- بالانىڭ بالاباقشاداعى قاۋىپسىزدىگى كەزدەيسوق ساقتالىپ قالعان بەينەجازباعا نەمەسە بالانىڭ بولعان وقيعانى ەرەسەكتەرگە ايتىپ جەتكىزە الۋىنا بايلانىستى بولماۋى ءتيىس، - دەدى ول.
سونىمەن قاتار، بيىل قازان ايىندا استانا قالاسىندا تۇزەتۋ باعىتىنداعى بالاباقشانىڭ ەكى تاربيەلەنۋشىسىنە قاتىگەزدىك كورسەتىلگەنىن ەسكە سالدى. دەپۋتاتتىڭ سوزىنشە، بۇعان دەيىن وسىنداي جاعدايلار اقتوبە، شىمكەنت، تەمىرتاۋ جانە پاۆلودار قالالارىندا دا قوعامنىڭ نازارىن اۋدارعان بولاتىن.
- بيىلعى قازان ايىندا جامبىل وبلىسىنىڭ قورداي اۋدانىندا دا الاڭداتارلىق وقيعا ورىن الدى. كوپتەگەن جاعدايدا بولعان جايتتى انىقتاۋعا ءدال وسى بەينەباقىلاۋ كامەرالارىنىڭ جازبالارى كومەكتەستى. مۇنىڭ ءوزى اتا-اناسىنىڭ جانىندا بولماعان كەزدە بالالاردىڭ قاۋىپسىزدىگى قانشالىقتى سەنىمدى قورعالعان دەگەن ماڭىزدى سۇراقتى تۋىنداتادى. اسىرەسە ەرەكشە ءبىلىم بەرۋ قاجەتتىلىكتەرى بار بالالاردىڭ جاعدايى ەرەكشە الاڭداۋشىلىق تۋعىزادى. ءاربىر بالا وزىنە نە بولعانىن ءتۇسىندىرىپ ايتا المايدى نەمەسە كومەك سۇراي المايدى. سوندىقتان بالالاردى قورعاۋدىڭ ناقتى ءارى ءتيىمدى جۇيەسى قاجەت. قۇرىلتايدا «قازاقستان بالالارى» دەپۋتاتتىق توبىنىڭ جۇمىسى باستالعانى جاريالاندى، - دەدى ول.
تاتتىگۇل تالايەۆانىڭ پايىمىنشا، بالالار قۇقىعىن قورعاۋ «زاڭ مەن ءتارتىپ» قاعيداتىمەن تىعىز بايلانىستى. ويتكەنى زاڭ ەڭ الدىمەن ءوزىن-ءوزى قورعاي المايتىن جانداردى قورعاۋى ءتيىس.
- 2019 -جىلعى 23-قاڭتارداعى ىشكى ىستەر مينيسترلىگى مەن ءبىلىم جانە عىلىم مينيسترلىگىنىڭ № 49 جانە № 32-بىرلەسكەن بۇيرىعىمەن بەكىتىلگەن بەينەباقىلاۋ ستاندارتتارى، ەڭ الدىمەن، وبەكتىلەردىڭ قاۋىپسىزدىگىن قامتاماسىز ەتۋگە باعىتتالعان. الايدا توپتىق بولمەلەر، ويىن بولمەلەرى مەن تۇزەتۋ جۇمىستارىنا ارنالعان كابينەتتەر بەينەباقىلاۋ ورناتىلۋى مىندەتتى ءۇي-جايلاردىڭ ناقتى تىزبەسىنە تىكەلەي ەنگىزىلمەگەن. بەينەجازبالار كەمىندە 30 تاۋلىك ساقتالادى. سونىمەن قاتار قولدانىستاعى ستاندارتتاردا جەكەمەنشىك مەكتەپكە دەيىنگى ۇيىمدارعا قاتىستى وسىنداي ءبىرىڭعاي تالاپتار بەلگىلەنبەگەن، - دەپ سىنعا الدى دەپۋتات.
ول وقۋ-اعارتۋ مينيسترلىگى مەن ىشكى ىستەر مينيسترلىگىنە ماسەلەنى شەشۋدىڭ جولدارىن دا ۇسىندى:
ءبىرىنشى، بەينەباقىلاۋدىڭ نەگىزگى ماقساتى رەتىندە بالالاردىڭ قۇقىعى مەن قاۋىپسىزدىگىن قورعاۋدى بەكىتۋ. بالالاردىڭ جەكە ومىرىنە قول سۇعىلماۋ قۇقىعىن ەسكەرە وتىرىپ، مەملەكەتتىك جانە جەكەمەنشىك بالاباقشالاردا بەينەباقىلاۋ ورناتىلۋى مىندەتتى ءۇي-جايلاردىڭ تولىق ءارى ناقتى تىزبەسىن بەلگىلەۋ. كامەرالاردى وزگە ءۇي-جايلارعا ورناتۋدى ۇيىم باسشىسىنىڭ ءوز قالاۋىنا قالدىراتىن 7-تارماقتىڭ 4) تارماقشاسىن الىپ تاستاۋ؛
ەكىنشى، بەينەجازبا جۇرگىزۋگە جول بەرىلمەيتىن ءۇي-جايلاردا، الدىن الا قۇقىقتىق باعالاۋ جۇرگىزۋ، بالالاردىڭ جەكە ومىرىنە قول سۇعىلماۋ قۇقىعىن ساقتاۋ، جازبالاردى قورعاۋ جانە ولارعا قول جەتكىزۋدى قاتاڭ شەكتەۋ شارتتارىن ەسكەرە وتىرىپ، تاۋلىك بويى، اپتاسىنا 7 كۇن ۇزدىكسىز اۋديوفيكساتسيا جۇرگىزۋدى مىندەتتى تۇردە قاراستىرۋ؛
ءۇشىنشى، بەينەجازبالاردى ساقتاۋدىڭ ەڭ تومەنگى مەرزىمىن 30 تاۋلىكتەن 90 تاۋلىككە دەيىن ۇزارتۋ. اتا-انالاردىڭ وتىنىشتەرى بويىنشا بەينەجازبالاردى ۇسىنۋ ءتارتىبىن، ولاردى قاراۋ مەرزىمدەرىن، وزگە بالالاردىڭ دەربەس دەرەكتەرىن قورعاۋ تەتىكتەرىن جانە بەينەجازبالار ارحيۆىنىڭ ساقتالۋىنا ۇيىم باسشىلارىنىڭ جاۋاپكەرشىلىگىن بەلگىلەۋ.
- اتا-انالار بالاسىن بالاباقشاعا تاپسىرا وتىرىپ، ونى قاۋىپسىز ورتاعا قالدىراتىنىنا تولىق سەنىمدى بولۋى ءتيىس، - دەپ تۇيىندەدى دەپۋتات.