جاس قازاق جىگىتىنىڭ ۇلى بريتانيا استاناسى لوندونداعى بەدەلدى اۋدانداردىڭ ءبىرى - St. James اۋدانىنىڭ مەرى بولىپ سايلانۋى الەۋمەتتىك جەلىدە قىزۋ تالقىلانىپ، قازاقستاندىقتاردى قۋانتتى.
نەبارى 33 جاستاعى سانجاردىڭ بۇل جەتىستىگى كوپشىلىك ءۇشىن ۇلكەن ماقتانىشقا اينالدى. ويتكەنى ول الەمدەگى ەڭ ىقپالدى قالالاردىڭ بىرىندە قوعامدىق باسقارۋ ىسىنە ارالاسىپ، جەرگىلىكتى بيلىك قۇرىلىمىندا ماڭىزدى قىزمەت اتقارماق.
St. James - لوندوننىڭ تاريحي ءارى بەدەلدى اۋدانى
St. James اۋدانى لوندوننىڭ ورتالىعىندا ورنالاسقان، تاريحي ماڭىزى جوعارى ايماقتاردىڭ ءبىرى سانالادى. بۇل جەردە ۇلىبريتانيانىڭ ساياسي، مادەني جانە ىسكەرلىك ەليتاسى شوعىرلانعان. اۋداننىڭ ەرەكشەلىگى-كورولدىك سارايلارعا، ۇكىمەتتىك مەكەمەلەرگە جانە ايگىلى كلۋبتار مەن تاريحي عيماراتتارعا جاقىن ورنالاسۋىندا.
سانجار ابىشيەۆ كونسەرۆاتيۆتى پارتيا وكىلى رەتىندە، باس باسەكەلەس لەيبوريستەردەن 350 داۋىسقا وزىپ شىعىپ، اۋداننىڭ مەرى اتاندى. جالپى داۋىس بەرۋگە 2,3 مىڭ ادام قاتىسقان.
قۋانىشتى جاڭالىقتى الەۋمەتتىك جەلىدە تانىمال قازاقستاندىق كاسىپكەر، Kusto Group كومپانياسىنىڭ تەڭ قۇرىلتايشىسى قانات كوپبايەۆ ءبولىستى.
قازاق وتباسىنان شىققان، بريتان ەليتاسىندا تۋىسى دا، بايلانىسى دا جوق جىگىت ءبىلىمنىڭ، ءتارتىپتىڭ جانە كوپجىلدىق ەڭبەكتىڭ ارقاسىندا لوندوننىڭ بەدەلدى اۋدانىنىڭ مەرى اتاندى. بۇل ونىڭ ۇلكەن جولىنىڭ باستاماسى عانا دەپ سەنەمىن، - دەپ اتاپ ءوتتى قانات كوپبايەۆ.
وسىنداي ماڭىزدى ايماقتىڭ ءمەرى اتانۋ - ۇلكەن جاۋاپكەرشىلىك پەن سەنىمنىڭ بەلگىسى.
سانجار ابىشيەۆ كىم؟
سانجار ابىشيەۆ - قازاقستاندىق كاسىپكەر ازات ابىشيەۆتىڭ ۇلى. ول ءبىلىمىن ۇلى بريتانيادا الىپ، لوندونداعى بەدەلدى وقۋ ورىندارىنىڭ بىرىندە وقىعان.
الدىمەن سانجار ايگىلى Malvern College مەكتەبىن ءتامامداعان. بۇل وقۋ ورنى ۇلى بريتانياداعى ەڭ تانىمال جەكەمەنشىك كوللەدجدەردىڭ ءبىرى رەتىندە بەلگىلى. مۇندا كەزىندە ساياساتكەرلەر، عالىمدار، قوعام قايراتكەرلەرى مەن بيزنەس وكىلدەرى ءبىلىم العان.
