«تاقيالى دەپۋتات»: ۇلتتىق كيىم ۇلتتىق رۋحتى قالىپتاستىرادى

استانا. KAZINFORM – ق ر پارلامەنت ءماجىلىسىنىڭ دەپۋتاتى داۋلەت مۇقايەۆ سوڭعى ۋاقىتتا ۇلتتىق كيىمگە دەگەن سۇرانىستىڭ ارتا باستاعانىن اڭعارعانىن ايتادى. ءتىپتى، پارلامەنت قابىرعاسىنداعى ارىپتەستەرىنىڭ جۇمىسقا ويۋ-ورنەگى بار كيىمدەردى كيۋگە قىزىعۋشىلىعى ارتا باستاعان.

ءماجىلىس دەپۋتاتى ستۋدەنتتىك كەزدەن بەرى تاقيا، تىماق كيىپ، جەڭىل جەيدەسىنە ۇلتتىق ەلەمەنتتەردى تاڭبالاپ جۇرەتىنىن ايتتى.

- ارينە، پارلامەنتكە العاش كەلگەندە بىرەۋلەر «تاقياڭدى شەشىپ تاستا، بۇل جەردىڭ وزىندىك ەتيكاسى، درەسس- كودى بار» دەگەن ەسكەرتۋ جاسايدى ما دەپ ويلاعانىم راس. ءبىراق انتتى دا تاقيامەن قابىلداپ، وسى ۋاقىتقا دەيىن باسىمنان شەشكەن ەمەسپىن. ارىپتەستەرىمنىڭ كوزقاراسى دۇرىس. قازىر مەنى قولداپ جاتقان دەپۋتاتتاردىڭ قاتارى ارتتى. الداعى كۇندەرى پارلامەنت مۇشەلەرى جالپى وتىرىسقا ۇلتتىق كيىم كيىپ كەلەدى دەپ كۇتىلۋدە. ءوز باسىم ارىپتەستەرىمنىڭ تۋعان كۇنىنە تاقيا، شاپان سىيلاپ، ۇلتتىق قۇندىلىقتاردى دارىپتەۋگە تىرىسىپ ءجۇرمىن، - دەيدى ول.

داۋلەت مۇقايەۆتىڭ «ۇلتتىق كيىمدەردىڭ باعاسى قىمبات» دەگەندەرگە جاۋابى دايىن.

- ساپالى دۇنيەنىڭ قىمبات بولۋى زاڭدىلىق. ەرەكشە ديزاينەرلىك ستيلمەن تىگىلگەن كيىم قىمبات بولادى دا. دەسە دە، كيىمدەردى ۇلتتىق ەلەمەنتتەرمەن كومكەرۋ اسا قىمبات تۇرادى دەپ ەسەپتەمەيمىن. مەنىڭ باسىمداعى تاقيا ءارى كەتسە 3-5 مىڭ تەڭگە ارالىعىندا. ويۋ- ورنەكتەردى كيىمگە تاڭبالاۋ دا ودان قىمبات تۇرماس. ياعني، قالتاعا ايتارلىقتاي سالماق سالمايدى. «قىمبات» دەگەن نارسەنى سانامىزدان الىپ تاستاساق ەكەن. ۇلتتىق كيىم كيىپ ءجۇرۋ ۇلتتىق رۋحىمىزدى قالىپتاستىرادى. قاراپايىم مىسال، ءۇي جانىنداعى دۇكەنگە شاپانمەن، تاقيامەن كىرىپ كەلسەڭىز، وزگە ۇلتتىڭ ساتۋشىلارى قازاقشا امانداسىپ جاتادى. ال كۇندەلىكتى كيىممەن كىرىپ قالساڭ «چتو يسكالي؟» دەپ اۆتوماتتى تۇردە ءتىل قاتادى، - دەيدى دەپۋتات.

ايتا كەتەيىك، جۋىردا داۋلەت مۇقايەۆ ءوزىنىڭ دەپۋتاتتىق ساۋالىندا ۇلتتىق كيىمدەرىمىزدى ۇلىقتاۋ ماقساتىندا رەسپۋبليكالىق دەڭگەيدە «ۇلتتىق كيىم» كۇنىن بەكىتۋ قاجەت ەكەنىن ايتقان بولاتىن.

«ۇلتتىق كيىم - ۇلتىمىزدىڭ ۇلىلىعىن ۇلىقتايتىن، ۇلتتىق كودىمىزدى بىلدىرەتىن ايشىقتى كورسەتكىش. ۇلتتىق كيىمدەرىمىزدىڭ مول مۇراسىمەن ماقتانا الاتىنداي ەلمىز. «بىرىنشىدەن - ۇلتتىق كيىمدەرىمىزدى ۇلىقتاۋ ماقساتىندا رەسپۋبليكالىق دەڭگەيدە «ۇلتتىق كيىم» كۇنىن بەكىتۋ. بۇل كۇن مادەني قۇندىلىقتارىمىزدى كەڭىنەن ناسيحاتتاپ، وسكەلەڭ ۇرپاقتى وتانشىلدىققا تاربيەلەۋدىڭ نەگىزى بولار ەدى. ەكىنشىدەن - مەملەكەتتىك قىزمەتكەرلەر مەن حالىققا قىزمەت كورسەتەتىن ورتالىق قىزمەتكەرلەرىنىڭ كيىمدەرىنە قازاقي ايدەنتيكا ەلەمەنتتەرىن قوسۋ. ۇشىنشىدەن - ۇلتتىق كيىم وندىرەتىن وتاندىق كاسىپكەرلەرگە مەملەكەت تاراپىنان قولداۋ كورسەتىپ، بيزنەستى قولداۋعا باعىتتالعان گرانتتاردا ۇلتتىق كيىم كاسىبىنە باسىمدىق بەرۋ، حالىق اراسىندا ۇلتتىق كيىمدى قولجەتىمدى ەتۋگە ىقپال ەتىپ، سۇرانىستى ارتتىرۋ. تورتىنشىدەن - مەكتەپ وقۋشىلارى كيەتىن ۇلتتىق كيىمدەر ستاندارتىن ازىرلەپ ەنگىزۋ ءارى حالىقارالىق ءتۇرلى جارىستارعا باراتىن ازاماتتاردىڭ فورمالارىنا مىندەتتى تۇردە ۇلتتىق ناقىشتى بەينەلەۋ»، - دەگەن ەدى ءماجىلىس دەپۋتاتى.

اۆتور

ورالحان قوجانوۆ