ۆيزا قۇنى قانشا بولادى؟
قازىرگى ۋاقىتتا Visa on Arrival شەتەلدىكتەر ءۇشىن 500 مىڭ رۋپيا (شامامەن 13 مىڭ تەڭگە) تۇرادى. يندونەزيا يمميگراتسيالىق قىزمەتىنىڭ باس ديرەكتورى حەنداراسام مارانتوكو ءتاريفتى قايتا قاراۋ جوسپارى رۋپيا باعامىنىڭ قۇبىلۋىنا دا بايلانىستى ەكەنىن مالىمدەدى.
«ءبىزدىڭ Visa on Arrival نەبارى 500 مىڭ رۋپيا (شامامەن 13 مىڭ تەڭگە) تۇرادى. باعامنىڭ قۇبىلۋىن ەسكەرسەك، بۇل وتە از سوما دەپ سانايمىز. سوندىقتان بىزگە ءتيىستى وزگەرىستەر ەنگىزۋ قاجەت»، - دەدى حەنداراسام دجاكارتادا وتكەن باسپا ءسوز بريفينگىندە.
جاڭا تاريفتى 750 مىڭنان 1 ميلليون رۋپياعا دەيىنگى ارالىقتا بەلگىلەۋ جوسپارلانعان - بۇل شامامەن 19,5- 26 مىڭ تەڭگە.
بۇل رەتتە قۇنى تۋريستىڭ ۆيزانى ناقتى قاشان رەسىمدەيتىنىنە بايلانىستى بولادى:
750 مىڭ رۋپيا - ەگەر ەلەكتروندى ۆيزا الدىن الا رەسىمدەلسە؛
1 ميلليون رۋپيا - ەگەر ۆيزا يندونەزياعا كەلگەن بويدا الىنسا.
تاريف نە ءۇشىن وزگەرتىلەدى؟
يمميگراتسيالىق قىزمەتتەگىلەر بۇل جەردە ماسەلە تەك بيۋدجەتتىڭ قوسىمشا كىرىسىندە عانا ەمەس ەكەنىن ءتۇسىندىردى.
اۋەجايدا ۆيزا رەسىمدەۋ قۇنىنىڭ جوعارى بولۋى ساياحاتشىلاردى ەلەكتروندى رۇقساتتى الدىن الا الۋعا ىنتالاندىرۋى ءتيىس. بۇل، ءوز كەزەگىندە، ۇشىپ كەلگەننەن كەيىن ۆيزاعا ءبىر مەزەتتە جۇگىنەتىن ادامدار سانىن ازايتۋعا مۇمكىندىك بەرەدى.
حەنداراسامنىڭ ايتۋىنشا، بۇل اسىرەسە ءىرى اۋەجايلار، سونىڭ ىشىندە سۋكارنو-حاتتا حالىقارالىق اۋەجايى ءۇشىن وتە ماڭىزدى.
ەگەر تۋريست ۆيزانى الدىن الا رەسىمدەمەسە، ۇشىپ كەلگەننەن كەيىن وعان كوبىرەك تولەۋ ۇسىنىلادى.
«ەگەر ولار تالاپتاردى ساقتاماسا نەمەسە كەلگەنگە دەيىن ۆيزا رەسىمدەمەسە، ولار 1 ميلليون تولەيدى - بۇل ءسال قىمباتىراق»، - دەدى يمميگراتسيالىق قىزمەت باسشىسى.
ول باستى ماقسات تەك مەملەكەتتىك تۇسىمدەردى ارتتىرۋ ەمەس ەكەنىن اتاپ ءوتتى. ولاردىڭ پىكىرىنشە، ۆيزالاردى الدىن الا رەسىمدەۋ يمميگراتسيالىق قىزمەتتەرگە تۇسەتىن جۇكتەمەنى تيىمدىرەك بولۋگە جانە كەزەكتەردى ازايتۋعا مۇمكىندىك بەرەدى.
وزگەرىستەردىڭ قاجەتتىلىگى يمميگراتسيالىق قىزمەتتىڭ جۇمىس كولەمىنىڭ ارتۋىمەن دە تۇسىندىرىلەدى. 2026 -جىلدىڭ قاڭتار- شىلدە ايلارىندا يندونەزيادا 4879160 ەلەكتروندى ۆيزا رەسىمدەلگەن.
وسى كەزەڭدە كەلۋ بويىنشا 4323319 ەلەكتروندى ۆيزا (e-VOA) بەرىلدى. سونىمەن قاتار 53347 شەكتەۋلى بولۋ رۇقساتى (Itas)، 440807 قوناق ۆيزاسى (ITK)، 131 التىن ۆيزا، ۆيزاسىز رەجيم اياسىندا 61687 رۇقسات جانە 53 Global Citizen of Indonesia رۇقساتى رەسىمدەلدى.
سونىمەن قاتار بولۋعا رۇقسات الۋشىلار سانى دا ايتارلىقتاي وسكەن.
2026 -جىلدىڭ العاشقى جەتى ايىندا يندونەزيادا 5082786 ۋاقىتشا بولۋ رۇقساتى (ITK) بەرىلدى - بۇل وتكەن جىلدىڭ سايكەس كەزەڭىمەن سالىستىرعاندا 24,7 پايىزعا ارتىق. ول كەزدە مۇنداي رۇقساتتاردىڭ 4075486 سى رەسىمدەلگەن بولاتىن.
شەكتەۋلى بولۋ رۇقساتتارىنىڭ (ITAS) سانى 26,4 پايىزعا – 115252 دەن 145761 گە دەيىن ءوستى.
قاڭتار- شىلدە ايلارىندا 4120 تۇراقتى بولۋ رۇقساتى (ITAP) بەرىلدى، بۇل وتكەن جىلعى 2830 كورسەتكىشىنەن 45,5 پايىزعا جوعارى.