تاريحي كەزدەسۋ: ەردوعان مەن پاشينيان ىستانبۇلدا كەلىسسوز جۇرگىزدى
استانا. KAZINFORM - تۇركيا پرەزيدەنتى رەجەپ تايىپ ەردوعان ىستامبۇلدا ارمەنيا پرەمەر-ءمينيسترى نيكول پاشينيانمەن كەزدەستى، دەپ حابارلايدى تۇركيا پرەزيدەنتىنىڭ كوممۋنيكاسيالار ءبولىمى.
ارمەنيا پارلامەنتىنىڭ سپيكەرى الەن سيمونيان بۇل وقيعانى تاريحي وقيعا دەپ اتاپ، بۇل «ارمەنيا باسشىسىنىڭ تۇركياعا وسىنداي دەڭگەيدەگى العاشقى ساپارى» ەكەنىن ايتتى. 2023 -جىلى پاشينيان تۇركياعا باردى - ول انكاراعا ەردوعاننىڭ يناۋگۋراتسياسىنا كەلدى. ەريەۆاننىڭ پىكىرىنشە، بۇل ساپار ارمەنيامەن ديپلوماتيالىق قاتىناسى جوق تۇركيامەن قارىم-قاتىناستى قالىپقا كەلتىرۋ ءۇشىن دە، باكۋمەن اراداعى جانجالدى رەتتەۋ ءۇشىن دە قاجەت بولدى.
- پاشينيان ستامبۋلعا ەردوعاننىڭ شاقىرۋىمەن كەلدى، - دەپ حابارلايدى فرانس پرەسس اگەنتتىگى.
دولماباحچە سارايىندا وتكەن كەزدەسۋدە تۇركيا پرەزيدەنتى يزرايل مەن يراننىڭ ءوزارا شابۋىلدارى اياسىندا تاياۋ شىعىستاعى تاۋەكەلدەردى ازايتۋ ءۇشىن باسقا ليدەرلەرمەن بايلانىستارعا دا نازار اۋداردى. سوڭعىسى تۇركيامەن دە، ارمەنيامەن دە شەكتەسەدى. انكارا كاۆكازدا عانا ەمەس، بۇكىل ايماقتا تۇراقتىلىق ورناتۋ ءۇشىن بارلىق ديپلوماتيالىق قۇرالداردى قولدانۋدا، دەپ حابارلايدى Anadolu اگەنتتىگى تۇركيا پرەزيدەنتىنىڭ سوزىنە سىلتەمە جاساپ.
ەردوعان ازەربايجان مەن ارمەنيا اراسىنداعى كەلىسسوزدەر بارىسىندا قول جەتكىزىلگەن كونسەنسۋستىڭ ماڭىزدىلىعىنا توقتالدى. ىستامبۇلداعى كەزدەسۋگە قاتىسۋشىلار وڭتۇستىك كاۆكازداعى بەيبىتشىلىك ۇدەرىسى ماسەلەسىنە دە توقتالدى.
- ىستانبۇلدا مەن پرەزيدەنت ەردوعانمەن جان-جاقتى پىكىر الماستىم. ءبىز ارمەنيا مەن تۇركيا اراسىنداعى قارىم-قاتىناستاردى قالىپقا كەلتىرۋ ۇدەرىسىن، ايماقتىق ديناميكا مەن تۇراقتى ديالوگتىڭ ماڭىزدىلىعىن تالقىلادىق. ارمەنيا ءبىزدىڭ ايماقتا بەيبىتشىلىك پەن تۇراقتىلىقتى ورناتۋدى جاقتايدى، - دەپ جازدى نيكول پاشينيان ءوز كەزەگىندە X الەۋمەتتىك جەلىسىندە.
ارمەنيا ۇكىمەتىنىڭ باسپا ءسوز قىزمەتى تاراپتار باسقا ماسەلەلەرمەن قاتار ارميان-ازەربايجان قارىم-قاتىناستارىن تالقىلاعانىن حابارلادى.