تاياۋ شىعىستاعى قاقتىعىس: قازاقستان ازاماتتارىن ەۆاكۋاتسيالاۋى مۇمكىن بە

استانا. KAZINFORM - سىرتقى ىستەر مينيسترلىگى تاياۋ شىعىس احۋالعا بايلانىستى قازاقستان ازاماتتارىن ەۆاكۋاتسيالاۋعا قاتىستى تۇسىنىك بەردى.

«قازاقستان ازاماتتارىن ەۆاكۋاتسيالاۋ ماسەلەسى پىسىقتالىپ جاتىر جانە ول سىرتقى ىستەر مينيسترلىگىنىڭ ەرەكشە باقىلاۋىندا. وتانداستارىمىزدى قيىن جاعدايدا قالدىرمايمىز، قازاقستان رەسپۋبليكاسىنىڭ شەتەلدەگى ءاربىر ازاماتىنا قامقور بولۋ - سىرتقى ساياسي ۆەدومستۆونىڭ نەگىزگى مىندەتى»، - دەپ مالىمدەدى ۆەدومستۆونىڭ رەسمي وكىلى ايبەك سمادياروۆ باسپا ءسوز ءماسليحاتىندا.

رەسمي وكىلدىڭ ايتۋىنشا، قازىر مينيسترلىك ۋاكىلەتتى ورگاندارمەن بىرلەسىپ رەپاترياتسيالىق رەيستەردى ۇيىمداستىرۋ بويىنشا احۋالعا مونيتورينگ جۇرگىزىپ وتىر.

«بۇگىندە يزرايلدىڭ حالىقارالىق اۋەجايى شتاتتىق رەجيمدە جۇمىس ىستەپ تۇر. ال يراندا بارلىق رەيس 3-قازانعا (تاڭعا دەيىن) دەيىن توقتاتىلدى. 1- قازانعا دەيىن ليۆانداعى 100-دەن استام شەتەل ەلشىلىكتەرى ءوز ازاماتتارىن ەۆاكۋاتسيالاعان جوق. ونىڭ ۇستىنە ليۆان بيلىگى تاراپىنان ءتيىستى بۇيرىق بولعان جوق»، - دەپ تولىقتىردى ا. سمادياروۆ.

بۇعان دەيىن حابارلاعانىمىزداي تاياۋ شىعىستاعى شيەلەنىسكە قاتىستى ق ر سىرتقى ىستەر مينيسترلىگى ۇندەۋ جاسادى.

سونداي- اق، ەلىمىزدىڭ يزرايل، يران جانە ليۆانداعى ديپلوماتتارى كۇشەيتىلگەن جۇمىس رەجيمىنە كوشكەنىن حابارلادىق.

ايتا كەتەيىك، سىرتقى ىستەر مينيسترلىگىنىڭ مالىمەتىنشە، تاياۋ شىعىستاعى قاقتىعىستان زارداپ شەككەن قازاقستان ازاماتتارى جوق.

اۆتور

داۋلەت ىزتىلەۋ