تاسقىن سۋدان زارداپ شەككەن ايماقتارعا ەلوردادان 30 توننادان استام گۋمانيتارلىق كومەك جىبەرىلدى

 استانا. KAZINFORM - استانادان وڭىرلەرگە 30 توننادان استام گۋمانيتارلىق كومەك جىبەرىلدى. بۇل تۋرالى ۇلتتىق ۆولونتەرلەر جەلىسىنىڭ وكىلدەرى حابارلادى.

دەمالىس كۇندەرى سۋ تاسقىنىنا قارسى شارالار جۇرگىزىلىپ جاتقان وڭىرلەرگە استانادان 14 گۋمانيتارلىق كومەك گازەلى جىبەرىلدى. ەلوردا تۇرعىندارى سۋ تاسقىنىنان زارداپ شەككەندەرگە كيىم- كەشەك، ازىق- تۇلىك، جەكە گيگيەنا قۇرالدارى جانە ت. ب. جينادى. قازىرگى تاڭدا ەلوردادا 9 قويما جۇمىس ىستەپ تۇر. ءىس- شاراعا 30 ۆولونتەرلىك ۇيىم، 200 ەرىكتى قاتىستى.

ايماقتارعا كومەك جيناۋ پۋنكتتەرى دە قارقىندى رەجيمدە جۇمىس ىستەپ تۇر.

اقتوبەگە 31-ناۋرىزدا تۇركىستان وبلىسىنان گۋمانيتارلىق كومەك كەلدى. ول سول ايماقتاعى تاسقىننان زارداپ شەككەن تۇرعىندارعا تاراتىلدى.

ۆولونتەرلەر، قوعامدىق بەلسەندىلەر، ءماسليحات دەپۋتاتتارى، كاسىپكەرلەر، اتىراۋ وبلىسىنىڭ تۇرعىندارى دا شەتتە قالمادى. ءۇش كۇن ىشىندە «كۇش بىرلىكتە» اكسياسى اياسىندا ولار اقتوبە وبلىسىنىڭ تۇرعىندارى ءۇشىن 8 توننا گۋمانيتارلىق كومەك جينادى.

ەسكە سالا كەتەيىك، بۇعان دەيىن اتىراۋدان 8 توننا ازىق-تۇلىك، وزگە دە زاتتار اقتوبە وبلىسىنا جىبەرىلگەنىن جازعان بولاتىنبىز.