تاسقىن سۋدىڭ ارتى قانداي ەكولوگيالىق اپاتقا جالعاسۋى مۇمكىن
استانا. KAZINFORM -ەل وڭىرلەرىندە تاسقىن سۋدىڭ بەتى قايتىپ كەلەدى، ەندىگى جۇمىس ونىڭ سالدارىمەن كۇرەس.
وسى ورايدا ءماجىلىس دەپۋتاتى ماقسات تولىقباي تاسقىن سۋدان كەيىنگى ەكولوگيالىق قاۋىپ-قاتەرگە الاڭداۋشىلىق تانىتتى.
«مەن بۇگىن تازالىق ماسەلەسىن كوتەرگىم كەلىپ وتىر، سەبەبى، ەلگە تاسقىنمەن بىرگە ەندى توپالاڭ كەلەدى. قارعىن سۋدان قورعانۋ ءۇشىن مىڭداعان قاپ پەن پاكەتتەردەن بوگەت تۇرعىزىلدى، پوليەتيلەن كلەنكالاردى پايدالاندىق. ەندى سۋ كەتكەن سوڭ وسى كەنەپ قاپتاردى تۇگىن قالدىرماي، تۇگەل جيناپ الماساق، ەكولوگيالىق اپاتقا تاپ بولامىز. ونىڭ ۇستىنە ساي-سالادان كەلگەن سۋ قانشاما كۇل- قوقىس، قالدىق، اڭ- قۇس پەن مالدىڭ ولەكسەلەرىن اعىزىپ اكەتتى. وسى جەمتىكتەردى زالالسىزداندىرماساق، جاڭاعى مەن ايتىپ وتىرعان توپالاڭ قۇرعىر ءتۇرلى دەرت پەن اۋرۋدى تاراتۋى مۇمكىن»، - دەدى ماقسات تولىقباي ءماجىلىستىڭ جالپى وتىرىسىندا دەپۋتاتتىق ساۋال جولداپ.
سونداي- اق، حالىق قالاۋلىسى «تازا قازاقستان» تازالىق ايلىعى ايتا كەلە، «الەۋمەتتىك جەلىلەردەگى ادەمى روليكتەر ءۇشىن جاسالاتىن ءبىر رەتتىك اكسيا بولماۋى كەرەك»، دەگەن پرەزيدەنت ءسوزىن ەسكە سالدى.
«باتىس ەلدەرىن ايتپاي-اق، كورشى وزبەك اعايىنداردىڭ تازالىعىنا تاڭ قالامىز. ال مۇنداي مۇنتازداي تازالىق وزىنەن-ءوزى جاسالمايدى. تازالىقتى ءاربىر ازاماتتىڭ وزىنەن، ءوز جاۋاپكەرشىلىگىن سەزىنۋىنەن، ءتارتىپتى ساقتاۋىنان باستالادى. تازالىققا جاۋاپتى مەكەمەلەردىڭ جۇمىسىنان بولەك، تۇرعىندار كورىنگەن جەرگە قوقىس تاستاپ، كوشەلەر مەن اۋلالاردى لاستاپ كەتە بەرەتىن بولسا، ناتيجە بولمايدى»، - دەيدى ول.
مىنا الماتىنىڭ ىرگەسىندەگى «التىن وردا» بازارىنىڭ كۇل-قوقىسقا تولى ەكەنىن ايتتى.
«تەرەزەنى اشىپ تەمەكىنى لاقتىرا سالامىز، تۇكىرە سالامىز، ستاديون، كينوتەاترعا باورساق تا، ىشكەن جەگەنىمىز سول جەردە قالادى، كوككە شىقساق تا سول. ۇلتتىق پاركتەردىڭ ءبارى قوقىس. ودان قالسا، ۇيدەگى قوقىستى ساسىتىپ، پودەزگە تاستاي سالاتىن ناداندار بار. سول ءۇشىن سانانى وزگەرتۋىمىز كەرەك. تازالىقتى كادىمگى قۇندىلىق، ءتىپتى، كەرەك بولسا ءتارتىپ رەتىندە دارىپتەۋىمىز كەرەك»، - دەدى دەپۋتات.
ءسوز سوڭىندا ماقسات تولىقباي جوعارىدا اتالعان ماسەلەنى شەشۋ ءۇشىن ۇكىمەت باسشىسىنىڭ نازارىنا كەلەسى ۇسىنىستاردى العا تارتتى:
1. ۇكىمەت قوعامدا تازالىق ساقتاۋ مادەنيەتىن قالىپتاستىرۋعا ارنالعان كەشەندى باعدارلاما ازىرلەپ، ىسكە اسىرۋى كەرەك.
2. جەرگىلىكتى اتقارۋشى ورگاندار وزدەرىنە قاراستى اۋماقتاردى اباتتاندىرۋدى تۇراقتى جۇرگىزىپ، جاسىل جەلەك ەگۋمەن عانا شەكتەلمەي، ونى كۇتىپ-باپتاۋ ىسىنە دە كوڭىل ءبولۋى ءتيىس.
3. وقۋ-اعارتۋ مينيسترلىگى ورتا مەكتەپ وقۋشىلارى اراسىندا «ەكولوگيالىق سانا» اتتى اعارتۋشىلىق سىنىپ ساعاتتارىن وتكىزۋدى جولعا قويعانى ءجون.