تاسقىننان زارداپ شەككەندەرگە 5767 پاتەر ساتىپ الىنعان

استانا. KAZINFORM - پرەمەر-ءمينيستردىڭ ورىنباسارى قانات بوزىمبايەۆ ۇكىمەت وتىرىسىندا تاسقىن سالدارىنان جالعىز باسپاناسىنان ايىرىلعان حالىققا قانداي كومەك كورسەتىلگەنىن باياندادى.

«جالعىز باسپانا بولىپ ەسەپتەلگەن 17,6 مىڭعا جۋىق ءۇي مەن ساياجاي قۇرىلىستارى سۋ استىندا قالدى. تاۋەلسىز باعالاۋ كومپانيالارى مەن كوميسسيالاردىڭ جۇرگىزگەن زەرتتەۋى نەگىزىندە 9156 ءۇيدى جوندەۋگە بولاتىنىن انىقتاپ، ال 8447 ءۇي اپاتتى دەپ تانىلدى.

جالعىز باسپاناسى اپاتتى بولىپ تانىلعان تۇرعىن ءۇي يەلەرىنە كومەك كورسەتۋ ءۇشىن، مەملەكەت باسشىسى ولارعا جاڭا تۇرعىن ءۇي بەرۋ تۋرالى شەشىم قابىلدادى.

بۇل اۋقىمدى جۇمىس بۇرىن-سوڭدى بولماعان قىسقا مەرزىمدە جۇرگىزىلدى. 3,5 ايدا تيپتىك جوبالار بويىنشا 2576 ءۇي سالىندى جانە قايتالاما نارىقتا 5767 ءۇي مەن پاتەر ساتىپ الىندى. سونىمەن قاتار، 9156 ءۇي جوندەلدى»، - دەدى ۆيتسە-پرەمەر.

قانات بوزىمبايەۆ بۇل جۇمىستار اتىراۋ، اقتوبە، قوستاناي جانە سولتۇستىك قازاقستان وبلىستارىندا تولىق اياقتالعانىن اتاپ ءوتتى.

«بۇگىنگى تاڭدا اقمولا وبلىسىندا 38 ءۇي، باتىس قازاقستان وبلىسىندا 28 ءۇيدىڭ قۇرىلىسى اياقتالۋدا. اياقتاۋ مەرزىمى ءبىرىنشى قازان.

سونداي-اق، باتىس قازاقستان وبلىسىندا سىرىم اۋدانىندا جەراستى سۋى قايتا كوتەرىلۋى سالدارىنان 38 ساماننان سالىنعان ۇيلەر اپاتتى جاعدايعا ۇشىرادى. بۇل فاكت تامىز ايىنىڭ سوڭىندا انىقتالدى. وسىعان بايلانىستى جاڭادان ءۇي سالۋ شەشىم قابىلداندى. قۇرىلىستىڭ اياقتالۋ مەرزىمى - 15 -قازان.

وسى وبلىستاردىڭ اكىمدەرىنە كورسەتىلگەن مەرزىمدەردە قۇرىلىستى اياقتاۋ تۋرالى ءتيىستى تاپسىرما بەرۋدى سۇرايمىن»، - دەدى قانات بوزىمبايەۆ.

اۆتور

ەسىمجان ناقتىباي