تاياۋ شىعىستاعى العاشقى ديسنەيلەند قالاي سالىنادى
استانا. KAZINFORM - بولاشاق ساياباق Disney تاريحىنداعى ەڭ وزىق تەحنولوگيالى ساياباق بولماقشى.
Walt Disney Co. كومپانياسى تاياۋ شىعىس ايماعىنداعى العاشقى ديسنەيلەند ساياباعىن ابۋ-دابيدە سالۋ جوسپارىن جاريالادى. جاڭا نىسان بىرىككەن اراب امىرلىكتەرىنىڭ استاناسىنداعى ياس ارالىنداعى تۋريستىك كەشەننىڭ ءبىر بولىگىنە اينالادى.
جوبا ديسنەيدىڭ دۇنيە جۇزىندەگى جەتىنشى كۋرورتى جانە 2016-جىلى شاڭحاي ديسنەي كۋرورتى اشىلعاننان بەرگى العاشقى جاڭا ساياباق بولادى. ديسنەيلەند ابۋ-ءدابيدىڭ قازىردىڭ وزىندە ويىن-ساۋىق پەن تۋريزم ورتالىعى سانالاتىن، Ferrari World ،Warner Bros World جانە SeaWorld سياقتى ساياباقتارى بار ياس ارالىندا ورنالاسادى.
ديسنەيدىڭ تاقىرىپتىق ساياباقتارىنىڭ باسشىسى دجوش د'امارو الداعى ساياباق كومپانيا تاريحىنداعى ەڭ وزىق تەحنولوگيالى ساياباق بولاتىنىن ايتتى. جوبالاۋ شامامەن ەكى جىلعا، ال قۇرىلىسى بەس-التى جىلعا سوزىلادى.
ديسنەيدىڭ باس ديرەكتورى بوب ايگەردىڭ ايتۋىنشا، ساۋلەت كونتسەپتسياسى تانىمال ديسنەي ەستەتيكاسىن ب ا ءا مادەني ەرەكشەلىكتەرىمەن ۇيلەستىرەدى. ماقسات - «شىنايى ديسنەي جانە ناقتى ەميراتتىق» كۋرورت قۇرۋ.
جوبانىڭ قارجىلىق جاعى جاريالانبادى. د'امارو اتاپ وتكەندەي، ساياباق اۋقىمىنىڭ كەڭدىگى سونشالىق، وعان كومپانيانىڭ بارلىق نەگىزگى فرانشيزالارىنىڭ بارلىق كونتەنتىن قوسۋعا بولادى. جوبا فلوريدادا جاڭا كەشەن اشۋعا دايىندالىپ جاتقان جانە ۇلى بريتانيادا ساياباق قۇرىلىسىن جاريالاعان Universal Studios-پەن باسەكەلەستىكتىڭ كۇشەيۋى اياسىندا جۇزەگە اسىرىلىپ وتىر.
ديسنەي كومپانياسى ءقازىردىڭ وزىندە ايماقتا ۇسىنىلعان: ب ا ءا- دە برەندتىڭ رەسمي دۇكەندەرى جۇمىس ىستەيدى. سونىمەن قاتار كومپانيا جەرگىلىكتى رەتتەۋ سالاسىندا قيىندىقتارعا تاپ بولدى.
اتاپ ايتقاندا، 2022-جىلى ۋولت ديسنەي مەن پيكساردىڭ بىرلەسكەن تۋىندىسى «Buzz Lightyear» مۋلتفيلمىن ءبىر جىنىستى جۇپ بەينەلەنگەن كورىنىسكە بايلانىستى امىرلىكتەردە كورسەتۋگە تىيىم سالىندى. ديسنەي وكىلدەرى كومپانيانىڭ ءوز قۇندىلىقتارى مەن ستاندارتتارىن ساقتاي وتىرىپ، جەرگىلىكتى زاڭدى قۇرمەتتەيتىنىن اتاپ ءوتتى.
ساۋىردە تۋريزم جانە سپورت ۆيتسە-ءمينيسترى ەرجان ەركىنبايەۆ استانادا «ديسنەيلەند انالوگى» اشىلاتىنىن حابارلادى.