تاسقىندا باسپاناسىنا سۋ كىرگەن اقتوبەلىكتەر ۇيىنە ورالىپ جاتىر
اقتوبە. KAZINFORM - سۋ تاسقىنى كەزىندە اقتوبەدە 595 ءۇي جارامسىز بولىپ قالدى. كوبى قوبدا مەن ويىل اۋداندارىندا. ال اقتوبە قالاسىنداعى تۇرعىندار سۋ قايتقان سوڭ ۇيىنە ورالىپ، كەيبىرى وتەماقىسىن الىپ ۇلگەردى.
اقتوبە قالاسىنىڭ الماتى جانە استانا اۋداندارىندا سۋ كىرگەن ۇيلەر سانى ءارتۇرلى. قازىر استانا اۋدانى بويىنشا تەحنيكالىق تەكسەرۋ مەن باعالاۋ جۇمىسى اياقتالدى.
«استانا اۋدانى بويىنشا 41 ءوتىنىش قابىلداندى. بارىنە تەحنيكالىق زەرتتەۋ جۇرگىزىلىپ، باعالاۋ قورىتىندىسى شىعارىلدى. قازىرگى كەزدە ماتەريالدىق كومەك سۇراعان 30 ءۇي يەسىنە اقشا اۋداردىق. وزگەسىنە دە اۋدارىلادى. ءبىرىنىڭ ءۇيىنىڭ كىرەبەرىسىنە سۋ كىرسە، ەكىنشىسىندە تۇگەل جايلاعان. سايكەسىنشە شىعىندى وتەۋ اقىسى دا ءارتۇرلى. سونىمەن بىرگە ولار ءبىر جولعى كومەك بەرىلدى»، - دەدى استانا اۋدانى اكىمىنىڭ ورىنباسارى جاقسات تولەگەنوۆ.
اقتوبە قالاسى استانا اۋدانى بويىنشا قۇلاعان، اپاتتى ءۇي جوق. قازىر 5 وتباسى ەۆاكۋاتسيالىق پۋنكتتە جاتىر، وزگەسى ۇيىنە ورالدى. ال ۇيىنە ورالعاندار قۇرىلىس قامىنا كىرىسكەن.
«2021 -جىلى سالىپ الىپ، 2022 -جىلدان بەرى تۇرىپ جاتىرمىز. 2023 -جىلى سۋعا كىرىپ، جوندەپ الدىم. بيىل 27-28-ناۋرىز، 2-ساۋىردە سۋ كىردى. ءبىرجولعا تولەم الدىم، ماتەريالدىق وتەماقى الدىم. قازىر سەمەنت، اعاشتى الىپ، قۇرىلىستى باستايمىز. بىزگە 15 كۇندە بارلىق شىعىن تولەندى. بۇل ۇيدە بارلىعى 10 ادام تۇرامىز. 7 بالام بار. ۇيگە جوندەۋ جاسايمىن. وعان دەيىن بالالار جاتاقحانادا تۇرادى»، - دەدى قالا تۇرعىنى سىرىم بەكەمبايەۆ.
اقتوبە قالاسى الماتى اۋدانى بويىنشا 3 مىڭعا جۋىق ادام باسپاناسىنا سۋ كىرگەنىن ايتىپ، ءوتىنىش جازعان. ءقازىر مۇندا بىرنەشە تەحنيكالىق تەكسەرۋشى جۇمىس ىستەپ ءجۇر.
«ءۇيدىڭ نەدەن سالىنعانىن، قۇرىلىس ماتەريالدارىنىڭ قانداي كۇيدە ەكەنىن تەكسەرەمىز. ىرگەتاسىنان باستاپ، شاتىرىنا دەيىن قارايمىز. ارلەۋ جۇمىستارى دا نازاردان تىس قالمايدى. سونىمەن بىرگە ەدەن جابىندىسىن دا تەكسەرەمىز. ءبىز قۇجاتىمىزدى باعالاۋشى كومپانياعا بەرەمىز. ولار شىعىن كولەمىن ەسەپتەيدى»، - دەدى تەحنيكالىق باعالاۋشى ەرعاسىر سەگىزبايەۆ.
الماتى اۋدانى تۇرعىندارى ءۇشىن الدىن الا كەستە بەلگىلەنىپ، تەحنيكالىق تەكسەرۋشىلەردىڭ بارار كۇنى حابارلاندى. سول كەزدە ادامدار ءۇيىن اشىپ، كورسەتەدى. قازىرگى كەزدە كوپشىلىگى ەسىك، تەرەزەسىن اشىپ، سىز باسقان ۇيلەرىن كەپتىرىپ جاتىر.
«2017 -جىلى سۋ كوتەرىلگەنىمەن، ۇيىمە كىرمەدى. بيىل 28-ناۋرىز كۇنى سۋ كەلىپ، ەرىكتىلەر قۇم تولى قاپ توسەدى. كەيىن 29-ناۋرىز كۇنى قار جاۋىپ، سۋ كەتتى. كەيىن كۇن جىلىپ، قايتا كەلدى. ءبىز ءبىرىنشى قاباتتاعى تەحنيكانىڭ ءبارىن ەكىنشى قاباتقا كوتەردىك. ءبىر اپتا بويى ءۇيدى جاعالاي قۇم تولى قاپ توسەگەنىمىزبەن، سۋ كىرىپ كەتىپ تۇر. ەسىككە قۇرىلىس كوبىگىن دە قۇيدىق، ءبىراق ناتيجە بولمادى. سەبەبى اعىس قاتتى بولدى»، - دەدى قالا تۇرعىنى ساۋلەت قايىڭبايەۆا.
ول ەندى ەدەنىن قايدا سەمەنت قۇيىپ، جيھازدى، ەسىكتى اۋىستىرۋدى جوسپارلاپ وتىر. قازىر ءۇي ءىشىن كەپتىرىپ جاتىر. اقتوبە وبلىسى بويىنشا سۋ باسقان اۋدانداردا تەحنيكالىق تەكسەرۋ مەن باعالاۋشىلار جۇمىس ىستەپ جاتىر.