كوللەدجدەن كەيىن ول جوعارى وقۋ ورنىن اياقتاپ، قوعامدىق جانە اكىمشىلىك قىزمەتكە بەت بۇرعان. 2016-جىلدان بەرى ءوزىنىڭ Blue Swallow Group ماركەتينگ اگەنتتىگىن باسقارادى. كومپانيا الەمدىك ءىرى برەندتەرمەن جۇمىس ىستەيدى. 2015-جىلى الەۋمەتتىك جوبالاردى قولداۋعا باعىتتالعان ۇيىم قۇرعان. جاس ساياساتكەردىڭ جەرگىلىكتى باسقارۋ جۇيەسىندەگى بەلسەندىلىگى مەن باستامالارى ونىڭ Westminster City Council قۇرامىنا ەنۋىنە جول اشتى.
Westminster City Council قۇرامىنداعى قىزمەتى
Westminster City Council-لوندوننىڭ ورتالىق بولىگىن باسقاراتىن نەگىزگى اتقارۋشى ورگانداردىڭ ءبىرى. بۇل قۇرىلىم قالاداعى ينفراقۇرىلىم، تۇرعىن ءۇي، كولىك، مادەنيەت، ەكولوگيا جانە قوعامدىق قاۋىپسىزدىك ماسەلەلەرىمەن اينالىسادى.
سانجار ابىشيەۆ - كونسەرۆاتيۆتىك پارتيانىڭ بەلسەندى مۇشەسى. 2024-جىلى سەنت- دجەيمس پارتيالىق وكرۋگىنىڭ ءتوراعاسى قىزمەتىنە تاعايىندالعان. ال 2022 -جىلدان باستاپ قوعامدىق جۇمىستارعا بەلسەندى ارالاسىپ، تۇرعىندارمەن كەزدەسۋلەر وتكىزىپ كەلگەن. وسى ورگان قۇرامىنا ەنۋى ونىڭ بريتان قوعامىنداعى بەلسەندى ازاماتتىق ۇستانىمىن كورسەتەدى. سونىمەن قاتار بۇل-قازاق جاستارىنىڭ حالىقارالىق دەڭگەيدە دە باسەكەگە قابىلەتتى ەكەنىن دالەلدەيتىن وقيعالاردىڭ ءبىرى.
ازات ابىشيەۆ كىم؟
سانجاردىڭ اكەسى ازات ابىشيەۆ -كاسىپكەرلىك سالاسىندا تانىلعان ازاماتتاردىڭ ءبىرى. ول قازاقستانداعى بيزنەس ورتاسىندا بەلگىلى تۇلعا رەتىندە اتالادى. الەۋمەتتىك جەلى قولدانۋشىلارى سانجاردىڭ جەتىستىگىن ونىڭ وتباسىنىڭ ءبىلىم مەن تاربيەگە ەرەكشە كوڭىل بولۋىمەن دە بايلانىستىرىپ جاتىر.
الەۋمەتتىك جەلىدەگى رەاكسيا
سانجار ابىشيەۆتىڭ مەر بولىپ سايلانعانى تۋرالى اقپارات تاراعاننان كەيىن الەۋمەتتىك جەلىدە كوپتەگەن جىلى پىكىرلەر جازىلدى.
جەلى قولدانۋشىلار:
قازاق جاستارى الەمدى مويىنداتىپ ءجۇر،
شەتەلدە ءجۇرىپ ەلدىڭ اتىن شىعارۋ - ۇلكەن مارتەبە،
وسىنداي جاستار كوبەيە بەرسىن، - دەگەن تىلەكتەرىن ءبىلدىردى.
سانجار ابىشيەۆتىڭ جەتىستىگى - تەك جەكە جەڭىس ەمەس، ول قازاق جاستارىنىڭ ءبىلىم ارقىلى الەمدىك دەڭگەيدە بيىك ورىندارعا جەتە الاتىنىن كورسەتەتىن مىسال. شەتەلدە ءبىلىم الىپ، حالىقارالىق ورتادا ءوز ورنىن تابۋ بۇگىندە جاڭا بۋىن ءۇشىن ماڭىزدى باعىتتاردىڭ بىرىنە اينالىپ وتىر. لوندونداعى تاريحي اۋداننىڭ مەرى اتانعان قازاق جىگىتىنىڭ وقيعاسى كوپتەگەن جاسقا موتيۆاتسيا بەرەرى ءسوزسىز.
امانگۇل تىلەي قىزى
el.kz