تاسقىن كەزىندە ەلدەگى سۋ قويمالارىنا 12 ميلليارد تەكشە مەتردەن استام سۋ جينالعان
استانا. KAZINFORM - بيىلعى سۋ تاسقىنى كەزىندە قازاقستاننىڭ سۋ قويمالارىنا 12 ميلليارد تەكشە مەتردەن استام سۋ جينالدى. جينالعان سۋ ەكونوميكا قاجەتتىلىگىنە پايدالانىلادى.
«ەلىمىزدىڭ سۋ شارۋاشىلىعى قۇرىلىستارى سۋدى قاۋىپسىز وتكىزۋدى قامتاماسىز ەتتى جانە تاسقىن سۋىن سوڭعى جىلدارى قۇرعاۋعا اينالعان ساعالارعا، كولدەرگە جانە باسقا دا سۋ ايدىندارىنا جىبەرۋگە مۇمكىندىك بەردى»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
سونداي-اق، نۇرجان نۇرجىگىتوۆ مينيسترلىك ازىرلەگەن سۋ سالاسىن دامىتۋ تۇجىرىمداماسى تاسقىن سۋدى باسقارۋ بويىنشا وزىق ەلدەردىڭ تاجىريبەلەرى زەرتتەلە وتىرىپ، تولىقتىرىلاتىنىن ايتتى.
بۇدان بولەك، تاسقىن سۋدى باسقارۋدى جانە قۇرعاقشىلىق سالدارىن ازايتۋدى كوزدەيتىن ۇزاقمەرزىمدى قۇجات ازىرلەنەدى.
سونداي-اق، ەلدىمەكەندەر ءۇشىن تاۋەكەلدەردى كورسەتەتىن تاسقىن سۋى قوزعالىسىنىڭ ەلەكتروندى كارتاسىن جانە سۋ مەن سۋ ينفراقۇرىلىمىنىڭ جاعدايى مەن مولشەرى تۋرالى اقپاراتتى قامتيتىن سۋ رەسۋرستارىن ەسەپكە الۋدىڭ، مونيتورينگىلەۋدىڭ جانە بولجاۋدىڭ ءبىرىڭعاي جۇيەسىن ازىرلەۋ جوسپارلانىپ وتىر.