تارباعاتايدا تۋعان تانىمال اقىن نەسىپبەك ايت ۇلى دۇنيەدەن وزدى

 بەلگىلى اقىن، مەملەكەتتىك سىيلىقتىڭ لاۋرەاتى نەسىپبەك ايت ۇلى 73 جاسىندا دۇنيەدەن ءوتتى، دەپ حابارلايدى Kazinform. 

نەسىپبەك ايت ۇلى 1950 -جىلى شينجاڭنىڭ تارباعاتاي ايماعىندا تۋعان. اقىن، مەملەكەتتىك سىيلىقتىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى. تاڭدامالى جەتى تومدىعى «فوليانت» باسپاسىنان جارىق كورگەن ەپيك اقىن.

ەڭبەك جولىن شۇبارتاۋ اۋداندىق «جاڭا ءومىر» گازەتىندە باستادى. 1974 -جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.

1974-1984 ج ج. «بالدىرعان» جۋرنالىنىڭ پوەزيا ءبولىمىنىڭ مەڭگەرۋشىسى، «جالىن» باسپاسىندا رەداكتور. 1984-1994 ج ج. قازاقستان جازۋشىلار وداعىندا ادەبي كەڭەسشى. 1995-1996 ج ج. «اقىن» قاۋىمداستىعىنىڭ ديرەكتورى. 1997-2001 ج ج. «قازاق ادەبيەتى» گازەتىندە سىن ءبولىمىنىڭ، «جۇلدىز» جۋرنالىندا پوەزيا ءبولىمىنىڭ مەڭگەرۋشىسى.

2001 -جىلدان باستاپ استانا قالاسىنا كوشىپ، ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە، پرەزيدەنتتىك مادەنيەت ورتالىعىندا قىزمەت ىستەگەن.

قازاقستان جازۋشىلار وداعىنىڭ سەكرەتاريات مۇشەسى، استانا قالاسىنداعى س. سەيفۋللين اتىنداعى مۇراجاي ديرەكتورى.

العاشقى كىتابى 1974 -جىلى «قوزىكوش» دەگەن اتپەن جارىق كوردى. «جۇرەكتەگى جاڭعىرىقتار»، «اكە تۋرالى سىر»، «جاڭبىر ءانى»، «تۇندەلەپ ۇشقان تىرنالار»، «رۋحىمنىڭ پاديشاسى»، «مۇقاعالي- جەلتوقسان»، «بايتەرەك»، بالالارعا ارنالعان «بالاباقشاعا بارار جولدا»، «جەلكىلدەپ وسكەن قۇراقتاي»، «كۇمىس كۇيمە» («سەرەبريانىي سۋندۋچوك»)، «قارتايمايدى كۇن نەگە؟» اتتى كىتاپتارى، شىعىستىڭ ۇلى شايىرى ءا. ناۋايدىڭ «ەسكەندىر قورعانى»، «ءلايلى-ءماجىن» داستاندارىن ءتارجىمالاپ، «يگور جورىعى تۋرالى جىر»، تاعى باسقا اۋدارما كىتاپتارى شىققان. تۇرىكتىڭ Ⅶ عاسىردا ءومىر سۇرگەن ۇلى اقىنى ءجۇنىس ەمىرە، قىتايدىڭ كونە ءداۋىر اقىنى بو چىزيۋدىڭ، فرانسۋز اقىنى دج. روداريدىڭ، سونداي-اق م. يساكوۆسكي، ا. بارتو، س. ميحالكوۆ، س. بارۋزدين، ۆ. بەرەستوۆ، ت. سىدىقوۆ، س. جۋسۋيەۆ ولەڭدەرىن تۋعان تىلىمىزدە سويلەتكەن.

«بايتەرەك» (2003)، «كوز جاسىم» تاڭدامالى (2006)، «ءبورىتوستاعان» (2007)، «ەرلىككە ەسكەرتكىش» (2008)، «ساردار» (2008)، «قۇلانويناق» (2009)، «ارقاتىرەك» (2010)، «ناۋرىزباي» (2011)، «تۋ» (2012)، «سارايىمنان شىققان ءسوز» (2014)، «داريعا، داۋرەن» (2018) جانە تاعى باسقا كىتاپتارى جارىق كوردى.