تاريحي جەڭىس: وزبەكستان باسشىسى پاراليمپياداشىلاردى ماراپاتتادى
تاشكەنت. KAZINFORM - وزبەكستان پرەزيدەنتى شاۆكات ميرزيەۆ XVII جازعى پاراليمپيادا ويىندارىنىڭ جەڭىمپازدارى مەن جۇلدەگەرلەرىن ماراپاتتادى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
وزبەكستاندىق سپورتشىلار پاريجدە وتكەن پاراليمپيادا ويىندارىندا 26 مەدال جەڭىپ الىپ، تاريحي رەكورد ورناتتى.
«سىزدەر، ءبىزدىڭ ەرجۇرەك ۇل- قىزدارىمىز جوعارى بەلەستى باعىندىرىپ، جارىستىڭ ناعىز قاھارمانىنا اينالدىڭىزدار. وزبەكستان كومانداسى 10 التىن، 9 كۇمىس، 7 قولا مەدال جەڭىپ الدى. جالپى كوماندالىق ەسەپتە 13-ورىنعا جايعاسسا، ازيادا 3-ورىن، تۇركى، يسلام جانە ت م د ەلدەرى اراسىندا 1-ورىنعا شىقتى. سپورتشىلارعا قاجەتتى بارلىق جاعداي جاسالدى. ناتيجەسىندە بيىل پاراليمپيادا ويىندارىندا 9 سپورت تۇرىنەن العاش رەت 65 سپورتشى ەل نامىسىن قورعادى»، - دەدى پرەزيدەنت.
شاۆكات ميرزيەۆ بيىل تۇڭعىش رەت وزبەكستاندىق ۆەلوسپورتشىلار پاراليمپياداعا قاتىسقانىن اتاپ ءوتتى.
«وزبەكستاننىڭ سپورت تاريحىندا كوپتەگەن جەڭىستەر بار ەكەنى بەلگىلى. ءبىراق پاراليمپيادا ويىندارىندا مۇنداي رەكوردتىق جەتىستىك ەشقاشان بولعان ەمەس. مۇنداي جارقىن جەڭىس وزبەكستان جىلناماسىنا التىن ارىپتەرمەن جازىلادى»، - دەپ توقتالدى وزبەكستان باسشىسى.
قوسا كەتسەك، بۇعان دەيىن شاۆكات ميرزيەۆ پاراليمپيادا ويىندارىنىڭ جەڭىمپازدارى مەن جۇلدەگەرلەرىن جانە ولاردىڭ باپكەرلەرىن مەملەكەتتىك ناگرادامەن ماراپاتتاۋ تۋرالى جارلىققا قول قويعان ەدى.
اۆتور
ءاليحان اسقار