تاقيالى قىز - ترەندتە: پاۆلوداردا ناۋرىز قارساڭىندا ەرەكشە بايقاۋ باستالدى

پاۆلودار. KAZINFORM - بۇقار جىراۋ مۋزەيى مەكتەپ وقۋشىلارىنىڭ ۇلتتىق كيىمگە قىزىعۋشىلىعىن ارتتىرۋعا دەن قويىپ وتىر. ناۋرىز مەيرامى قارساڭىندا قىز بالالار اراسىندا تاقيا تىگۋدەن اۋقىمدى سايىس وتكىزىلمەك.

«تاقيالى قىز - ترەندتە» اتتى تاقيا تىگۋ ونەرى بويىنشا بايقاۋ وڭىردە تۇڭعىش رەت ۇيىمداستىرىلعالى وتىر.

6-9-سىنىپ وقۋشىلارى اراسىندا وتەتىن بايقاۋعا پاۆلودار قالاسىنداعى مەكتەپ وقۋشىلارى قاتىسا الادى.

«ۇل- قىزدارىمىزدىڭ اراسىندا ۇلتتىق كيىمدەرىمىز بىرتىندەپ تانىلىپ كەلە جاتىر. قازىر كوپشىلىك تەك توي- تومالاق پەن مەرەكەلەردە عانا ەمەس، كۇندەلىكتى ومىردە دە ۇلتتىق مانەردە تىگىلگەن كيىمدەردى كيە باستاعان. ال قازاق قىزىنىڭ باسىنا كيىلەتىن تاقيانىڭ ورنى ءتىپتى بولەك. ەرتەدە قىز بالا وسە باستاعاننان اتا- اناسى تاقيا كيگىزگەن. وعان نەبىر سالپىنشاق، شاشاقتار، ۇكى تاعىپ، زەرلەگەن. تاقيانىڭ قادىرىن جاس ۇرپاق تانىپ ءوسۋى كەرەك. بايقاۋدىڭ نەگىزگى ماقساتى دا سول، - دەيدى بۇقار جىراۋ اتىنداعى ادەبيەت جانە ونەر مۋزەيىنىڭ ديرەكتورى ەربول قايىروۆ.

بايقاۋ ەكى كەزەڭنەن تۇرادى. العاشقى تۋردا قاتىسۋشىلار اراسىنان بەس ۇزدىك جۇمىستىڭ يەگەرى ىرىكتەلەدى.

مەكتەپ وقۋشىلارى قازاق قىزدارىنىڭ ۇلتتىق باس كيىمى - تاقيانى ءوز قولدارىمەن تىگىپ اكەلىپ، ونىڭ جاسالۋ جولدارى مەن تىگۋ ادىستەرىن، تاقيانىڭ بۇگىنگى كۇندەگى ماڭىزىن بايانداۋى ءتيىس.

ال ەكىنشى كەزەڭگە وتكەن قاتىسۋشىلار تاقيانى دايىن سۇلبالارىمەن تىگىپ، اشەكەيلەپ، قازىلار القاسىنىڭ الدىندا قورعايدى

جەڭىمپاز اتانعان وقۋشىعا سىيلىققا سمارتفون بەرىلمەك.

مۇرات اياعان