استانادا تاكسي جۇرگىزۋشىسى جولاۋشى قىزدىڭ ساپار كەزىندەگى ءتيىسۋ تۋرالى جازباسىنان كەيىن ۇستالدى. جولاۋشىنىڭ ايتۋىنشا، ەر ادام باس تارتقانىنا قاراماستان، وعان جىنىستىق قاتىناس ۇسىنىپ، مەكەنجايعا اينالما جولمەن بارعان. پوليتسيا 42 جاستاعى ەر ادامعا قاتىستى اكىمشىلىك ءىس قوزعالعانىن ايتتى، دەپ حابارلايدى kznews.kz
الايدا، قىزدىڭ ايتۋىنشا، دوستارى كولىكتەن ءتۇسىپ قالعاننان كەيىن جۇرگىزۋشى ونىڭ جەكە ءومىرى تۋرالى سۇراقتار قويا باستاعان. ول باس تارتقانىنا قاراماستان، ەر ادام ءوز دەگەنىنەن قايتپاي، قىسقا جولدىڭ ورنىنا اينالما جولمەن جۇرگەن.
«ول ماعان اشىقتان-اشىق جىنىستىق قاتىناسقا ءتۇسۋدى ۇسىندى. ارتقى ورىندىققا قاسىڭا بارىپ وتىرىپ، سەنى ەركەلەتسەم، ساعان ۇنايدى، سودان كەيىن مىندەتتى تۇردە مەنىمەن بىرگە بولعىڭ كەلەدى دەدى»، - دەلىنگەن جازبادا.
قىز بۇل جاعدايدان قۇتىلۋ ءۇشىن جۇرگىزۋشىنىڭ ۇسىنىسىنا كەلىسكەندەي سىڭاي تانىتىپ، دۇكەننەن تەمەكى الىپ كەلۋدى وتىنگەن. كولىك توقتاعان كەزدە ول قۇربىسىنا قوڭىراۋ شالعان. وسىدان كەيىن جۇرگىزۋشى رايىنان قايتىپ، جول اقىسى رەتىندە 1000 تەڭگە اۋدارۋدى سۇراعان.
ءبىز بۇل جاعدايعا قاتىستى پىكىر الۋ ءۇشىن inDrive باسپا ءسوز قىزمەتىنە جۇگىندىك. كومپانيا وكىلدەرى قۇقىقبۇزۋشىلىق تۋرالى حابارلامالارعا ۇلكەن جاۋاپكەرشىلىكپەن قارايتىندارىن جانە جولاۋشىلار قاۋىپسىزدىگىنە قاتەر توندىرەتىن ارەكەتتەرگە جول بەرىلمەيتىنىن ايتتى.
سونداي-اق اتالعان جازبا بويىنشا تەكسەرىس باستالعانى اتاپ ءوتىلدى.
«وقيعا تۋرالى اقپارات شىعا سالىسىمەن ءبىز تەكسەرىس باستاپ، ءمان-جاي انىقتالعانشا جۇرگىزۋشىنىڭ اككاۋنتىن بۇعاتتادىق. ءبىزدىڭ جۇيەدە بۇل جاعداي بويىنشا ءوتىنىش تىركەلمەگەن. وقيعانىڭ ەگجەي-تەگجەيىن ءبىلۋ ءۇشىن جازبا اۆتورىمەن بىرنەشە رەت بايلانىسۋعا تىرىستىق، ءبىراق ازىرگە تىكەلەي بايلانىس ورناتۋ مۇمكىن بولمادى. تەكسەرىس جالعاسىپ جاتىر، ناتيجەسى بويىنشا ءتيىستى شارالار قابىلدانادى»، - دەپ حابارلادى كومپانيا.
سونداي-اق كومپانيا ساپارعا تىكەلەي قوسىمشا ارقىلى تاپسىرىس بەرۋ مۇنداي جاعدايلاردى تەزىرەك شەشۋگە مۇمكىندىك بەرەتىنىن ەسكە سالدى، سەبەبى جۇيەدە ساپار تۋرالى بارلىق دەرەك ساقتالادى.
استانا پوليتسيا دەپارتامەنتىنىڭ باسپا ءسوز قىزمەتى جۇرگىزۋشى جەكە باسى انىقتالعانىن اتاپ ءوتتى.
«اتالعان فاكتى بويىنشا 42 جاستاعى ەر ادام انىقتالىپ، پوليتسياعا جەتكىزىلدى. وعان قاتىستى ۇساق بۇزاقىلىق بابى بويىنشا اكىمشىلىك ءىس قوزعالىپ، قۇقىق بۇزۋشى ۋاقىتشا ۇستاۋ يزولياتورىنا قامالدى. جينالعان ماتەريالدار شەشىم قابىلداۋ ءۇشىن زاڭدا بەلگىلەنگەن تارتىپپەن سوتقا جولداندى»، - دەپ حابارلادى ۆەدومستۆو.