تانىسىڭا قارىزدى پايىزبەن بەرۋ نە ءۇشىن قاۋىپتى؟

جەكە تۇلعالار تانىسىنا پايىز قوسىپ قارىزعا اقشا بەرۋگە بولا ما، الدە تەك بانك بەرە الا ما؟ Massaget.kz ءتىلشىسى مامانداردان سۇراپ ءبىلدى.

«جەكە تۇلعالار پايىزبەن قارىز اقشا سۇراسا بەرۋدىڭ قاجەتى جوق. ويتكەنى جەكە تۇلعالارعا قولدانىستاعى زاڭناما بويىنشا «پايىزبەن قوسىپ» قايتارۋعا بولمايدى. پايىزبەن قارىزعا تەك بانك بەرەدى. ولاردا ۇلتتىق بانكتەن بەرىلەتىن ارنايى ليتسەنزياسى بولادى. مىسالى، ءسىز قارىز الۋشىعا پايىز قوسىپ، 2 ميلليون تەڭگە بەردىڭىز دەلىك، ودان قولحات تا الدىڭىز. كەيىن الۋشى تاراپ قايتارماي قويدى. سول كەزدە سوتقا جۇگىنەسىز. ءبىراق سوت ءسىزدىڭ تالابىڭىزدى قاناعاتتاندىرمايدى»، - دەدى زاڭگەر باعدات اماندوس ۇلى.

سونداي-اق يسلام فينانسىنىڭ ماگيسترى مۇرات قىلىشباي پايىزبەن قارىز بەرۋ ماسەلەسى شاريعاتتا قالاي قاراستىرىلعانىن ايتىپ بەردى.

«عيبادات ادام مەن اللانىڭ اراسىنداعى قارىم-قاتىناستى رەتتەسە، مۋاماليات - ادام مەن ادام اراسىنداعى اقشا قاتىناسىن رەتتەيدى. دەمەك، قارجى سالاسى مۋامالياتقا كىرەدى. ونىڭ ىشىندە بانك جۇيەسى، قارجى نارىعى جانە باسقا دا اقشاعا قاتىستى دۇنيەلەر مۋامالياتتا قاراستىرىلادى. مۋامالياتتىڭ باستى شارتى - بۇل رۇقسات ەتىلمەگەن زاتتاردى الىپ تاستاۋ. رۇقسات ەتىلمەگەن زاتتاردىڭ ىشىندە، ەڭ باستىسى، حارام دەگەن زات ول - «ريبا» (ەسك-ءوسىم). ءوسىم دەگەنىمىز - ءسىز بىرەۋگە اقشانى بەرىپ، ونىڭ ۇستىنەن الدىن الا ءوسىم تاباسىز. بۇل شاريعاتتا «ريبا» بولىپ سانالادى. بۇل تۋرالى قۇراندا 4 جەردە كەزدەسەدى. سونىڭ بىرىندە «اللانىڭ لاعنەت ايتقان ادامدارى» دەپ ايتىلادى. ماسەلەن، ەگەر مەن ءبىر ادامعا ءبىر ميلليون تەڭگەنى ءبىر جىلعا بەرىپ، وعان ءبىر جىلدان سوڭ ميلليون ەمەس، ءبىر 1,3 ميلليون قىلىپ قايتاراسىڭ دەپ شارت جاساسام، سول 300 مىڭ حارام بولىپ سانالادى»، - دەدى قارجى مامانى.