تاسقىن كەزىندە ازىق-تۇلىك باعاسى قالاي قۇبىلدى

استانا. KAZINFORM - ساۋدا جانە ينتەگراتسيا مينيسترلىگى ساۋدا كوميتەتى ءتوراعاسىنىڭ ورىنباسارى ەرنۇر جاۋتىكبايەۆ ورتالىق كوممۋنيكاتسيالار قىزمەتىندە وتكەن بريفينگىندە تاسقىننىڭ سالدارى ازىق-تۇلىك باعاسىنا قالاي اسەر ەتكەنىن ايتتى.

«وتكەن اپتادا باعا يندەكسى 99,9 پايىز، ال ايدىڭ باسىنان بەرى 99,7 پايىز، سۋ تاسقىنى باستالعاننان بەرى 99,8 پايىز بولدى. ەگەر جىل باسىنداعى يندەكسپەن سالىستىرساق، 100,3 پايىز- عا جەتتى. ياعني، 0,3 پايىز ءوسىم بار.

اتىراۋدا باعانىڭ ءوسۋى 0,1+ پايىز، قوستاناي، ۇلىتاۋ، اباي جانە پاۆلودار وبلىستارىندا تۇراقتى بولسا، اقتوبە وبلىسىندا - 1,7 پايىز، اقمولا، باتىس قازاقستان وبلىسىندا - 0,2 پايىز، سولتۇستىك قازاقستان وبلىسىندا - 0,1 پايىز تومەندەدى.

بۇگىنگى تاڭدا سۋ تاسقىنىنان زارداپ شەككەن وبلىستاردا جاعداي تۇراقتى، ازىق-تۇلىكپەن، ونىڭ ىشىندە الەۋمەتتىك ماڭىزى بار ازىق-تۇلىكتى جەتكىزۋ پروبلەمالارى بايقالىپ وتىرعان جوق. الەۋمەتتىك ازىق-تۇلىكتىڭ باعاسى وسكەنى بايقالمايدى. كۇن سايىن ساۋدا وبەكتىلەرىنە مونيتورينگ جۇرگىزىلەدى»، - دەدى ول.

سونداي-اق، ول 1-ساۋىردەن بەرى الەۋمەتتىك ماڭىزى بار ازىق-تۇلىكتىڭ باعاسىن نەگىزسىز كوتەرگەندەردىڭ ۇستىنەن 326 اكىمشىلىك قاۋلى شىعارىپ، 303 ەسكەرتۋ بەرىلىپ، 23-ايىپپۇل سالىنعانىن ايتتى.