ونىڭ سوزىنشە، 2026 -جىلعى 1-قىركۇيەكتەگى جاعداي بويىنشا قازاقستان حالقىنىڭ 64 پايىزدان استامى قالالاردا تۇرادى.
- مەملەكەت باسشىسى جولداۋىندا قالالاردى ەكونوميكانىڭ، تەحنولوگيالار مەن ادامي كاپيتالدىڭ ورتالىقتارى رەتىندە ايقىندادى. الايدا جان-جاقتى تالداۋ ۋربانيزاتسيا ۇدەرىسىنىڭ بىركەلكى جۇرمەيتىنىن، رەتسىزدىك پەن تەڭگەرىمسىزدىككە جول بەرىلىپ وتىرعانىن كورسەتەدى. ەلىمىزدەگى 90 قالانىڭ الەۋەتى بىركەلكى ەمەس. استانا، الماتى جانە شىمكەنت قالالارىندا بۇكىل قالا حالقىنىڭ 37 پايىزدان استامى شوعىرلانعان. مۇنداي تەڭگەرىمسىزدىك ءبىرقاتار كۇردەلى ماسەلەگە اكەپ سوعۋدا، - دەدى دەپۋتات.
ول جەكە تۇرعىن ءۇي قۇرىلىسى رەتسىز جۇرگىزىلگەن اۋقىمدى اۋماقتاردا جول، كارىز جۇيەسى مەن جارىقتاندىرۋ سياقتى نەگىزگى ينفراقۇرىلىم جوق ەكەنىن اتاپ ءوتتى.
سونىمەن قاتار، قالا ماڭىنداعى ەلدى مەكەندەردەگى ناقتى حالىق سانى مەن تىركەلگەن تۇرعىندار سانىنىڭ ايىرماشىلىعى كوممۋنالدىق جەلىلەرگە، كولىك جۇيەسىنە جانە الەۋمەتتىك نىساندارعا تۇسەتىن جۇكتەمەنى ارتتىرىپ وتىر.
ودان بولەك، تۇرعىن ءۇي قۇرىلىسى جاڭا جۇمىس ورىندارىن اشۋمەن قاتار جۇزەگە اسپايدى. تۇرعىن ۇيگە جاقىن جەردە جۇمىس ورىندارى مەن قاجەتتى قىزمەتتەردىڭ بولماۋى ادامداردى كۇن سايىن بىرنەشە ساعاتىن جولعا جۇمساۋعا ءماجبۇر ەتەدى. بۇل ءومىر ساپاسىن تومەندەتەدى.
- جوعارى جالاقى تولەنەتىن جۇمىس ورىندارىنىڭ تاپشىلىعى، ينفراقۇرىلىمنىڭ توزۋى، ساپالى ءبىلىم بەرۋ، مەديتسينالىق قىزمەت پەن دەمالىس ورىندارىنىڭ جەتىسپەۋى حالىقتىڭ باسقا جاققا كوشۋىنە تۇرتكى بولىپ وتىر. سونىڭ سالدارىنان وڭىرلەر بىلىكتى كادرلاردان ايىرىلىپ، ينۆەستورلار ءۇشىن تارتىمدىلىعىن جوعالتادى. قازاقستانداعى ۋربانيزاتسيا ۇدەرىسى ۇكىمەت پەن اكىمدىكتەردىڭ ۇيلەسىمدى جۇمىسىن قاجەت ەتەدى، - دەدى يۋليا كۋچينسكايا.
اتالعان ماسەلەلەردى شەشۋ ءۇشىن ول اتقارىلۋى ءتيىس ناقتى ۇسىنىستارىن جەتكىزدى:
· كەشەندى قۇرىلىس سالۋدى باقىلاۋ: تۇرعىن ۇيلەرگە قونىستاندىرۋدى ينجەنەرلىك جەلىلەردى، جولدار مەن الەۋمەتتىك نىسانداردى كەزەڭ-كەزەڭىمەن پايدالانۋعا بەرۋ كەستەسىمەن قاتاڭ بايلانىستىرۋ قاجەت.
· مەگاپوليستەردى ورتالىقسىزداندىرۋ: جاڭا مەملەكەتتىك مەكەمەلەردى، جوعارى وقۋ ورىندارى مەن اۋرۋحانالاردى قالالاردىڭ شەتكى اۋداندارى مەن قالا ماڭىنا ورنالاستىرۋ كەرەك. بۇل بالاما جۇمىس ورىندارىن اشۋعا جانە قالا ورتالىعىنا تۇسەتىن جۇكتەمەنى ازايتۋعا مۇمكىندىك بەرەدى.
· قالالارعا اۋديت جۇرگىزۋ: ەلىمىزدەگى بارلىق قالانىڭ ينفراقۇرىلىمدىق جانە ەكونوميكالىق الەۋەتىنە كەشەندى تالداۋ جۇرگىزىپ، ەكونوميكالىق ماماندانۋىن ەسكەرە وتىرىپ، ولاردى دامىتۋ جوسپارلارىن وزەكتەندىرۋ ماڭىزدى.
· اگلومەراتسيالاردى قارجىلاندىرۋ: مەگاپوليستەر مەن ولارعا ىرگەلەس وبلىستار اراسىنداعى بيۋدجەتارالىق قاتىناستاردى وڭتايلاندىرىپ، ورتاق ينفراقۇرىلىمعا جۇمسالاتىن شىعىنداردى ءادىل ءبولۋ تەتىگىن قالىپتاستىرۋ قاجەت.
· ءبىرىڭعاي كولىك قاتىناسىن قالىپتاستىرۋ: ناقتى جولاۋشىلار اعىنىنا سايكەس «قالا - قالا ماڭى» باعىتتارى بويىنشا ۇزدىكسىز قاتىنايتىن مارشرۋتتار ازىرلەپ، جىلدام جۇرەتىن قالا ماڭى ەلەكتر پويىزدارىن ىسكە قوسۋ وزەكتى ماسەلە؛
· الەۋمەتتىك نىسانداردى تۇگەندەۋ: مەكتەپتەر، كىتاپحانالار مەن مادەنيەت ۇيلەرىنىڭ عيماراتتارىن جەرگىلىكتى جەرلەردە بالالار سەكتسيالارى مەن وتباسىلىق دەمالىستى ۇيىمداستىرۋ ءۇشىن پايدالانۋعا مۇمكىندىك بەرەتىن تەتىكتەردى كەڭەيتۋ كەرەك؛
· «حالىق قاتىساتىن بيۋدجەت» جوباسىن كەڭەيتۋ: جوبانىڭ اۋقىمىن جەرگىلىكتى قوعامداستىقتاردىڭ مادەني باستامالارىن قامتۋ ەسەبىنەن ۇلعايتىپ، قاراجاتتى ەڭ الدىمەن قاجەتتىلىگى جوعارى اۋداندارعا باعىتتاعان ءجون؛
· ۋربانيزاتسيا رەيتينگىن ەنگىزۋ: قالالاردى وڭىرلىك ستاندارتتار جۇيەسى، كولىك قاتىناسىنىڭ قولجەتىمدىلىگى جانە ازاماتتاردىڭ قوعامدىق ومىرگە قاتىسۋ دەڭگەيى بويىنشا باعالايتىن كەشەندى رەيتينگ ازىرلەۋ ماڭىزدى.
سونىمەن قاتار، دەپۋتات ەلىمىزدەگى ۋرباندالۋ ۇدەرىستەرىن عىلىمي تۇرعىدان سۇيەمەلدەۋ بويىنشا جۇيەلى جۇمىس جۇرگىزۋدى ۇسىندى.