تايلاند شەتەلدىك تۋريستەرگە ارنالعان جاڭا الىمدى ەنگىزۋدى كەيىنگە قالدىردى

استانا. KAZINFORM - تايلاندتىڭ تۋريزم جانە سپورت مينيسترلىگى شەتەلدىك تۋريستەردەن الىناتىن جاڭا الىمدى ەنگىزۋ مەرزىمىن كەيىنگە شەگەردى. بۇل تۋرالى The Nation باسىلىمى حابارلادى.

بۇعان دەيىن شەتەلدىك تۋريستەرگە ارنالعان الىمدى 2025 -جىلى ەنگىزۋ جوسپارلانعان بولاتىن. الايدا، مينيسترلىكتىڭ اسسيستەنتى چاكراپول تانسۋتيتحامنىڭ مالىمدەۋىنشە، تۋريزم جانە سپورت ءمينيسترى سوراۆونگ تحيەنتحونگ قازىرگى جاعدايدى تۇراقسىز دەپ ەسەپتەپ، باستامانى كەيىنگە قالدىرۋ تۋرالى شەشىم قابىلداعان.

- بىزگە وسى جىلدىڭ ءتورتىنشى توقسانىنداعى ءتۋريزمنىڭ جوعارى ماۋسىمىندا حالىقارالىق تۋريستىك سۇرانىستى كۇتىپ، باعالاۋ قاجەت. سونىمەن قاتار، مينيسترلىك الىم قۇرىلىمىن ناقتىلاۋ ءۇشىن ءالى دە قوسىمشا تالداۋ جۇرگىزەدى. اسىرەسە، شەكارادان كىرۋ تاسىلدەرىنە قاراي - قۇرلىق، تەڭىز نەمەسە اۋە ارقىلى، - دەدى چاكراپول تانسۋتيتحام.

جوسپار بويىنشا، الىم كولەمى:

اۋە كولىگىمەن كەلەتىندەر ءۇشىن — 300 بات (شامامەن 4900 تەڭگە)،

قۇرلىق نەمەسە تەڭىز جولىمەن وتەتىندەر ءۇشىن — 150 بات (شامامەن 2450 تەڭگە) بولادى.

جينالعان قاراجات تۋريستىك ينفراقۇرىلىمدى دامىتۋعا جانە شەتەلدىك قوناقتار ءۇشىن ساقتاندىرۋ شىعىندارىن وتەۋگە باعىتتالادى.

ايتا كەتەيىك، تايلاند پرەمەر- ءمينيسترى ەتيكالىق داۋدان كەيىن قىزمەتىنەن ۋاقىتشا شەتتەتىلدى.