«تاريحتى جاڭىلىس ءبىلۋ-قاسىرەت». دارحان قىدىرالى مەكتەپ وقۋلىعىن قايتا جازۋدى ۇسىندى

  سەناتور دارحان قىدىرالى ءوزىنىڭ تەلەگرام ارناسىندا تاريح تارماقتارىنا توقتالىپ، وسى جىلى جوشى ۇلىسىنىڭ قۇرىلعانىنا 800 جىل تولاتىن تۇستا وتكەندى دۇرىس ەكشەۋگە شاقىردى.

سەناتور ماقالاسىندا بيىلعى مەرەيتوي قارساڭىندا جوشى ۇلىسىنىڭ تاريحى جاڭاشا زەردەلەنەتىنىنە سەنىم بىلدىرگەن.

«ۇلىق ۇلىس-بۇل جاي عانا مەملەكەتتىك قۇرىلىم ەمەس، ءبىز ەۋرازيا دەپ اتايتىن ۇلانعايىر كەڭىستىكتەگى حالىقتاردىڭ تاريحىنا ارقاۋ بولعان وركەنيەتتىك ماتريتسا. ونى وركەنيەت-مەملەكەت دەپ تە اتايتىندار بار. قۇرامىنداعى جۇرتتاردىڭ ءتىلى مەن دىنىنە، داستۇرىنە قىسىم جاساماعان ۇلىق ۇلىس ولاردىڭ مادەنيەتىنىڭ ءوسىپ- وركەندەۋىنە ۇلكەن ۇلەس قوستى. سوندىقتان ول «مادەنيەتتەر موزايكاسىن» تۇزگەن ءتيىمدى مەملەكەت تەتىگى ارقىلى قالىپتاسقان تۇتاس جۇيە. ەلىمىزدەگى تولەرانتتىلىق تامىرى وسى داستۇرمەن ۇندەس جاتىر. قازىر قايتا جاڭعىرعان جىبەك جولىنا يەلىك ەتكەن، شىعىس پەن باتىستى جالعاعان ۇلىق ۇلىستىڭ ەكونوميكالىق اسپەكتىلەرىن زەردەلەۋ دە ماڭىزدى. بۇل رەتتە، مەملەكەتتىلىك تاريحىن التىن وردادان تاراتاتىن ەلدەردىڭ عالىمدارىمەن ورتاق مۇرانى بىرلەسە زەرتتەگەن ءجون. اسىرەسە «جوشى ۇلىسىن زەرتتەۋ» ينستيتۋتىنا ۇلكەن جاۋاپكەرشىلىك جۇكتەلەرى انىق»، دەپ جازدى دارحان قىدىرالى.

ول سونداي-اق، مەكتەپ پاندەرىندەگى وتكەن تاريحىمىزعا قاتىستى تولايىم اقپاراتتاردىڭ تىم قىسقا بەرىلگەنىن ايتىپ، «ۇلت تاريحىن بىلمەۋ - قاسىرەت! الايدا ودان وتكەن قاسىرەت بار، ول - تاريحتى جاڭىلىس ءبىلۋ. ۇلتتىق ساناعا تاريحي سانا نەگىز بولادى دەسەك، بۇرمالانعان تۇسىنىكتەن قاتە تانىم قالىپتاساتىنىن العا تارتتى».

«بيىل اياقتالاتىن قازاقستان تاريحىنىڭ كوپ تومدىعى جوشى ۇلىسىنا قاتىستى تىڭ دەرەكتەردى ۇسىنادى دەپ ۇمىتتەنەمىز. مەكتەپ وقۋلىقتارى وسى كوپتومدىق نەگىزىندە قايتا جازىلعانى ابزال. وندا جوشىنىڭ قازاق حاندارىنىڭ اتاسى ەكەنى باسا ايتىلۋى ءتيىس. سونىمەن قاتار وقۋلىقتارعا قازاق مەملەكەتتىلىگىنىڭ باستاۋلارى تۋرالى دا سونى دەرەكتەر ەنگىزۋ كەرەك. ماسەلەن تاريحي تالاس قۇرىلتايى وتكەن، جەتىسۋ مەن سىر اراسىندا قۇرىلعان موعولستان مەملەكەتىنە 6-7 سىنىپقا ارنالعان وقۋلىقتا 1 پاراگراف، ال 10-سىنىپقا ارنالعان وقۋلىقتا 4-5 جول عانا ارنالعان. ال وسى موعولستان جەرىندە، شۋ بويىندا قازاق حاندىعىنىڭ نەگىزى قالانعانى بەلگىلى. ءبىر ايتا كەتەرلىگى، ج و و-داعى ماماندىقتارعا قازاق تاريحى ءپانىنىڭ ەنگىزىلگەنى قۇپتارلىق. وسى ءپاندى مەتودولوگيالىق بىرىزدىلىككە كەلتىرىپ، مەملەكەتتىلىگىمىزدىڭ باستاۋلارىنا باسىمدىق بەرىلگەنى ءجون»، دەپ جازدى ول.

دارحان قىدىرالى تاريحي تۇلعالاردىڭ مەرەيتويلارى توي-تويلاۋ ءۇشىن ەمەس، وي ويلاپ، تاريحي ساناعا وڭ ىقپال ەتۋ ءۇشىن قاجەت ەكەنىن دە تىلگە تيەك ەتتى.