تايلاندتا قازاقستاندىقتار مىنگەن ياحتا جارىلىپ كەتتى
استانا. KAZINFORM - تايلاندتىڭ پحۋكەت ارالىندا تۋريستەر مىنگەن ياحتادان ءورت شىعىپ، التى ادام، ونىڭ ىشىندە ءۇش تۋريست زارداپ شەكتى.
جەرگىلىكتى Khaosod اقپارات پورتالىنىڭ حابارلاۋىنشا، ياحتادا 33 رەسەيلىك جانە قازاقستاندىق تۋريست، ءبىر ەكسكۋرسيا جەتەكشىسى جانە ءۇش ەكيپاج مۇشەسى بولعان.
پحۋكەت ايماقتىق ايلاق كەڭسەسى جەرگىلىكتى ۋاقىت بويىنشا 1-ءساۋىر كۇنى ساعات 9:00 شاماسىندا «Thanamarine 555» اتتى ياحتادا ءورت تۋرالى حابارلاما العان.
اقپاراتقا سايكەس، ياحتا كاپيتانى قوزعالتقىش اقاۋلارىنا تاپ بولىپ، كومەك جىبەرۋدى حابارلاعان سوڭ جوندەۋ جۇمىستارىن جۇرگىزىپ جاتقان. وسى كەزدە كەنەتتەن ءورت شىعىپ، جارىلىس بولعان.
جارىلىس سالدارىنان ءۇش ەكيپاج مۇشەسى جانە ءۇش تۋريست جاراقات العان. جەدەل جاردەم قىزمەتكەرلەرى زارداپ شەككەندەردى جەرگىلىكتى اۋرۋحاناعا جەتكىزدى.
پحۋكەت ايماقتىق ايلاق كەڭسەسى وقيعا ورنىنا تەرگەۋ جانە كومەك كورسەتۋ ءۇشىن پورت پاترۋلدىك قايىعىن جىبەرگەن.
تايلاند تۋريزم جانە سپورت ءمينيسترى سۋانگ تيەنحونگ تۋريستتىك پوليتسيا بيۋروسى مەن ءتيىستى جەرگىلىكتى مەكەمەلەرگە قاۋىپسىزدىككە، ساياحاتتى ۇيىمداستىرۋعا جانە زارداپ شەككەندەرگە مۇقيات مەديتسينالىق كومەك كورسەتۋگە نازار اۋدارا وتىرىپ، تۋريستەرگە تولىق كومەك كورسەتۋدى تاپسىردى.
وسىعان دەيىن مالايزيادا گاز قۇبىرىنداعى جارىلىستان 112 ادام زارداپ شەككەنىن جازدىق.