قاۋىپسىزدىك جونىندەگى ۋاكىلەتتى ورگاننىڭ ۇسىنىسى، - دەيدى ق ر تسدياوم اقپاراتتىق قاۋىپسىزدىك كوميتەتى ءتوراعاسىنىڭ ورىنباسارى ءۇمىتجان ارىقبەكوۆا.

Telegram-نىڭ جاڭا ساياساتى قىلمىسكەرلەردى قورقىتۋى كەرەك. ءبىراق بۇل زاڭعا باعىناتىن قولدانۋشىلاردى انونيمدى بولۋى كەرەك بولعان مەسسەندجەردەن ۇركىتىپ الماي ما؟

- مەسسەندجەردىڭ يەسى شيفرلەۋ كىلتىن بيلىككە بەرەدى. تەحنيكالىق تۇرعىدان بۇل تەك كۇدىكتى حات الماسۋدى نەمەسە ۇلتتىق قاۋىپسىزدىككە قاتەر توندىرەتىن حات الماسۋدى اجىراتپايدى. ول نە ءبارىن جەتكىزەدى، نە ەشتەڭە جەتكىزە المايدى. تيىسىنشە، بارلىق حات- حابارلار بيلىككە قولجەتىمدى بولادى، - دەپ اتاپ ءوتتى اقپاراتتىق تەحنولوگيالار جانە كيبەرقاۋىپسىزدىك سالاسىنداعى ساراپشى باتىرجان شاقمانوۆ.

مەسسەندجەر ۆەب- سايتىنداعى «Telegram-نىڭ قۇپيالىلىق ساياساتى» بولىمىندە جاڭا 8.3 «قۇقىق قورعاۋ ورگاندارى» تارماعى پايدا بولدى. وندا جەكە دەرەكتەردى مەملەكەتكە بەرۋ مەحانيزمى قالاي جۇمىس ىستەيتىنى ناقتى تۇسىندىرىلەدى.

- ءاربىر قولدانۋشى Telegram نەمەسە WhatsApp قولدانبالارىن پايدالانار الدىنداعى تىركەلۋ كەزىندە كەلىسەتىن نەمەسە كەلىسپەيتىن قۇپيالىلىق ساياساتى تۋرالى ەسكەرتۋگە تاپ بولادى. بۇل قۇپيالىلىق ساياساتىندا جەكە دەرەكتەردى تاراتۋعا، ياعني ءۇشىنشى تۇلعالارعا بەرۋگە بولاتىن شارتتار دا كورسەتىلگەن، - دەيدى زاڭگەر ازيزا مۇقاشيەۆا.

ساراپشىلاردىڭ پىكىرىنشە، Telegram-نىڭ قۇپيالىلىق شارتتارىن وزگەرتۋگە 24 تامىزدا پاريجدىڭ لە- بۋرجە اۋەجايىندا پاۆەل دۋروۆتىڭ بالالارعا قارسى قىلمىسقا، ەسىرتكى ساۋداسىنا جانە الاياقتىققا قاتىسى بار دەگەن ايىپپەن ۇستالۋى سەبەپ بولۋى مۇمكىن.

وندا Telegram كومانداسى پلاتفورمانى قيانات جاسادى دەپ ايىپتاۋ ابسۋرد ەكەنىن مالىمدەگەن بولاتىن. Telegram جەلىسىنىڭ نەگىزىن قالاۋشى پاۆەل دۋروۆتىڭ اعاسىنا دا فرانسيادا ىزدەۋ جاريالاندى.

قازىر دۋروۆ سوتتىڭ قاداعالاۋىمەن بوساتىلدى. دەگەنمەن، وعان فرانتسيا اۋماعىنان شىعۋعا تىيىم سالىندى جانە 5 ميلليون ەۋرو كولەمىندە كەپىل تولەۋى كەرەك.

كەيىن دۋروۆ ءوزىنىڭ ۇستالعانى تۋرالى العاش رەت تۇسىنىك بەردى.

سونىمەن قاتار، ول ر ف مەن ب ا ءا- ءنىڭ ديپلوماتيالىق كومەگىنەن باس تارتتى.

بۇعان دەيىن Telegram فرانسۋز قۇقىق قورعاۋ ورگاندارىمەن ىنتىماقتاستىقتى باستاعانى حابارلانعان بولاتىن.