تايتوبە اۋىلىندا ساقتىق شارالارى بارىنشا كۇشەيتىلدى - اۋىل اكىمى
تايتوبە. KAZINFORM - اقمولا وبلىسىنا قاراستى قوسشى قالاسى، تايتوبە اۋىلىنىڭ ىرگەسىن سۋ باسىپ قالدى. نۇرا وزەنىنىڭ ارناسىنان اسقان سۋ اۋىل ىرگەسىنەن جوڭكىلە اعىپ جاتىر.
الايدا اۋىل اكىمى پاراسات دوسماعانبەتوۆ جەرگىلىكتى تۇرعىندارعا اسا ءقاۋىپ ءتونىپ تۇرماعانىن ايتىپ بەردى.
«2020-جىلى اۋىلىمىزدى سۋدان قورعاۋ ءۇشىن 700 مەتر جەرگە بوگەت تۇرعىزعان ەدىك. ول جىلدارى ءدال وسىنداي مول سۋ كەلمەگەن. بيىل مىنە، وزدەرىڭىز كورگەندەي، وتە كوپ سۋ كەلدى. قازىر سول بوگەتتى بيىكتەتىپ، سۋدىڭ اۋىلعا كىرۋىنە قارسى ۇلكەن جۇمىستار اتقارىلىپ جاتىر. قاۋىپسىزدىك شارالارىن بارىنشا كۇشەيتىلگەن رەجيمگە كوشىردىك»، - دەدى دوسماعانبەتوۆ.
سونىمەن قاتار بۇگىن اۋىل اكىمى تايتوبە اۋىلىنا اقمولا وبلىسىنىڭ اكىمى مارات احمەتجانوۆتىڭ دا ارنايى كەلگەنىن، استانا قالاسى مەن قوسشى قالالىق اكىمدىكتەرى ارنايى تەحنيكالاردى كومەككە جىبەرگەنىن اتاپ ءوتتى.
«بۇگىن استانا اكىمدىگى 37 كاماز، 2 ەكسكاۆاتور، 7 جۇك سالاتىن تەحنيكانى كومەككە جىبەردى. سونىمەن قاتار قوسشى قالاسىنىڭ اكىمدىگى دە بار تەحنيكالارىن اياپ جاتقان جوق. جالپى، 50 گە جۋىق تەحنيكا اۋىلدىڭ قاۋىپسىزدىگى ءۇشىن جۇمىس ىستەپ جاتىر. اۋىلداعى بەلسەندى ازاماتتار دا قولدارىنان كەلگەن كومەكتى بەرىپ جاتىر. ولار تەحنيكا جۇرگىزۋشىلەرىنە، ت ج د وكىلدەرىنە، ەرىكتى تۇردە بىزگە كومەكتەسىپ جاتقان ازماتتارعا ۇيىنەن ءشاي، ىستىق تاماقتارىن اكەلىپ، ءتىپتى، سۋ جاعاسىندا اۋزى بەرىك كىسىلەرگە اۋىزاشار بەرىپ جاتقان تۇرعىندارىمىز دا جەتەرلىك. بارلىعى اۋىل ءۇشىن قولدارىنان كەلگەنىن ىستەپ جاتىر. جەرگىلىكتى پوليتسيا دا قاۋىپسىزدىك شارالارىن قاتاڭ باقىلاۋدا»، - دەدى اۋىل اكىمى پاراسات مۋسابەك ۇلى.
سونداي-اق، ول ءدال قازىر اۋىلعا اسا ءقاۋىپ ءتونىپ تۇرماعانىن، اۋىل تۇرعىندارىنا ۇرەيگە بوي الدىرماۋعا، جالعان اقپاراتتارعا سەنبەۋگە شاقىردى.
«كەيبىر كىسىلەر الەۋمەتتىك جەلىگە جالعان ۆيدەولار جاريالاپ، جۇرتتى ۇرەيلەندىرۋدە. بۇل دۇرىس ەمەس. شىنايى اقپارات كوزدەرىنە سەنىڭىزدەر، ۇرەيگە بوي الدىرماڭىزدار. بارلىق ساقتىق شارالارىن كۇشەيتتىك. ءدال قازىر اۋىلعا اسا قاتتى قاۋىپ ءتونىپ تۇرعان جوق. دەسە دە ءبارىمىز ساق بولۋىمىز كەرەك»، - دەدى اكىم.
اۆتوركۇنسۇلتان وتارباي