تاريحي جولايرىقتا سانالى باعىت تاڭدالدى - ماۋلەن اشىمبايەۆ

استانا. KAZINFORM - بەس جىل بۇرىن مەملەكەت باسشىسى قاسىم-جومارت توقايەۆ اشىق سايلاۋدا باسەكەلەستىك كۇرەستە جەڭىسكە جەتىپ، قازاقستان پرەزيدەنتى قىزمەتىنە رەسمي تۇردە كىرىستى. ەلىمىزدە تۇبەگەيلى وزگەرىستەر بولا باستادى.

ول قانداي جاڭاشىلدىقتار؟ سەنات ءتوراعاسى ماۋلەن اشىمبايەۆ «ۆرەميا» گازەتىندە جاريالاعان ماقالاسىندا بەس جىل ىشىندە ەل ومىرىندە جۇزەگە اسقان جارقىن رەفورمالاردى تىلگە تيەك ەتتى.

ونىڭ ايتۋىنشا، قازاقستان تاريحي جولايرىعىندا تۇرىپ، سانالى تۇردە دۇرىس جولدى تاڭداۋ كەرەك بولعان. بۇل رەتتە، مەملەكەت باسشىسى «جاڭا قازاقستان»، «ادىلەتتى قازاقستان» دەگەن جاڭا باستامانى ۇسىندى.

«بۇل - ەسكى «قاپتاماداعى» جاڭا بەلگى ەمەس، كەيبىر ادامدار الدىڭعى تاجىريبەگە نەگىزدەلگەن دەپ ويلايدى. ءبىز بۇل يدەيانى قۇنسىزداندىرۋعا تاۋەكەل ەتە المايمىز. ارينە، جاڭا قازاقستاندا بۇرىنعى ادامدار مەكەندەيدى. قاسىم-جومارت كەمەل ۇلى اتاپ وتكەندەي، ەسكى جانە جاڭا قازاقستاندىقتار جوق. ءبىز ءبىر حالىقپىز، ءبىزدى جاڭاشا ءومىر سۇرۋگە ۇيرەتەتىن جاڭا ادامدار جوق. ءبىراق بۇل نىشان قوعامدىق ساناداعى پاراديگمالىق وزگەرىستەردىڭ دالەلى رەتىندە ماڭىزدى. ءبىز ءۇشىن پرەزيدەنت قاسىم- جومارت توقايەۆ ىرگەسىن قالاپ بەرگەن ساياسي باستامالار ارقىلى جاڭا الەۋمەتتىك كەلىسىمشارت جاساۋعا جول اشىلدى»، - دەدى سەنات ءتوراعاسى.

قاسىم-جومارت توقايەۆ ءوزىنىڭ سايلاۋالدى تۇعىرناماسىندا «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋعا نيەتتى ەكەنىن اڭعارتقان بولاتىن.

«پرەزيدەنت توقايەۆ سايلاۋدا جەڭىسكە جەتكەننەن كەيىن بىردەن ۇكىمەت پەن قوعام اراسىندا بەلسەندى ديالوگ ورناتۋعا كىرىستى. ونىڭ العاشقى جارلىعى «حالىق ۇنىنە قۇلاق اساتىن مەملەكەت» تۇجىرىمداماسىنىڭ ناقتى قۇرالى - ۇلتتىق قوعامدىق سەنىم كەڭەسىن قۇرۋى بەكەر ەمەس. وعان سايكەس، بەيبىت جينالىستار تۋرالى زاڭنامانى ىرىقتاندىرۋ، پارتيالاردى تىركەۋدىڭ ساندىق شەگىن ايتارلىقتاي قىسقارتۋ، جالا جابۋدى دەكريميناليزاتسيالاۋ، ءولىم جازاسىن الىپ تاستاۋ، پارلامەنتتىك وپپوزيتسيا ينستيتۋتىن ەنگىزۋ سياقتى شارالار جۇزەگە اسا باستادى»، - دەدى ماۋلەن اشىمبايەۆ.

ونىڭ ايتۋىنشا، ءبارى ويداعىداي بولعان جوق. پرەزيدەنت پەن ونىڭ جاقتاستارىنا ەسكى ەليتا وكىلدەرىنىڭ جاسىرىن، تاباندى جانە بەلسەندى قارسىلىعىن ەڭسەرۋگە تۋرا كەلگەن.