تاراز وليمپيادا ويىندارىنىڭ وتانى - ەجەلگى وليمپيامەن باۋىرلاس قالا بولدى
تاراز قالاسى مەن ەجەلگى وليمپيا قالاسى اراسىندا باۋىرلاستىق قاتىناستار ورناتۋ تۋرالى اكتىگە قول قويۋ سالتاناتتى ءراسىمى ءوتتى، دەپ حابارلايدى Kazinform ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
باۋىرلاستىق اكتىسىنە ەجەلگى ۋاقىتتا وليمپيادا ويىندارىنىڭ ەرەجەلەرى جازىلعان يفيتا ديسكى ساقتالاتىن، ال قازىرگى ۋاقىتتا ءار 2 جىل سايىن وليمپيادا الاۋىن تۇتاتۋ سالتاناتى وتەتىن گەرا عيباداتحاناسىنىڭ الدىندا گرەك حالقى ءۇشىن قاسيەتتى جەردە قول قويىلدى.
اكىم ب. ورىنبەكوۆ جاڭا سەرىكتەس قالامەن ىنتىماقتاستىق ورناتۋ ەكى قالانىڭ ءوزارا دامۋى ءۇشىن قولايلى جاعدايلار جاساۋ ماقساتىندا مادەنيەت، سپورت، تۋريزم، عىلىم جانە ءبىلىم بەرۋ سالاسىندا تاجىريبە الماسۋدى جانداندىرۋعا مۇمكىندىك بەرەتىنىن اتاپ ءوتتى.
ءوز كەزەگىندە، مەر گ. گەورگيوپۋلۋس ەجەلگى وليمپيا تاريحى 2000 -جىلعا سوزىلاتىن جانە شىعىس پەن باتىستىڭ حالىقتارى مەن مادەنيەتتەرىنىڭ تۇيىسەتىن جەرى بولىپ تابىلاتىن تارازبەن دوستىق پەن باۋىرلاستىق قاتىناستار ورناتۋعا قۋانىشتى ەكەنىن ايتتى.
يليا گرەك ءوڭىرىنىڭ بيزنەس-قوعامداستىعىنىڭ وكىلدەرىمەن وتكەن كەزدەسۋ بارىسىندا ەكى ەلدىڭ وڭىرلەرى مەن ىسكەر توپتارى اراسىنداعى ەكونوميكالىق بايلانىستاردى نىعايتۋ جانە قاتىناستاردى دامىتۋ تۋرالى ۋاعدالاستىققا قول جەتكىزىلدى.
ەجەلگى وليمپيا يۋنەسكو بۇكىل الەمدىك مۇرا نىساندارىمەن عانا ەمەس، سونىمەن قاتار حالىقارالىق وليمپيادا كوميتەتىنىڭ نەگىزگى ءبىلىم بەرۋ جانە مادەني مەكەمەسى بولىپ تابىلاتىن حالىقارالىق وليمپيادا اكادەمياسىنىڭ ونىڭ اۋماعىندا ورنالاسۋىمەن تانىمال بولىپ تابىلادى.
تاراز بەن ەجەلگى وليمپيا اراسىنداعى باۋىرلاستىق قاتىناستاردى ورناتۋعا ءوڭىرارالىق ىنتىماقتاستىقتى دامىتۋ ماقساتىندا ق ر-نىڭ گرەكياداعى ەلشىلىگى مەن قازاقستان- گرەكيا ىسكەرلىك كەڭەسى باستاماشىلىق جاسادى.
سالتاناتتى راسىمگە ق ر گرەكياداعى ەلشىسى ەرلان باۋداربەك- قوجاتايەۆ، قازاقستان- گرەكيا ىسكەرلىك كەڭەسىنىڭ تەڭ ءتوراعالارى جاقسىبەك كۇلەكەيەۆ جانە توماس لامنيديس، حالىقارالىق وليمپيادا اكادەمياسىنىڭ پرەزيدەنتى يسيدوروس كۋۆەلوس جانە ق ر كريتتەگى قۇرمەتتى كونسۋلى سپيريدون زاننياس قاتىستى.