Telegram پاۆەل دۋروۆتىڭ ۇستالۋىنا بايلانىستى مالىمدەمە جاسادى
استانا. قازاقپارات - Telegram مەسسەنجەرىنىڭ رەسمي اككاۋنتى كومپانيانىڭ نەگىزىن قالاۋشى پاۆەل دۋروۆتىڭ فرانسيادا ۇستالۋىنا قاتىستى العاش رەت تۇسىنىكتەمە بەردى.
«Telegram ەۋروپا وداعىنىڭ زاڭدارىن، سونىڭ ىشىندە سيفرلىق قىزمەتتەر تۋرالى زاڭدى قاتاڭ ساقتايدى - ونىڭ مودەراتسياسى سالالىق ستاندارتتارعا سايكەس كەلەدى جانە ۇنەمى جەتىلدىرىلىپ وتىرادى. Telegram باسشىسى پاۆەل دۋروۆتىڭ ەلدەن جاسىراتىن ەشتەڭەسى جوق جانە ول ەۋروپادا ءجيى ساياحاتتايدى. پلاتفورمانى تەرىس ماقساتتا پايدالانعاندار ءۇشىن وسى جەلى نەمەسە ونىڭ يەسى جاۋاپتى دەۋ - ابسۋرد»، - دەلىنگەن رەسمي پاراقشادا.
كومپانيا مالىمەتىنشە، دۇنيە جۇزىندە ميللياردقا جۋىق قولدانۋشى Telegram-دى بايلانىس قۇرالى جانە ومىرلىك ماڭىزدى اقپارات كوزى رەتىندە پايدالانادى.
«ءبىز بۇل جاعدايدىڭ تەزىرەك شەشىلۋىن كۇتەمىز. Telegram وزدەرىڭىزبەن بىرگە» دەيدى كومپانيا.
فرانسيا پروكۋراتۋراسى بۇل ءىس جايلى 26 -تامىز، دۇيسەنبى كۇنى جان-جاقتى اقپارات بەرىلەتىنىن مالىمدەدى.
ەسكە سالا كەتەيىك، رەسەيدەن شىققان ميللياردەر، Telegram نەگىزىن قالاۋشى پاۆەل دۋروۆ كەشە پاريج ماڭىنداعى لە-بۋرجە اۋەجايىندا ۇستالدى. ونىڭ جانىندا قۇربىسى جانە وققاعارى بولعان.
جەرگىلىكتى تەلەارنانىڭ مالىمەتىنشە، بۇعان دەيىن دۋروۆ فرانسيادا ىزدەۋ جاريالانعان ادامدار تىزىمىندە بولعان.
كەيبىر ب ا ق تاعىلعان ايىپتار بويىنشا ول 20 جىلعا دەيىن سوتتالۋى مۇمكىن دەگەن بولجام ايتىپ وتىر.
پاۆەل دۋروۆ - 2021 -جىلدان بەرى فرانسيا ازاماتى. دەگەنمەن سوڭعى جىلدارى نەگىزىنەن بىرىككەن اراب امىرلىكتەرىندە تۇرىپ كەلدى.